સુરતના પાંડેસરાના ભાજપના કોર્પોરેટર શરદ પાટીલની આચાર સંહિતાના ભંગ બદલ ધરપકડ કરવામાં આવી છે. શરદ પાટીલે મતદાન દરમિયાન બૂથ પરથી વીડિયો બનાવીને ભાજપને મત આપવાની અપીલ કરતા ચૂંટણી પંચે પાંડેસરા પોલીસ સ્ટેશનમાં ફરિયાદ નોંધાવી હતી.
સુરત ભાજપના કોર્પોરેટર શરદ પાટીલની ધરપકડ
મતદાન કર્યા બાદ શરદ પાટીલે બનાવ્યો હતો વીડિયો
વીડિયો વાયરલ થયા બાદ ચૂંટણી પંચ આવ્યું હતું હરકતમાં
સુરતના વોર્ડ નંબર 28 પાંડેસરાના ભાજપના કોર્પોરેટર શરદ પાટીલ વિરુદ્ધ આચાર સંહિતાના ભંગ બદલ આકરી કાર્યવાહી કરવામાં આવી છે. ચૂંટણી પંચની ફરિયાદના આધારે ભાજપના કોર્પોરેટરની ધરપકડ કરવામાં આવી છે.
મતદાન કર્યા બાદ શરદ પાટીલે બનાવ્યો હતો વીડિયો
આ અંગે વિગતવાર વાત કરીએ તો ગત 1લી ડિસેમ્બરના રોજ સૌરાષ્ટ્ર-કચ્છ અને દક્ષિણ ગુજરાતના 19 જિલ્લાની 89 બેઠકો પર મતદાન યોજાયું હતું. આ દરમિયાન સુરત શહેરના વોર્ડ નંબર 28 પાંડેસરાના ભાજપના કોર્પોરેટર શરદ પાટીલે મતદાન કર્યા બાદ એક વીડિયો બનાવ્યો હતો. શરદ પાટીલે મતદાન મથકથી વીડિયો બનાવીને કમળને મત આપવાની અપીલ કરી હતી. જે વીડિયો સોશિયલ મીડિયામાં વાયરલ થયો હતો.
વીડિયો વાયરલ થયા બાદ ચૂંટણીપંચ આવ્યું હતું હરકતમાં
આ વીડિયો ચૂંટણી પંચને ધ્યાને આવતા ચૂંટણી પંચ હરકતમાં આવ્યું હતું અને શરદ પાટીલ વિરુદ્ધ આચારસંહિતા ભંગની પાંડેસરા પોલીસ સ્ટેશન ફરિયાદ દાખલ કરવામાં આવી હતી. આ ફરિયાદના આધારે પાંડેસરાના ભાજપના કોર્પોરેટર શરદ પાટીલની ધરપકડ કરવામાં આવી છે.
પ્રથમ તબક્કાનું મતદાન પૂર્ણ
અત્રે ઉલ્લેખનીય છે કે, ગુજરાત વિધાનસભા ચૂંટણીમાં પ્રથમ તબક્કાનું મતદાન પૂર્ણ થયું છે જેમાં સવારે આઠ વાગ્યાથી સાંજે પાંચ વાગ્યા સુધીમાં 19 જિલ્લાની 89 બેઠકો પર અંદાજે સરેરાશ 60.35 ટકા મતદાન નોંધાયું છે. જેને લઇને આ બેઠક પરના 788 ઉમેદવારોનું ભાવી EVMમાં સીલ થઈ ચૂક્યું છે.