જુનિયર ક્લાર્કની પરીક્ષાનું પેપર ફૂટી ગયું હોવાના કારણે પરીક્ષા મોકૂફ રાખવામાં આવી હતી. જુનિયર ક્લાર્ક પરીક્ષા પેપરલીક મામલે સુરતનું પણ કનેક્શન સામે આવ્યું છે.વડોદરામાંથી પકડાયેલા આરોપીઓમાંથી એક સુરતનો રહેવાસી હોવાનું પણ ખુલ્યુ છે.
સુરતનુ પણ પેપરલીક કનેક્શન!
સુરતનુ પણ પેપરલીક કનેક્શન નીકળ્યું છે. વડોદરામાંથી પકડાયેલ 2 શખ્સોમાંથી 1 સુરતનો રહેવાસી હોવાનું ખુલ્યું છે. સુરતના ઇચ્છાપોર ગામમાં આવેલી ગાયત્રી સોસાયટીમાં નરેશ મોહંતી રહે છે.નરેશ મોહંતી છેલ્લા ત્રણ દિવસથી ઘરે આવ્યો નથી અને ત્રણ દિવસ પહેલા ફેમેલીને કોઈ કામ અર્થે જવ છુ કહીને નીકળ્યો હતો. નરેશ હજીરાની એક ખાનગી કંપનીમાં કોન્ટ્રાકટર પર કામ કરે છે.
આરોપીઓનું મેડિકલ ચેકઅપ
જુનિયર ક્લાર્ક પરીક્ષા પેપર લીક થવાનો મામલે ગુજરાત ATSએ આરોપીઓને મેડિકલ ચેકઅપ માટે લઈ ગઈ છે. 15 આરોપીઓને મેડિકલ માટે લઈ જવાયા છે, જે તમામ આરોપીઓનું સિવિલ હોસ્પિટલમાં મેડિકલ ચેકઅપ થશે.
આરોપીઓના નામ
પ્રદીપ કુમાર નાયક,ઓડીસા
મુરારી કુમાર પાસવાન વેસ્ટ બંગાલ,
કમલેશ કુમાર ચૌધરી,બિહાર
મોહમદ ફિરોજ, બિહાર
સવેશકુમાર સિંગ,બિહાર
મિન્ટુ રાય, બિહાર
મુકેશકુમાર,બિહાર
પ્રભાતકુમાર ,બિહાર
અનિકેત ભટ્ટ,બરોડા
ભાસ્કર ચૌધરી,બરોડા
કેતન બારોટ,અમદાવાદ
રાજ બારોટ, બરોડા
પ્રણય શર્મા,અમદાવાદ
હાર્દિક શર્મા,સાબરકાંઠા
નરેશ મોહંતી,સુરત
હૈદરાબાદની પ્રિન્ટીંગ પ્રેસમાંથી પેપર લીક થયુંઃગુજરાત ATS
ગુજરાત ATS જણાવ્યું કે, હૈદરાબાદના પ્રિન્ટીંગ પ્રેસમાંથી પેપરલીક થયું હતું તેમજ મુખ્ય આરોપી પ્રદીપ નાયક પેપર લઈ વડોદરા આવ્યો હતો તેમણે કહ્યું કે, અન્ય એક આરોપી કેતન બારોટ અમદાવાદનો વતની હતો. ગુજરાત ATSને ગઈકાલે પેપરલીક અંગે માહિતી મળી હતી. ATS જણાવ્યું કે, 4 દિવસથી ગુજરાત ATS ઈનપુટ એકત્રિત કરી રહ્યું હતું અને ગુજરાતના વિવિધ શહેરમાં ATSની ટીમો કાર્યરત હતી. કેતન અને ભાસ્કર નામના 2 આરોપીની 2019માં ધરપકડ કરવામાં આવી હતી. CBIએ 2019માં બન્ને આરોપીની ધરપકડ કરી હતી. પેપરલીક મામલે વડોદરાના સ્ટેકવાઈઝ ટેક્નોલોજી કોચિંગ ક્લાસને સીલ કરાયો છે. સ્ટેકવાઈઝ ટેક્નોલોજી કોચિંગ ક્લાસીસમાંથી આરોપીને ATSએ ઝડપી પાડ્યો છે.
'આગામી 100 દિવસની અંદર ફરીથી જુનિયર ક્લાર્કની પરીક્ષા યોજાશે'
પંચાયત સેવા પસંદગી મંડળના ચેરમેન સંદીપ કુમારે જણાવ્યું કે, પોલીસ તંત્ર દ્વારા વોચ રાખવામાં આવી હતી અને કેટલાક આરોપીઓને ઝડપી પાડવામાં આવ્યા છે, મહેનતું ઉમેદવારોને નુકસાન ન થાય તે માટે પરીક્ષા રદ કરવામાં આવી છે. તેમણે જણાવ્યું કે, આગામી 100 દિવસની અંદર ફરીથી જુનિયર ક્લાર્કની પરીક્ષા યોજાશે. હવે જે પરીક્ષા લેવામાં આવશે તેમાં કૉલલેટરના આધારે ફ્રીમાં બસ સેવા કરી શકશે ઉમેદવારો તેમ પણ જણાવ્યું છે.