સુરત: બિલ્ડર શૈલેષ ભટ્ટ પાસેથી 12 કરોડના બિટકોઈન પડાવી લેવાના મામલે અમરેલીના SP જગદીશ પટેલની પણ ધરપકડ થઈ શકે છે. સૂત્રોના જણાવ્યા પ્રમાણે બિટકોઈન પડાવવાની યોજના SP જગદીશ પટેલે જ બનાવી હોવાનું CID ક્રાઈમને જાણવા મળ્યું છે.
જગદીશ પટેલે જ સુરતના વકીલ કેતન પટેલ સાથે મળીને બિટકોઈન પડાવવાનું કાવતરું ઘડ્યું હતું. કેતન પટેલ અને જગદીશ પટેલ ફોનથી સતત એક બીજાના સંપર્કમાં હોવાના પણ પુરાવા મળ્યા છે.
પરંતુ CID ક્રાઈમે ફોનની માગણી કરતા ફોન તોડી નાખ્યાનું જણાવ્યું હતું. જોકે પુરાવાનો નાશ કર્યો હોવાનો ગુનો નોંધીને CID ક્રાઈમે કાર્યવાહી હાથ ધરી છે.
CID ક્રાઈમને SP જગદીશ પટેલ વિરુદ્ધ કેટલાક પુરાવાઓ મળ્યા હોવાનું પણ જાણવા મળી રહ્યું છે. જેથી ટૂંક સમયમાં જ SP જગદીશ પટેલની ધરપકડ થઈ શકે છે.