સુપ્રીમ કોર્ટે ટેલિકોમ કંપનીઓના રેવન્યુની વ્યાખ્યામાં સરકારની તરફેણ કરતા જુલાઈ થી સપ્ટેમ્બર ક્વાર્ટરમાં ભારતી એરટેલે 23,045 કરોડ અને વોડાફોને અધધ 50,922 કરોડની ખોટ નોંધાવતા હોબાળો મચી જવા પામ્યો છે.
ભારતની ટેલિકોમ કંપનીઓ એરટેલ અને વોડાફોન પહેલેથી જ Jio સાથે ગળાકાપ સ્પર્ધામાં છે. હવે સુપ્રીમ કોર્ટે 14 વર્ષ જુના ટેલિકોમ મંત્રાલય અને ટેલિકોમ કંપનીઓ વચ્ચેના વિવાદમાં સરકારની તરફેણમાં ચુકાદો આપ્યો હતો. કોર્ટે બાકીની રકમ કેટલી છે તેની ગણતરી જાતે જ કરીને સરકારને ભરી દેવાની તાકીદ કરી છે.
નોંધનીય છે કે આ દંડથી ટેલિકોમ કંપનીઓને કુલ 92,000 કરોડનો ફટકો પડ્યો છે. આ કંપનીઓ પહેલેથી જ ઘટતા ટેરિફ ભાવો અને વધતા દેવા સાથે સાથે આર્થિક મંદીના કારણે પણ પરેશાન છે. આવા સમયે આ ચુકાદો તેમના માટે પડ્યા પર પાટુ સમાન છે.
સુપ્રીમ કોર્ટે જણાવ્યું છે કે ટેલિકોમ કંપની દ્વારા સૂચવાયેલી adjusted gross revenueની વ્યાખ્યા સ્વીકારી શકાય તેમ નથી. વોડાફોન માટે આ કપરા સમાચાર છે કારણ કે ગયા ક્વાર્ટરમાં તેમણે 4000 કરોડનું નુકશાન કર્યું હતું જયારે હવે તેમનું નુકશાન 51000 કરોડ છે. તેમની કુલ ખોટ તેમના ક્વાર્ટરના રેવન્યુ કરતા આશરે 5 ગણી છે. તેમનો રેવન્યુ સપ્ટેમ્બર ક્વાર્ટરમાં 10,844 કરોડનો હતો.
બીજી બાજુ એરટેલ માટે પણ આ એટલા જ માઠા સમાચાર છે. ગયા ક્વાર્ટરના એરટેલ 118 કરોડના નફામાં હતી જયારે હવે તે આશરે 24000 કરોડના નુકશાનમાં પટકાઈ છે.