ભાવનગર: ગુજરાત વિધાનસભામાં માઈકકાંડ બાદ સસ્પેન્ડ થયેલા ધારાસભ્ય અંબરીશ ડેરના સસ્પેન્શનના પડઘા રાજુલામાં પડયા હતા. ધારાસભ્યના સમર્થનમાં રાજુલામાં કોંગ્રેસના કાર્યકર્તાઓ રોડ પર ઉમટયા હતા.
રાજુલાના હિંડોરણા ચોકડી પર કોંગ્રેસના કાર્યકર્તાઓએ વિરોધ નોંધાવ્યો હતો. કાર્યકરોએ ભાવનગર-ઉના સ્ટેટ હાઈવે પર ચક્કાજામ કર્યો હતો. કાર્યકર્તાઓએ રોડ પર ટાયર સળગાવીને વાહન-વ્યવહાર અટકાવ્યો હતો અને સરકાર વિરુદ્ધ સૂત્રોચ્ચાર કર્યા હતા.
ઉલ્લેખનીય છે કે આજ રોજ ગુજરાત વિધાનસભામાં કોંગ્રેસના સભ્યએ ભાજપના સભ્યને માઇક મારતા ગુજરાતના રાજકારણમાં ગરમાવો ફેલાઇ ગયો હતો જો કે ત્યારબાદ ભાજપ દ્વારા આ સભ્યોને સસ્પેન્ડ કરવાનો પ્રસ્તાવ રજુ કરવામાં આવેલ જેના કારણે વિધાનસભાના અધ્યક્ષ દ્વારા કોંગ્રેસના 3 ધારાસભ્યોને ગૃહમાંથી સસ્પેન્ડ કરવામાં આવતા મોડી સાંજે સસ્પેન્ડ થયેલ ધારાસભ્યના સમર્થકોએ ટાયરો સળગાવી ચક્કાજામ કર્યો હતો.