જવાબદાર કોણ ? / ઓહ ભાઈ સંભાળીને! આવી મુસાફરી ભારે પડી શકે છે, સુરતની બસમાં મુંબઈની લોકલ ટ્રેન કરતાં પણ ખરાબ હાલત

• સુરતમાં જોખમી મુસાફરી
• મુસાફરો લટકવા બન્યા મજબૂર
• જીવના જોખમે મુસાફરી

શહેરમાં લોકોને ટ્રાન્સપોર્ટેશમાં અગવડતા ન પડે તે માટે તંત્ર દ્વારા ખાસ તકેદારી રાખવામાં આવે છે. સમયસર રૂટ પર બસો દોડાવવામાં આવે છે પરંતુ ઘણીવાર ક્યાંક જનતાની ભૂલ તો ક્યાંક બસ ચાલકોની બેદરકારીને કારણે મોટી દુર્ઘટના બનતા વાર નથી લાગતી. ત્યારે સુરતમાં એક આવો જ વીડિયો સામે આવ્યો છે જે સહેજ પણ ખતરાથી ખાલી નથી.

જીવના જોખમે મુસાફરી
સુરત સિટી બસમાં લોકો જીવના જોખમે મુસાફરી કરતા હોવાનો વીડિયો સામે આવ્યો છે. જેમાં લોકો દરવાજા પર લટકીને મુસાફરી કરતા જોવા મળી રહ્યા છે. બસ નંબર 105માં લોકો લટકીને મુસાફરી કરતા જોવા મળી રહ્યા છે. ત્યારે અહીં સવાલ એ થાય કે જો સિટી બસમાં કોઇ દુર્ઘટના થઇ તો જવાબદાર કોણ? વારંવાર સિટી બસમાં આ પ્રકારે મુસાફરી થતી હોવાના વીડિયો સામે આવે છે, પરંતુ પ્રશાસન દ્વારા કોઇ કાર્યવાહી કરવામાં આવતી નથી.

મુંબઇની લોકલ ટ્રેન કરતા પણ ખરાબ હાલત
આ દ્રશ્યોમાં જોઇ શકાય છે કે એક બે નહીં પરંતુ 4થી પણ વધારે લોકો બસની બહાર જ લટકી રહ્યા છે. આ લોકો બસનો દરવાજો પકડીને ઉભા છે. મુંબઇની લોકલ ટ્રેનમાં કચોકચ ભીડ હોય તેવા દ્રશ્યો જોવા મળી રહ્યા છે પંરતુ આ સુરતના આ દ્રશ્યો તો મુંબઇની લોકલ ટ્રેન કરતા પણ ખરાબ કહી શકાય. જો ક્યાંક ડ્રાઇવરે અચાનક બ્રેક મારી કે પછી બાજુમાંથી કોઇ મોટુ વાહન પસાર થયુ તો સ્થિતિ કેવી થાય તેની કલ્પના કરવી મુશ્કેલ બને છે. ત્યારે નાગરિકોને પણ એજ વિનંતી છે કે આ પ્રકારે જીવના જોખમે મુસાફરી ન કરે. એક બસ ન મળી તો બીજી આવશે પરંતુ જિંદગી અમૂલ્ય છે.

પહેલા પણ આ નંબરની બસનો જ વીડિયો થયો હતો વાયરલ 
અગાઉ પર બસ નંબર 105નો જ આવો જ વીડિયો વાયરલ થયો હતો. તો આ પહેલા અગાઉ બસમાં લટકીને મુસાફરી કરતા એક યુવકનું પણ થયું હતું. નોંધનીય છે કે, સુરતના લોકોએ અનેક વખત વધારાની બસ મુકવાની માંગ મનપા  સમક્ષ કરી છે. કોર્પોરેશન દ્વારા વધારાની બસો ન ફાળવતા લોકો જીવના જોખમે મુસાફરી કરે છે. 

સળગતા સવાલ
- શું તંત્ર મોટી દુર્ઘટનાની રાહ જોઈ રહ્યું છે?
- શું મુસાફરોના જીવની કંઈ કિંમત નથી?
- SMCના સત્તાધીશોને આ દ્રશ્યો દેખાતા નથી?
- બસ ડ્રાઈવર લિમિટ કરતાં વધુ મુસાફરો કેવી રીતે બેસાડી શકે?
- કોઈ દુર્ઘટના બનશે, તો જવાબદાર કોણ?
- લોકો ક્યાં સુધી જીવના જોખમે મુસાફરી કરશે?
- શું AC વાળી કારમાં આવતા SMC સત્તાધીશોનું ધ્યાન આમના પર નથી પડતું?