કાર્યવાહી / ભાજપના નેતાને હજારોની ભીડ ભેગી કરવી પડી ભારે, પોલીસે કરી અટકાયત

• સુરતના માંગરોળમાં લગ્ન પ્રસંગે ભીડ એકત્ર કરવાનો મામલો
• માંગરોલ પોલીસે ભાજપ નેતા ઇંદ્રેશ મલેકની કરી અટકાયત 
• અન્ય બે શખ્સોની પણ પોલીસે કરી અટકાયત 

સુરતના માંગરોળમાં લગ્ન પ્રસંગે ભીડ એકઠી કરવા મામલે માંગરોળ પોલીસે ભાજપ નેતા ઈદરીશ મલેકની અટકાયત કરી છે. અન્ય બે શખ્સોની પણ પોલીસે અટકાયત કરી છે. લગ્ને મામલે ભીડ એકઠી કરવા મામલે પોલીસે 4 શખ્સ વિરુદ્ધ નામજોગ ગુનો દાખલ કર્યો હતો. તો સુરત SPએ આ મામલે 2 કોન્સ્ટેબલને પણ સ્પેન્ડ કર્યા છે.

સુરતના માંગરોળના ભાજપના નેતાની દીકરીના લગ્નનો એક વીડિયો વાયરલ થયો છે. ભાજપના નેતા ઈદરિશ મલેકની દીકરીના લગ્ન હતા. જેમાં મોટી સંખ્યામાં લોકો જોડાયા હતા અને DJના તાલે ઝૂમી ઉઠ્યા હતા. મોટી સંખ્યામાં લોકો ઉમટતા કોરોનાનું સંક્રમણ વધુ ફેલાય તેવ શક્યતા છે.

મહત્વનું છે કે, હાલમાં કોરોનાનું સંક્રમણ વધતા તંત્ર હરકતમાં આવ્યું છે, ત્યારે હવે ભાજપના નેતાઓ પોતાની દીકરીના લગ્નમાં મોટી સંખ્યામાં લોકોને એકઠા કરતા અનેક સવાલ ઉઠ્યા છે.

સળગતા સવાલ

• નેતાઓ અને જનતા માટે નિયમોના બેવડા ધોરણો ક્યાં સુધી?
• સામાન્ય લોકોને લગ્ન માટે પરવાનગી નથી મળતી ત્યાં નેતાઓ ભીડ એકઠી કેવી રીતે કરી શકે ?
• નેતાઓને જોઈને જનતા તેનુ અનુકરણ કરતી હોય છે પરંતુ અહી તો નેતા જ નિયમો તોડે તે કેટલુ યોગ્ય?
• ભાજપના નેતાઓ ક્યાં સુધી નિયમોના ધજાગરા ઉડાડતા રહેશે?
• તહેવારોમાં જનતા પર પ્રતિબંધ લદાય છે પરંતુ ભાજપના નેતાની દીકરીના લગ્ન બેરોકટોક થઈ શકે?
• નિયમો જનતા અને નેતાઓ માટે અલગ કેવી રીતે હોઈ શકે?
• પ્રદેશ પ્રમુખ સી.આર.પાટીલના કહેવા છતા ભાજપના નેતાઓ કેમ નિયમોનું પાલન નથી કરતા?
• નેતાઓ જ નિયમો તોડે તો જનતા પાસે શું અપેક્ષા રાખી શકો?
• કોરોનાના કેસો એક તરફ વધી રહ્યા છે અને ત્યા આમ ભીડ ભેગી કરો છો?

ગુજરાતમાં કોરોના બેકાબૂ

ઉલ્લેખનીય છે કે, રાજ્યમાં છેલ્લા 3 દિવસથી ચિંતાજનક વધારો નોંધાયો છે. સોમવારે રાજ્યમાં 1640 કેસ, મંગળવારે 1730 કેસ અને આજે 1790 કેસ નોંધાયા છે. આમ ગુજરાતમાં કોરોના સંક્રમણ દિવસેને દિવસે ચિંતાજનક રીતે વધી રહ્યું છે તે સ્પષ્ટ છે.  

મહારાષ્ટ્રની જેમ ગુજરાતમાં પણ ચિંતા વધી 

મહારાષ્ટ્રની જેમ ગુજરાતમાં પણ કોરોનાનું સંક્રમણ દિવસેને દિવસે વધી રહ્યું છે. ખાસ કરીને આજે નોંધાયેલા કેસ એ ગુજરાતના ઇતિહાસમાં પ્રથમ વખત છે. જેમાં અત્યાર સુધીના સૌથી વધુ કેસ નોંધાયેલા છે. 

સુરત અને અમદાવાદમાં કોરોનાનો હાહાકાર

સ્થાનિક સ્વરાજ્યની ચૂંટણી બાદ ફરી કોરોનાએ માથું ઉચક્યું છે. કોરોનાના કેસમાં સતત વધારો થતા ચિંતા વધી છે. સુરત શહેરમાં રાજ્યના સૌથી વધુ 480 કેસ અને ગ્રામ્યમાં 102 નવા કેસ નોંધાયા છે. જ્યારે અમદાવાદ શહેરમાં 506 નવા કેસ, જ્યારે અમદાવાદ ગ્રામ્યમાં 8 કેસ નોંધાયા છે. વડોદરા શહેરમાં 145 કેસ, જ્યારે ગ્રામ્યમાં 20 કેસ નોંધાયા. રાજકોટ શહેરમાં 130 કેસ અને ગ્રામ્યમાં 30 કેસ નોંધાયા છે. ત્યારે જાણો 24 કલાક દરમિયાન રાજ્યના તમામ જિલ્લામાં નોંધાયેલ કેસની વિગત...

ગુજરાતમાં મળ્યા કોરોનાના નવા વેરિયન્ટના 39 કેસ

રાજ્યમાં કોરોનાના કહેરની વચ્ચે ગુજરાત માટે ચિંતાજનક સમાચાર સામે આવ્યા છે. ગુજરાતમાં કોરોના વાયરસના નવા વેરિયન્ટના 39 કેસ આવ્યા છે. જીનોમ સિક્વિન્સીંગમાં ડબલ મ્યૂટેન્ટ વાયરસની હાજરી જોવા મળી છે. તો 18 રાજ્યોમાં કોરોનાના 71 નવા કોવિડ વેરિયન્ટ મળ્યા છે. પંજાબમાં 336 સેમ્પલમાં, તેલંગાણામાં 87 સેમ્પલમાં, દિલ્લીમાં 65 સેમ્પલમાં અને મહારાષ્ટ્રમાં 56 સેમ્પલમાં કોરોના વાયરસના નવા વેરિયન્ટ મળ્યા છે.