ઉમેદવારોને રાહત / સરકારી ભરતીના નિયમો અધવચ્ચેથી બદલી શકાતા નથી- સુપ્રીમ કોર્ટનો મોટો ચુકાદો

સરકારી ભરતીને લઈને સુપ્રીમ કોર્ટે એક મહત્વનો ચુકાદો સંભળાવ્યો છે. સુપ્રીમ કોર્ટે ગુરુવારે કહ્યું કે સરકારી નોકરીઓમાં ભરતીના નિયમોને અધવચ્ચેથી બદલી શકાતા નથી. ચીફ જસ્ટિસ ડીવાય ચંદ્રચુડની આગેવાની હેઠળની પાંચ જજોની ખંડપીઠે કહ્યું કે ભરતી પ્રક્રિયા શરૂ થતાં પહેલા જે નિયમો ઘડવામાં આવ્યા છે તેની સાથે છેડછાડ કરી શકાય નહીં તે ઉપરાંત પસંદગીના નિયમો પણ મનમાન્યા ન હોવા જોઈએ.

રાજસ્થાન હાઈકોર્ટના કેસમાં સુપ્રીમ કોર્ટનો ચુકાદો

બંધારણીય બેંચે તેજ પ્રકાશ પાઠક વિરુદ્ધ રાજસ્થાન હાઈકોર્ટના કેસમાં પોતાનો ચુકાદો આપતા કહ્યું કે ઉમેદવારોને આશ્ચર્યચકિત કરવા માટે નિયમોમાં ફેરફાર કરી શકાય નહીં. કોર્ટે કહ્યું કે પસંદગીની યાદીમાં સ્થાન મેળવ્યા પછી, ઉક્ત પદ માટેના ઉમેદવારને નિમણૂકનો અધિકાર મળતો નથી, પરંતુ સરકાર સાચા કારણોસર ખાલી જગ્યાઓ ન ભરવાનું પસંદ કરી શકે છે. જો કે, જો ત્યાં ખાલી જગ્યાઓ હોય, તો સરકાર પસંદગીની યાદીમાં વિચારણા હેઠળના વિસ્તારમાંથી કોઈપણ વ્યક્તિને નિયુક્ત કરવાનો મનસ્વી રીતે ઈન્કાર કરી શકતી નથી.

વધુ વાંચો : મોટા થયાં પછી પણ બાળલગ્નને રદ કરાવી શકાય છે- હાઈકોર્ટનો મોટો ચુકાદો

શું હતો મામલો

આ મામલો રાજસ્થાન હાઈકોર્ટમાં 13 અનુવાદકોની ભરતી સાથે સંબંધિત છે. આ ભરતીમાં રાજ્ય સરકારે ભરતીના નિયમો અધવચ્ચે જ બદલી નાખ્યા હતા. 75 ટકા માર્કસ મેળવવાનો નિયમ ભરતીની મધ્યમાં લાગુ કરવામાં આવ્યો હતો. આ સુધારેલા માપદંડને લાગુ કરીને, 3 ઉમેદવારોની પસંદગી કરવામાં આવી હતી અને બાકીના ઉમેદવારોને નાપાસ જાહેર કરાયાં હતા. આ નાપાસ ઉમેદવારોએ રિઝલ્ટને હાઈકોર્ટમાં પડકાર્યાં હતા જોકે તેમની અરજી ફગાવી દેવાઈ હતી અને આથી રાજસ્થાન હાઈકોર્ટના નિર્ણય સામે ઉમેદવારો સુપ્રીમ કોર્ટમાં ગયાં હતા.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ