સુપ્રીમ કોર્ટે ચૂંટણી સુધારાને લઇ એક મહત્વપૂર્ણ આદેશમાં રાજકીય પક્ષોને તેમના ઉમેદવારોનો ક્રિમિનલ રેકોર્ડ તેમની વેબસાઇટ પર અપલોડ કરવા જણાવ્યું છે. જેને લઇને દાગી નેતાઓ, ધારાસભ્યો અને સાંસદોના પદ જોખમમાં મૂકાઇ શકે છે.
દાગી ઉમેદવારોના ક્રિમિનલ રેકોર્ડની માહિતી જાહેર કરવા આદેશ
આ આદેશનું પાલન નહીં કરનાર પક્ષો વિરૂદ્ધ થઇ શકે છે કાર્યવાહી
ક્રિમિનલ બેકગ્રાઉન્ડ ધરાવતા નેતાઓને ટિકિટ ન આપવામાં આવેઃ સુપ્રીમ કોર્ટ
સુપ્રીમ કોર્ટે એક અરજી પર સુનાવણી કરતાં જણાવ્યું છે કે દેશના તમામ રાજકીય પક્ષો પોતાની વેબસાઇટ પર ક્રિમિનલ બેકગ્રાઉન્ડ ધરાવતા ઉમેદવારોની પસંદગી કરવા માટેનાં કારણો પણ વેબસાઇટ પર અપલોડ કરે. સુપ્રીમ કોર્ટે એવી પણ ચેતવણી આપી છે કે આ આદેશનું પાલન નહીં કરનાર રાજકીય પક્ષો સામે કોર્ટની અવમાનનાની કાર્યવાહી થઇ શકે છે.
સાથે જ સુપ્રીમ કોર્ટે દાગી ઉમેદવારોના ક્રિમિનલ રેકોર્ડની માહિતી ચૂંટણીપંચને પણ આપવા આદેશ કર્યો છે. સુપ્રીમ કોર્ટે જણાવ્યું છે કે રાજકીય પક્ષોએ તેમની વેબસાઇટ, અખબારો અને સોશિયલ મીડિયામાં એ જણાવવું પડશે કે એમણે એવા ઉમેદવારોને શા માટે ટિકિટ આપી છે કે જેમની વિરુદ્ધ ક્રિમિનલ કેસ ચાલી રહ્યા છે.
અત્રે ઉલ્લેખનીય છે કે સુપ્રીમ કોર્ટે એ નિર્ણય કરવાનો હતો કે શું રાજકીય પક્ષોને એવા ઉમેદવારોને ચૂંટણીની ટિકિટ આપતાં રોકવાનો આદેશ કરી શકાય કે જેઓ ક્રિમિનલ બેકગ્રાઉન્ડ ધરાવે છે. સુપ્રીમ કોર્ટના ન્યાયમૂર્તિ રોહિંગ્ટન નરિમાન અને એસ. રવીન્દ્ર ભટ્ટની એક બેન્ચ દ્વારા આ આદેશ કરવામાં આવ્યો હતો.
પિટિશનરમાં ભાજપના એક નેતા અશ્વિની ઉપાધ્યાય પણ હતા, જેમણે સુપ્રીમ કોર્ટ સમક્ષ પિટિશન દાખલ કરીને એવી માગણી કરી હતી કે સુપ્રીમ કોર્ટ ચૂંટણીપંચને એવો આદેશ કરે કે તેઓ રાજકીય પક્ષો પર એવું દબાણ લાવે કે રાજકીય પક્ષો ક્રિમિનલ બેકગ્રાઉન્ડ ધરાવતા નેતાઓને ટિકિટ ન આપે અને આમ ન કરનાર રાજકીય પક્ષો વિરુદ્ધ કાર્યવાહી કરે.
અત્રે ઉલ્લેખનીય છે કે આ અગાઉ સુપ્રીમ કોર્ટે રાજકારણના અપરાધીકરણનો અંત લાવવા માટે ફ્રેમવર્ક તૈયાર કરવા ચૂંટણીપંચને આદેશ કર્યો હતો.