ચૂંટણી બોન્ડ / રાજકીય પાર્ટીને જે ફંડ મળે છે તે ક્યાંથી આવે છે તે ચકાસવાની કોઈ સિસ્ટમ છે? SCએ પૂછ્યો સવાલ

• એનજીઓ એડીઆરે સુપ્રીમમાં કરી જનહિતની અરજી
• નવા ચૂંટણી બોન્ડના વેચાણ પર પ્રતિબંધની માગ
• 5 રાજ્યોમાં યોજાઈ રહી છે વિધાનસભાની ચૂંટણી

ચીફ જસ્ટિસ ઓફ ઈન્ડીયા એસએ બોબડેની આગેવાની વાળી ત્રણ સભ્યોની ખંડપીઠે ચૂંટણી બોન્ડ્સના સંભવિત દુરપયોગ પર ગંભીર ચિંતા વ્યક્ત કરીને કેન્દ્ર સરકારને તેની તપાસ કરવાનું જણાવ્યું છે. 

સુપ્રીમની ખંડપીઠે એવો સવાલ દાગ્યો કે ધારો કે જો કોઈ રાજકીય પક્ષને 100 કરોડના ચૂંટણી બોન્ડ મળ છે અને ગેરકાયદેસર ગતિવિધિઓ કે રાજકીય એજન્ડા સિવાયના કામો માટે આ બોન્ડનો ઉપયોગ માલૂમ પડે તો તેને અટકાવવા માટેની કોઈ સિસ્ટમ છે ખરી ? કેન્દ્ર સરકારના વકીલ એટર્ની જનરલ કેકે વેણુગોપાલે જણાવ્યું કે 2018 માં ચૂંટણી બોન્ડની યોજના શરુ કરાઈ હતી ત્યારથી ચૂંટણી ફંડમાં કાળા નાણાનો ઉપયોગ પર અંકૂશ આવ્યો છે. તેમણે કહ્યું કે ફક્ત ચેક કે ડીડી દ્વારા જ ચૂંટણી બોન્ડ ખરીદી શકાય છે.

નવા ચૂંટણી બોન્ડના વેચાણ પર પ્રતિબંધની એડીઆરની માગ 

એનજીઓ એસોશિએશન ફોર ડેમોક્રેટિક રિફોર્મ્સ (એડીઆર) એ સુપ્રીમ કોર્ટમાં અરજી કરીને 1 એપ્રિલથી નવા ચૂંટણી બોન્ડના વેચાણ પર પ્રતિબંધ મૂકવાની માગ કરી છે. ચૂંટણી બોન્ડ સ્કીમ 2018 ને પડકારતી ત્રણ પેન્ડીંગ અરજીનો નિકાલ ન આવે ત્યાં સુધી નવા ચૂંટણી બોન્ડના વેચાણ પર પ્રતિબંધ હોવો જોઈએ તેવી માગ કરીને આ એનજીઓએ તાત્કાલિક સુનાવણીની માગ કરી હતી. એડીએઆર તેની જનહિતની અજીમાં એવી માગ કરી કે ફાઈનાન્સ એક્ટમાં થયેલા સુધારાને પણ રદબાતલ કરી દેવા જોઈએ. આ યોજનાનો વિરોધ કરવા પાછળ એડીઆરે એવી દલીલ કરી કે ચૂંટણી બોન્ડ્સ દ્વારા મળતા રાજકીય ફંડને 100 ટકા ટેક્સ ફ્રી છે અને ઈન્કમ ટેક્સ વિભાગને તેની જાણ કરવાની જરુર હોતી નથી.