સુરતના ઉધનામાં આવેલ ભાઠા વિસ્તારમાંથી પોલીસે 2000ના દરની 127 નકલી નોટ સાથે બે યુવાનોને ઝડપી પાડ્યા છે. આ બન્ને આરોપી ભાવનગરના વતની છે તેવો ડુપ્લિકેટ નોટ ભાવનગરથી સુરતમાં વટાવવા આવ્યા હતા. પોલીસને મળેલી બાતમીના આધારે પોલીસની એક ટીમે ભાઠેમાં વોચ ગોઠવી રાખી હતી.
આ દરમિયાન પોલીસને ગુંદી કોડિયા ભાવનગર ગામના વતની બિપિન ભગા પરમાર અને કિસન ભીખા સોલંકી પર શંકા થતા તેમની તપાસ કરવામાં આવી હતી. આ દરમિયાન 2 હજાર રૂપિયાની 127 નોટો મળી આવી હતી.
પોલીસે બન્ને આરોપી પાસેથી પૂછપરછ કરતાં જાણવા મળ્યું કે બન્ને પૈસાની જરૂરિયાત હોવાથી ભાવનગરના વિપુલ પરમાર પાસેથી બોગસ ચલણી નોટ લીધી હતી. બિપીન અને તેનો ડ્રાઈવર મિત્ર કિશન ઉધના વિસ્તારમાં પહેલી નજરમાં સરળતાથી કોઈ ઓળખી ન શકે તેવી ડુપ્લીકેટ નોટ વટાવી રોકડી કરવા માંગતા હતા.
પોલીસે બન્ને આરોપીઓની ધરપકડ કરી છે. જ્યારે વિપુલ પરમારને વોન્ટેડ જાહેર કરવામાં આવ્યો છે. આ મામલે ક્રાઈમબ્રાંચ દ્વારા આગળની તપાસ શરૂ કરવામાં આવી છે.