સુરત: કરોડોના બિટકોઈન કૌભાંડ મામલે સીઆઈડી ક્રાઈમે તપાસ તેજ કરી છે. CID ક્રાઇમ દ્વારા 25 કરોડથી વધુની રોકડ જપ્ત કરાઈ છે અને ભાગેડું આરોપી નલીન કોટડિયાને 31 જુલાઈ સુધીમાં હાજર થવા આદેશ આપ્યો છે અને જો તેઓ હાજર નહીં થાય તો તેમની મિલકત જપ્ત કરવામાં આવશે.
અમરેલી સુરત ગાંધીનગર સ્થિત આવેલી કોટડિયાની મિલકતોની CIDએ માહિતી મેળવી હતી. નલિન કોટડિયા વિરુદ્ધ કલમ 83 મુજબ મિલકત વોરંટની કાર્યવાહી શરૂ કરાશે. આ ઉપરાંત શૈલેષ ભટ્ટ વિરુદ્ધ વધુ 4 છેતરપિંડીના કેસ સામે આવ્યા હતા. આ સિવાય શૈલેષે મુંબઈના વેપારી સાથે કરોડોની છેતરપિંડી કરી હોવાનો કેસ સામે આવ્યો હતો.
આપને જણાવી દઇએ કે બિટકોઈન તોડકાંડની તપાસમા નોટબંધી દરમ્યાન બ્લેક મનીને બીટ કોઈનમાં કન્વર્ટ કરવાના કૌભાંડનો પણ પર્દાફાશ થયો હતો. આ કૌભાંડમાં શૈલેષ ભટ્ટ માસ્ટર માઈન્ડ હોવાનું ખુલ્યુ છે. સુરતમાં તેની વિરૂધ્ધ અપહરણ અને બિટકોઈન પડાવવાનો કેસ નોંધાયા બાદ શૈલેષ ભટ્ટ ફરાર થઈ ગયો છે. ત્યારે તપાસ દરમ્યાન શૈલેષ ભટ્ટ વિરૂધ્ધ કૌભાંડના વધુ ચાર કેસો સામે આવ્યા.