રાજ્ય (Gujarat) માં વાહન ચોરી કે મોબાઇલ ચોરીની ફરિયાદ માટે સરકારે e-FIRની સુવિધા શરૂ કરી છે. જેમાં સુરત શહેર સૌથી અગ્રેસર રહ્યું છે.
રાજ્યમાં ઈ-FIR નોંધાવવામાં સુરત અગ્રેસર
1 મહિનામાં સુરતમાં નોંધાઈ 426 ઇ-ફરિયાદ
વાહન કે મોબાઈલ ચોરીની નોંધાય છે ફરિયાદ
ગુજરાત સરકારે તાજેતરમાં જ લોન્ચ કરેલી e-FIR ઓનલાઈન સેવાના કારણે રાજ્યના નાગરિકો હવેથી ઘરે બેઠા જ વાહન ચોરી કે મોબાઈલ ચોરીની ફરિયાદ નોંધાવી શકે છે. ત્યારે ગુજરાતમાં e-FIR નોંધાવવામાં સુરત શહેર અગ્રેસર રહ્યું છે.
રાજ્ય સરકારે 23 જુલાઈના રોજ e-FIR એપ્લિકેશન લોન્ચ કરી હતી
સુરતમાં માત્ર એક મહિનાના સમયગાળામાં જ 426 ઇ-ફરિયાદ નોંધાઇ છે. 426 પૈકી 33% કિસ્સામાં e-FIR નોંધાઈ છે. ઉલ્લેખનીય છે કે, રાજ્ય સરકારે 23 જુલાઈના રોજ e-FIR એપ્લિકેશન લોન્ચ કરી હતી. જેમાં ઓનલાઇન વાહન ચોરી કે મોબાઈલ ચોરીની ફરિયાદ નોંધાવી શકાય છે. આ એપ્લિકેશન દ્વારા પોલીસ અધિકારીને 48 કલાકમાં તેનો રિપોર્ટ આપવાનો હોય છે. ઉલ્લેખનીય છે કે રાજયના અન્ય શહેરોની સરખામણીમાં મહત્તમ ફરિયાદ સુરતમાં નોંધાય છે. જયારે અન્ય શહેર-જિલ્લામાં માંડ હજી 100થી વધુ ફરિયાદ જ નોંધાય છે.
ગુજરાત સરકારે રાજ્યના નાગરિકોની સલામતી અને સુરક્ષા માટે ટેક્નોલોજી અત્યંત સક્ષમ બને તે આશયથી રાજ્યમાં પોલીસની કામગીરીને ઓનલાઈન કરવા e-FIRની સુવિધા શરૂ કરી છે. જેમાં નાગરિક ઓનલાઇન FIR કરી શકે છે. જેના 48 કલાક બાદ પોલીસ સ્ટેશનના PI ફરિયાદીનો સંપર્ક સાધે છે અને બાદમાં જે-તે મામલે તપાસ શરૂ કરવામાં આવે છે.
જુઓ e-FIR કેવી રીતે કામ કરે છે?
e-FIR માટે સિટીઝન પોર્ટલ પર રજિસ્ટર કરવું અથવા સિટીઝન ફર્સ્ટ એપ ડાઉનલોડ કરવી.
FIR માટે ફરિયાદનું પેજ ઓપન કરી જે-તે વિસ્તારની ફરિયાદ નોંધાવવી હોય તે પોલીસ સ્ટેશનને સિલેક્ટ કરો.
પોલીસ સ્ટેશન સિલેક્ટ કર્યા બાદ ફરિયાદ લખવાની રહેશે.
ઓનલાઇન ફરિયાદ લખ્યા બાદ ફરિયાદની પ્રિન્ટ કાઢવી અને તેની પર સહી કરીને તેને ફરીથી અપલોડ કરવાની રહેશે.
ફરિયાદ અપલોડ કર્યા બાદ ફરિયાદીને SMS અથવા તો e-mailથી જાણ કરવામાં આવશે.
પોલીસને અરજી મળ્યા બાદ પોલીસ ફરિયાદીનો 48 કલાકમાં સંપર્ક કરશે.