આરે કોલોની વિવાદ / સુપ્રીમ કોર્ટે આરેમાં વૃક્ષોને કાપતા અટકાવ્યા, કહ્યું સરકાર બતાવે કેટલા છોડ લગાવ્યા

• આરે કોલોની મામલે સુપ્રીમ કોર્ટનો આદેશ- કોઇ ઝાડ કાપવામાં ન આવે
• વૃક્ષોને બચાવવા માટે જે લોકોની ધરપકડ કરાઇ છે તેમને તાત્કાલિક મુક્ત કરવામાં આવે : સુપ્રીમ કોર્ટ
• 1 અથવા 2 ટકા ક્ષેત્ર પણ વન ક્ષેત્રમાં આવે છે તો ઝાડ કાપી શકાશે નહીં : સુપ્રીમ કોર્ટ

કોર્ટે સાથે આદેશ આપ્યો છે કે, વૃક્ષોને બચાવવા માટે જે લોકોની ધરપકડ કરાઇ છે તેમને તાત્કાલિક મુક્ત કરવામાં આવે. જસ્ટિસ અરુણ મિશ્રા અને જસ્ટિસ અશોક ભૂષણની બેન્ચે મહારાષ્ટ્ર સરકારને પૂછ્યું કે શું આરે ક્ષેત્ર ઇકો સેન્સિટિવ ઝોનમાં છે કે નહીં. અને અત્યાર સુધીમાં સરકારે કેટલા ઝાડ કાપ્યા છે અને બદલામાં કેટલા છોડ વાવ્યા છે. અને તેની શું સ્થિતિ છે. ઉપરાંત કોર્ટે કહ્યું કે, જો 1 અથવા 2 ટકા ક્ષેત્ર પણ વન ક્ષેત્રમાં આવે છે તો ઝાડ કાપી શકાશે નહીં. 

આ પહેલા મહારાષ્ટ્ર સરકાર તરફથી વકીલ તુષાર મેહતાએ દલીલ કરી કે પર્યાવરણ આપણા સૌ માટે એક મહત્વપૂર્ણ ચિંતાનો વિષય છે. છોડ લગાવાઇ રહ્યા છે. તેના પર જસ્ટિસ અરુણ મિશ્રાએ કહ્યું કે છોડ લગાવવા એક અલગ વાત છે, તેની જાળવણી કરવી એક અલગ વાત છે. સુનાવણી દરમિયાન વિદ્યાર્થીઓ તરફથી વકીલ ગોપાલ શંકર નારાયણે કહ્યું કે, આરે કોલોનીમાં ડિક્લેર કરાયું હતું કે, આ ફોરેસ્ટ લેન્ડ છે. 

જસ્ટિસ અરુણ મિશ્રાએ પૂછ્યું ગ્રીન બેલ્ટ કયો છે? ગોપાલ શંકર નારાયણે કહ્યું કે સરકારે એક નોટિફિકેશન જાહેર કરી તેને ઇકો સેન્સિટિવ ઝોનથી હટાવી દીધું હતું. તેના વિરુદ્ધ અરજી હજુ પણ લંબિત છે. એમણે કહ્યું કે, મેટ્રો શેડ મહારાષ્ટ્ર સરકારની વન ક્ષેત્રને લઇને વિના વ્યાખ્યા અને નીતિના યોજનાબદ્ધ તરીકે કરાયું છે. 

નોંધનીય છે કે, વિદ્યાર્થીઓના એક પ્રતિનિધિમંડળે આરેના ઝાડને બચાવવા માટે સુપ્રીમ કોર્ટમાં અરજી દાખલ કરી હતી. વિદ્યાર્થીઓએ અપીલમાં કહ્યું કે 4 ઓક્ટોબરથી ગેર કાનૂની રીતે ઝાડને કાપવામાં આવી રહ્યા છે. અને શાંતિપૂર્ણ વિરોધ કરનારની અટકાયત કરાઇ રહી છે. આ દરમિયાન ધરપકડ કરાયેલા 29 લોકોને શરતી જામીન મળ્યા હતા. જેમને મોડી રાત્રે છોડવામાં આવ્યા. જામીનની શરતમાં તેમને પ્રદર્શનમાં ભાગ ન લેવા માટે કહેવામાં આવ્યું છે. બીજી તરફ આરેમાં પોલીસની નાકાબંધી હજુ પણ યથાવત છે. જ્યારે કલમ 144 હટાવી દેવાઇ છે.