ઇલેક્ટ્રિક વાહનોની નીતિ જલ્દીથી લાગુ કરવાની અરજી પર સુનાવણી કરતાં સુપ્રીમ કોર્ટે કેન્દ્ર સરકાર પાસે જવાબ માંગ્યો છે. સુપ્રીમ કોર્ટે જવાબ માટે કેન્દ્રની નરેન્દ્ર મોદી સરકારને 4 અઠવાડિયાનો સમય આપ્યો છે. સુનાવણી દરમિયાન ચીફ જસ્ટિસ ઇન્ડિયા એસ.એ. બોબડેએ કહ્યું કે તેઓ એક સમિતિની રચના કરવાનું વિચારી રહ્યા છે જે વૈકલ્પિક ઇંધણના ઉપયોગ પર ધ્યાન આપશે.
ઇલેકટ્રિક વાહનોની નીતિ લાગુ કરવા પર સુનાવણી
સુપ્રીમ કોર્ટે કેન્દ્ર સરકાર પાસે માગ્યો જવાબ
સરકારને 4 અઠવાડિયાનો આપ્યો સમય
હકીકતમાં, સેન્ટર ફોર પબ્લિક ઇન્ટરેસ્ટ લિટીગેશન NGO એ સુપ્રીમ કોર્ટમાં એક અરજી કરી હતી કે સરકારે વાયુ પ્રદૂષણને કાબૂમાં લેવા માટે ઇલેક્ટ્રિક વ્હિકલ પોલિસી (EVP) વર્ષ 2012 માં લાગુ કરી હતી. આ સાથે હાઇબ્રિડ તેમજ ઇલેકટ્રિક વાહનોના નિર્માણને લઇને પણ પોલીસી બનાવી હતી.
પરંતુ તેનો હજી સુધી અમલ કરવામાં આવ્યો નથી. જેના કારણે ગ્લોબલ વોર્મિંગમાં પણ વધારો થઈ રહ્યો છે. વકીલ પ્રશાંત ભૂષણએ કોર્ટને જણાવ્યું હતું કે ગયા વર્ષે માર્ચમાં સુપ્રીમ કોર્ટે આ મુદ્દે કેન્દ્ર સરકાર પાસે જવાબ માંગ્યો હતો. પરંતુ કેન્દ્ર સરકારે હજી સુધી આ જવાબ રજૂ કર્યો નથી. આ અંતર્ગત, ઇલેક્ટ્રિકલ વાહનોના નિર્માણની સાથે-સાથે પેટ્રોલ પમ્પની તર્જ પર ચાર્જિંગ સ્ટેશન બનાવવા જોઈએ.