દેશ કોરોના સંકટનો સામનો કરી રહ્યો છે. કોરોના વાયરસના પ્રકોપના કારણે દરરોજ હજારો કેસ સામે આવી રહ્યા છે ત્યારે વિવિધ રાજ્યોમાં ટેસ્ટિંગ મુદ્દે અવારનવાર સવાલો ઉભા થતા હોય છે ત્યારે આજે સર્વોચ્ચ અદાલતે પણ કેન્દ્ર સરકારને આ જ મુદ્દે ટકોર કરી. નોંધનીય છે કે કોરોના સામે લડવા માટે ટેસ્ટિંગ ખૂબ અગત્યના હોય છે ત્યારે વિવિધ રાજ્યોમાં જુદા જુદા રેટ પર સરકારને આદેશ આપવામાં આવ્યા છે.
આખા દેશમાં કોરોના ટેસ્ટ ફી એક સમાન હોવી જોઈએ : કોર્ટ
દેશમાં કોરોના વાયરસના પ્રકોપને ધ્યાનમાં રાખીને કેન્દ્ર સરકાર અને રાજ્ય સરકારો દ્વારા લેવામાં આવતી કોરોના વાયરસ ટેસ્ટ ફી મુદ્દે સુપ્રીમ કોર્ટે ટકોર કરી છે. શુક્રવારે જસ્ટિસ અશોક ભૂષણ, એસ કે કૌલ અને એમઆસ શાહની ખંડપીઠે કહ્યું કે બધા જ રાજયોમાં કોરોના ટેસ્ટ ફી એક સમાન હોવી જોઈએ. સરકાર દર્દીની સારવાર પર દેખરેખ રાખવા માટે CCTV કેમેરા માટે પણ વિચાર કરી શકે છે.
આટલું જ નહીં સરકારને નિર્દેશન આપતા સર્વોચ્ચ અદાલતે કહ્યું કે રાજ્ય સરકારોએ કોરોના વાયરસના દર્દીઓની સારવાર માટે અને હોસ્પિટલમાં નિરીક્ષણ માટે વિશેષજ્ઞોની એક પેનલનું ગઠન કરવું જોઈએ. જે બાદ કેન્દ્ર સરકારનો પક્ષ મુકતા સોલિસિટર જનરલ તુષાર મેહતાએ કહ્યું કે રેટ નક્કી કરવાની જવાબદારી રાજ્યોની હોવી જોઈએ જેના પર કોર્ટે કહ્યું કે તમે એક અપર લિમિટ બનાવી દો. બાકી રાજય જોઈ લેશે.
નોંધનીય છે કે સરકારે દેશમાં કોરોના ટેસ્ટની ફી 4500 રૂપિયા નક્કી કરી હતી પરંતુ આ જ સરકારે દિલ્હી માટે આ ફી ઘટાડીને 2400 કરી નાખી. આજે સુનાવણી દરમિયાન કોર્ટમાં દિલ્હીની હોસ્પિટલને લઈને પણ ચર્ચા કરવામાં આવી.