ડોક્ટર કે જેના ભરોસે લાખો જિંદગીઓ હોય છે. હા અમૂલ્ય જિંદગીઓ પરંતુ આજકાલ કેટલાક ડોક્ટરોને દર્દીની જિંદગી નહીં તેનું પોકેટ અમૂલ્ય લાગે છે અને એટલે જ પૈસા ખંખેરવાની ઉતાવળમાં કેટલાક ડોક્ટર મનઘડત રિપોર્ટ બનાવી દર્દીઓના ખિસ્સા ખાલી કરે છે.
ઉલ્લેખનીય છે કે સુરત સિવિલ હોસ્પિટલ છેલ્લા કેટલા દિવસોથી સમયાંતરે વિવાદમાં આવતી રહે છે. થોડા દિવસો પહેલા પથરીના દર્દીના પેટમાં નળી ભૂલી જવાનો મામલો સામે આવ્યો હતો. ત્યારબાદ આજે નિકિતા સિંગ નામની બાળકીની ભૂલભરેલી બાયોપ્સી કરવાનો મામલો સામે આવ્યો છે.
બાળકીને 2 મહિનાથી પેટમાં દુખાવો થતો હતો. જેની સુરત સિવિલ હોસ્પિટલમાં તપાસ કરવામાં આવી. તપાસબાદ બાળકીનું ઓપરેશન કરી એના ટીસ્યુ લેવામાં આવ્યા. જેનો બાયોપ્સિ રિપોર્ટ અમદાવાદ કે મુંબઈમાં જ થઈ શકે તેમ ડોક્ટરોએ કહ્યું હતું.
પરંતું દર્દીના ખિસ્સા જલદી ખાલી કરવાની ઉતાવળમાં સિવિલ હોસ્પિટના ડોક્ટરે સુરતની સ્થાનિક પેથોલોજીમાં જ કરાવી લીધો અને તેના પર MRD લખીને જાણે આ રિપોર્ટ મુંબઈમાં થયો હોય તેવી રીતે રિપોર્ટને કોમ્પ્યુટરાઈઝ કરવામાં આવ્યો.
આ રિપોર્ટ નિકિતાના પિતા સંદીપ સિંગે અન્ય ડોક્ટરને બતાવ્યો તો તેમણે કહ્યું કે આ રિપોર્ટનું કોઈ મહત્વ નથી. આ પ્રકારનો રિપોર્ટ માત્ર મુબઈ કે અમદાવાદમાં જ થઈ શકે. બાળકીની તપાસમાં ડોક્ટરોની ઉતાવળ અને બેદરકારીના કારણે નિકિતા પિતા પરેશાન થઈ ગયા છે.
તેમણે બાળકીના ટિસ્યુનો રિપોર્ટ કોઈ સુવિધા ન હોવા છતાં સુરતમાં જ કરી દેવામાં આવતાં. તેમણે સિવિલ ઉપર આરોપ લગાવ્યો છે કે સિવિલની બેદરકારીને કારણે હવે ટિસ્યુ લેવા માટે ફરી વખત ઓપરેશન કરવું પડશે.
આપને જણાવી દઇએ કે સુરત સિવિલ હોસ્પિટલની બેદરકારી સામે આવી છે.ત્યારે આ સમગ્ર મામલો સિવિલ સુપ્રિન્ટેન્ડન્ટ પાસે પહોંચ્યો હતો. આ મામલો ત્યાં પહોંચતાની સાથે તેમના દ્વારા સૂફિયાણી વાતો શરૂ કરી દેવામાં આવી હતી.
તેમણે આ મામલે રિપોર્ટ કરનાર ટીસ્યુ લેનાર અને બાયોપ્સી કરનાર ડિપાર્ટમેન્ટની ભૂલ સ્વીકારી હતી. ટયુબરક્યુલોસિસ સારવાર આપવાની વાત કરી હતી. તેમણે સમગ્ર મામલે તપાસ કરવાની હૈયાધરપત આપી પરંતુ શું પગલાં લેવામાં આવશે તેની કોઈ માહિતી આપી ન હતી.
દર્દી પાસેથી જલદી પૈસા વસૂલવાની ઉતાવળમાં ડોક્ટરો કેવી ગંભીર ભૂલ કરી બેસે છે તેનો તો આ માત્ર એક પુરાવો છે. આવા તો સંખ્યાબંધ ડોક્ટરો રોજેરોજ હજારો લોકોના આરોગ્ય સાથે ગંભીર ચેડા કરતા હોય છે.ડોક્ટરોએ દર્દીના ખિસ્સા પરથી ધ્યાન હટાવી દર્દીના દર્દ તરફ પણ ધ્યાન કરવાની જરૂર છે.