સુપ્રીમ કોર્ટે રાજસ્થાનની સ્વનિર્ભર સીબીએસઈ શાળાઓને 1 માર્ચ 2021 થી છ માસિક હપ્તામાં 100 ટકા ફી વસૂલવાની મંજૂરી આપી દીધી છે.
રાજસ્થાનના લાખો વાલીઓને સુપ્રીમ કોર્ટ તરફથી એક મોટો ઝટકો લાગ્યો
ખાનગી શાળાઓ ફી ન ભરી શકનાર વિદ્યાર્થીઓને કાઢી નહીં શકે
શાળાઓ વિદ્યાર્થીઓને ધોરણ 10 અને 12 ની પરીક્ષામાં બેસતા પણ નહીં રોકી શકે.
રાજસ્થાનના લાખો વાલીઓને સુપ્રીમ કોર્ટ તરફથી એક મોટો ઝટકો લાગ્યો છે. ખાનગી સ્વનિર્ભર સીબીએસઈ શાળાઓને 70 ટકા ટ્યુશન ફી વસૂલવાની મંજૂરીના રાજસ્થાન હાઈકોર્ટના ચુકાદા પર સ્ટે મૂકતા સુપ્રીમ કોર્ટે ખાનગી સ્વનિર્ભર સીબીએસઈ શાળાઓને 1 માર્ચ 2021 થી છ માસિક હપ્તામાં 100 ટકા ફી વસૂલવાની મંજૂરી આપી દીધી છે.
ફી ન ચૂકવી શકનાર વિદ્યાર્થીઓને ખાનગી શાળાઓ કાઢી નહીં શકે
ખાનગી શાળાઓને 100 ટકા ફી વસૂલવાની મંજૂરી આપવાની સાથે સુપ્રીમ કોર્ટે એક શરત પણ મૂકી છે. સુપ્રીમની શરત અનુસાર, 100 ટકા ફી ન ચૂકવી શકનાર વિદ્યાર્થીઓને ખાનગી શાળાઓ કાઢી નહીં મૂકી શકે અથવા તો વિદ્યાર્થીઓનું પરીક્ષાનું પરિણામ પણ રોકી નહીં શકે.
સુપ્રીમની જસ્ટિસ એએમ ખાનવિલકર અને જસ્ટિસ દિનેશ મહેશ્વરીની ખંડપીઠે જણાવ્યું કે ખાનગી શાળાઓ ફી ન ચૂકવી શકનાર વિદ્યાર્થીઓને ધોરણ 10 અને 12 ની પરીક્ષામાં બેસતા નહીં અટકાવી શકે. જોકે વાલીઓએ પછીથી શાળાની ફી ચૂકવી આપવાની એક બાંયધરી આપવી પડશે.
આ એક વચગાળાની ગોઠવણી, અંતિમ આદેશને અધીન રહેશે.
સુપ્રીમની આ ખંડપીઠે સાથે ચોખવટ પણ કરી છે કે આ એક વચગાળાની ગોઠવણી છે જે આ કેસની સુનાવણી બાદ અપાનાર અંતિમ આદેશને અધીન રહેશે. ખંડપીઠે એવું પણ જણાવ્યું કે આ છ હપ્તા ઉપરાંત, વિદ્યાર્થીઓએ 2021-22 ના શૈક્ષણિક વર્ષની ફી પણ અલગથી ચૂકવી આપવી પડશે.
રાજસ્થાન હાઈકોર્ટના ચુકાદા પર સ્ટે
ભારતીય વિદ્યા ભવન, એસએમએસ અને બીજી શાળાઓની અપીલ પર ચુકાદો આપતા સુપ્રીમ કોર્ટે રાજસ્થાન હાઈકોર્ટના ચુકાદા પર સ્ટે મૂક્યો છે. સુપ્રીમે રાજસ્થાન સરકારને એક મહિનાની અંદર બિન-સહાયતા પ્રાપ્ત ખાનગી શાળાઓને બાકી રકમની ચુકવણી કરવાનો આદેશ આપ્યો છે.