સુરતમાં ઉધારમાં માલ ખરીદી કુલ રૂપિયા 21 કરોડ જેટલી અધધ રકમની છેતરપિંડી કેસમાં સંડોવાયેલ વધુ એક આરોપીને ભાવનગરથી દબોચી લેવામાં આવ્યો છે.
સુરતમાં 21 કરોડના ઉઠમણાનો કેસ
વધુ એક આરોપી રવિરાજ ઝડપાયો
આરોપી દુબઈમાં વેચતો હતો શાકભાજી
સુરત શહેરને કાપડ ઉદ્યોગના હબ ગણવામાં આવે છે. ત્યારે સુરત શહેરમાં કાપડ માર્કેટમાં ઉઠમણાના કિસ્સાઓ પણ અવારનવાર સામે આવતા હોય છે. આવો જ એક કિસ્સો મે મહિનામાં સુરતની ગ્લોબલ ટેક્સ્ટાઇલ માર્કેટમાં બન્યો હતો. રિપોર્ટ મુજબ સુરતના સહારા દરવાજા ખાતે ભેજાબાજ આરોપીઑએ ગ્લોબલ ટેક્સટાઇલ માર્કેટમાં ADS કલ્ચર અને RNC એન્ટરપ્રાઈઝના નામથી ભાગીદારી પેઢી બનાવી હતી. ત્યારબાદ વેપારીઓ પાસેથી કાપડનો કરોડો રૂપિયાનો માલ ઉધારમાં ખરીદીને કુલ 10 જેટલા ભાગીદારોએ 21 કરોડનું ફુલેકૂ ફેરવ્યું હતું. માલના નાણા ચૂકવવા સમયે હાથ ઊંચા કરી દઈ દુકાન બંધ કરીને નાસી ગયા હતા.
રવિરાજ દુબઈથી ભારત આવતા જ પોલીસે પકડી લીધો
આરોપીઑએ મોટી માત્રામાં ગ્રે કાપડનો માલ મંગાવીને પોતાના નામે બતાવી કાપડ માર્કેટમાં ઓછા ભાવે વેચી દેતા હતા અને વિવર્સને રૂપિયા ચૂકવતા ન હતા. આ સમગ્ર કૌભાંડનો મુખ્ય આરોપી અનસ મોટીયાણી છે જે હાલ દુબઈમાં છે. જ્યારે અન્ય ભાગીદારો પૈકી અજીમ પેન વાલા, દીક્ષિત મિયાણી, જનક છાંટબાર, જીતેન્દ્ર માંગુકિયા, મહાવીર તાપડીયા અને જીતેન્દ્ર પુરોહિતની આ કેસમાં સુરત પોલીસ અગાઉ ધરપકડ કરી ચૂકી છે. જ્યારે આ કેસનો વધુ એક આરોપી રવિરાજસિંહ ગોહિલ જે પણ અનસ મોટીયાણી સાથે દુબઈ ભાગી ગયો હતો તે ભારત પરત આવતા તેની બાતમીના આધારે સુરતની ઇકો સેલે ધરપકડ કરી છે.
આત્યાર સુધીમાં 4. 73 કરોડ રૂપિયાનો મુદ્દામાલ રિકવર
આરોપી રવિરાજસિંહ ગોહિલ દુબઈ ખાતે આવેલ અલઅવિર શાક માર્કેટમાં શાકભાજીનો ધંધો શરૂ કર્યો હતો. જો કે બંને પૈકી રવિરાજસિંહના વિઝા પુરા થવાના હોવાથી તે ભારત પરત આવી ગયો હતો. ભારત આવ્યા બાદ તે રાજ્યના અલગ અલગ મંદિરોમાં રોકાયો હતો. ત્યારબાદ પોતાના ગામ વાવ ખાતે ખેતરોમાં તેમજ ઘરે સંતાઈને રહેતો હતો. જે અંગેની બાતમી સુરત ઇકો સેલની ટીમને મળતા તેને તેના મૂળ ગામ ભાવનગરના વાવ ખાતેથી ઝડપી પાડવામાં આવ્યો હતો. આ કેસમાં અગાઉ ઝડપાયેલા આરોપી પાસેથી સુરત પોલીસે 4. 73 કરોડ રૂપિયાનો મુદ્દામાલ રિકવર કર્યો હતો. હવે રવિરાજસિંહ ગોહિલ પાસેથી મુદામાલ કવર કરવા કવાયત હાથ ધરાશે.
હજુ ત્રણ આરોપીઓ પોલીસ પકડથી દૂર
સુરત શહેરના કુલ 100 થી વધુ વિવર્સ સાથે છેતરપિંડી કરવાના ગુનામાં રવિરાજસિંહ સહિત પોલીસે કુલ સાત આરોપીઓની ધરપકડ કરી છે જ્યારે હજુ ત્રણ આરોપીઓ પોલીસ પકડથી દૂર છે જેમાંનો મુખ્ય આરોપી અનસ મોતીયાણી દુબઈમાં બેઠો હોવાથી પોલીસ દ્વારા તેને પકડવાની પણ તજવીજ હાથ ધરવામાં આવી છે.