સુરક્ષા / સુરતમાં આ થઈ શકે તો અમદાવાદમાં કેમ નહીં?

• અમદાવાદમાં શટલ રિક્ષામાં ચોરી કરતી 24થી વધુ ગેંગ
• 120થી વધુ મહિલાઓ અને યુવનો છે સામેલ
• અમદાવાદમાં અંદાજિત 1.20 લાખ રિક્ષાઓ

અમદાવાદની કોઇ પણ રિક્ષામાં બેસતા પેસેન્જરો પાસે રિક્ષાચાલકોની વિગતો હોતી નથી. આ મામલે સુરત પોલીસે તમામ રિક્ષાચાલકોની વિગતો રિક્ષામાં ફરજિયાત લગાવવાનો હુકમ કરતાં સુરત અમદાવાદ કરતાં આગળ નીકળી ગયું છે. રિક્ષામાં થતી ગુનાખોરીને રોકવા માટે સુરત પોલીસે ઓનરબોર્ડ લગાવવા માટે કરેલા હુકમનો કડકાઇથી અમલ પણ થઇ રહ્યો છે ત્યારે અમદાવાદ પોલીસને આ પ્રકારની કામગીરી કરવાનો વિચાર પણ આવ્યો નથી. 

રિક્ષા ચાલકોની ગેંગ
અમદાવાદ પોલીસ આ પ્રકારની પહેલ કરે તો રિક્ષામાં થતી ગુનાખોરી રોકી શકાય છે. શહેરમાં શટલ રિક્ષામાં બેસો તે પહેલાં દસ વાર વિચાર કરવો પડે છે કે રિક્ષાચાલક કોઇ લૂંટારુ ટોળકી સાથે નથી સંકળાયેલો કે પછી બાજુમાં બેઠેલો પેસેન્જર કોઇ ચોર તો નથી ને...શહેરમાં ટ્રાફિકની સમસ્યા દિવસેને દિવસે વધી રહી છે તેમાં પણ રિક્ષા એટલી બધી વધારે છે કે દરેક જંકશન પર અન્ય વાહનો કરતાં રિક્ષાનું પ્રમાણ વધુ જોવા મળે છે. પેસેન્જર જ્યારે કોઇપણ રિક્ષામાં બેસે છે ત્યારે તે રિક્ષાચાલકનું નામ શું છે અને તે ક્યાંનો રહેવાસી છે તેની જાણ હોતી નથી. રિક્ષાચાલક પર વિશ્વાસ કરીને પેસેન્જર રિક્ષામાં બેસી જતો હોય છે. 

શટલ રિક્ષામાં ચોરી કરતી 24થી વધુ ગેંગ
શટલ રિક્ષામાં પેસેન્જર બેસે છે તો તેમાં કેટલાક પેસેન્જરોના કિમતી સરસમાનની ચોરી થતી હોય છે. પેસેન્જરના સરસમાનની ચોરી કરનાર રિક્ષામાં પેસેન્જરના સ્વાંગમાં બેઠેલો ગઠિયો હોય છે. જે રિક્ષાચાલકનો સાગરીત હોય છે. આ સિવાય એકલદોકલ પેસેન્જરોને છરીની અણીએ રિક્ષાચાલક અને તેના સાગરીતો લૂંટી લેતા હોય છે. આવી ઘટનાઓ પોલીસ માટે માથાના દુખાવા સમાન બની ગઇ છે. ક્રાઇમબ્રાંચની ટીમે શટલ રીક્ષામાં ચોરી કરતી 24 કરતા વઘુ ગેંગનું  લિસ્ટ બનાવ્યું છે. જેમાં 120 કરતાં વધુ મહિલાઓ અને યુવકો છે. 

સુરત ઓનર બોર્ડ ફરજિયાત
કોઇ પણ રિક્ષામાં બેઠેલો પેસેન્જર ચોરી કે લૂંટનો ભોગ બને છે ત્યારે પોલીસ તેને પકડવામાં સફળ થતી નથી. સુરતમાં રિક્ષામાં ચોરી અને લૂંટના કિસ્સાઓ સાવ નહીવત થઇ ગયા છે જેનું કારણ એકજ છેકે સુરત પોલીસે તમામ રિક્ષાઓમાં ઓનર બોર્ડ લગાવવાનો હુકમ કર્યો છે. ઓનર બોર્ડ એટલે રિક્ષાચાલકનું નામ, એડ્રેસ, બક્કલનંબર સહિત પોલીસ સ્ટેશન, ફાયરબ્રિગેડ અને એમ્બ્યૂલન્સની તમામ માહિતી પેસેન્જર જોઇ શકે તેવી રીતે લગાવવું. સુરતની તમામ રિક્ષામાં ચાલકની પાછળ ઓનર બોર્ડ લગાવેલું છે જેમાં પેસેન્જરને ખબર હોય કે તે કઈ વ્યકિતની રિક્ષામાં મુસાફરી કરી રહ્યો છે.

અમદાવાદમાં 1.20 લાખ રિક્ષા ફરે છે
સુરત પોલીસના હુકમ બાદ તમામ રિક્ષાચાલકો તેનો કડકાઇથી અમલ કરી રહ્યા છે. જેના કારણે ચોરી, લૂંટની ઘટનામાં ઘટાડો થયો છે. સુરત પોલીસની કામગીરી બીરદાવા લાયક છે ત્યારે અમદાવાદ પોલીસને ઓનરબોર્ડની જાણ જ નથી. શહેરમાં 1.20 લાખ રિક્ષા ફરે છે. જેમાં એક ઓનરબોર્ડ લગાવેલું નથી. પેસેન્જર કોની રિક્ષામાં બેઠો છે તેની જાણ પણ તેને હોતી નથી. આ મામલે ટ્રાફિક ડીસીપી તેજસ પટેલે જણાવ્યુ છેકે શહેરની કોઇપણ રિક્ષામાં ઓનર બોર્ડ નથી અને તેમને લગાવવા માટેનો હુકમ પણ કરવામાં આવ્યો નથી.