પાકિસ્તાન સરહદ સાથે જોડાયેલી પંજાબની ગુરુદાસપુર લોકસભા બેઠક પર આ વખતે ભાજપે અભિનેતા સની દેઓલને મેદાનમાં ઉતારી બેઠકને હાઈપ્રોફાઈલ બનાવી દીધી છે. ગુરુદાસપુરમાં ભાજપમાંથી અભિનેતા વિનોદ ખન્ના સિવાય કોઈ ભાજપનો ઉમેદવાર જીતી શક્યો નથી. ત્યારે શું સની મેદાન મારી શકશે ?
પંજાબની ગુરુદાસપુર લોકસભા બેઠક ફિલ્મ અભિનેતા સની દેઓલના આવવાથી હોટ સીટ બની ગઈ છે. એવી આશાઓ હાલ ભાજપ રાખી રહ્યું છે કે વિનોદ ખન્નાની વિરાસત હવે સની દેઓ સંભાળશે. પરંતુ સની દેઓલ માટે આ જવાબદારી ઘણી જ પડકારજનક છે.
વિનોદ ખન્ના સિવાય નથી જીતી શક્યું કોઈ ભાજપાઈ
આમ તો ભાજપની સ્થાપના 1980માં થઈ હતી. પરંતુ આજદીન સુધી ભાજપ ગુરુદાસપુરમાં કોઈ દમદાર ઉમેદવાર શોધી નથી શકી. જો કે વિનોદ ખન્ના તેમાંથી બાકાત છે. વર્ષ 1985ની લોકસભા ચૂંટણીમાં ભાજપના ઉમેદવાર બળદેવ પ્રકાશ બીજા સ્થાન પર રહ્યા હતા. પરંતુ ત્યારબાદની ચૂંટણીમાં ભાજપના કોઈ ઉમેદવાર સારુ પ્રદર્શન કરી શક્યા નથી. વર્ષ 1998માં પ્રથમ વખત વિનોદ ખન્નાએ ગુરુદાસપુરમાં પોતાનો પગ રાખ્યો હતો. કોંગ્રેસના દિગ્ગજ નેતા સુખબંસ કૌર ભિંડરને હરાવ્યા હતા. ભિંડર ગુરુદાસપુરથી સતત 5 વખત જીતી ચૂક્યા હતા. પરંતુ વિનોદ ખન્ના પ્રથમ વખત અહીં કમળ ખિલવવામાં સફળ રહ્યા હતા. વિનોદ ખન્ના 1998, 1999 અને 2004માં ગુરુદાસપુરથી જીત્યા હતા. જો કે 2009માં વિનોદ ખન્નાની કોંગ્રેસના પ્રતાપ સિંહ બાજવા સામે હાર થઈ હતી. પરંતુ ફરી 2014માં તેમણે જીત મેળવી લીધી હતી. પરંતુ વિનોદ ખન્ના નિધન બાદ થયેલી પેટા ચૂંટણીમાં ભાજપની હાર થઈ હતી. ભાજપના ઉમેદવાર સવર્ણસિંહ સલારિયા કોંગ્રેસના સુનીલ જાખડ સામે હારી ગયા હતા.
ગુરુદાસપુર લોકસભા બેઠકના રાજકીય સમિકરણ
આ લોકસભા બેઠકમાં કુલ 9 વિધાનસભા બેઠકનો સમાવેશ થાય છે. વર્તમાન સ્થિતિને જોઈએ તો 9માંથી 7 વિધાનસભા બેઠક કોંગ્રેસની પાસે છે. જ્યારે ભાજપ પાસે માત્ર એક બેઠક છે. જ્યારે અકાલી દળ પાસે એક બેઠક છે. 2014ના આંકડાઓ મુજબ ગુરુદાસપુર બેઠક પર કુલ 13 લાખ 18 હજાર 967 મતદાતા છે. ગુરુદાસપુરમાં 19મેએ મતદાન યોજાવાનું છે. ત્યારે ભાજપમાંથી સની દેઓલ અને કોંગ્રેસમાંથી સુનિલ જાંખડ વચ્ચે મુકાબલો છે.
ગુરુદાસપુર પાકિસ્તાન નજીક આવેલું છે
ભાજપના નેતા અને અભિનેતા ધર્મેન્દ્રના મોટા પુત્ર સની દેઓલે મંગળવારે જ ભાજપમાં સામેલ થયા હતા. ભાજપમાં સામેલ થયા બાદ તેમને ગુરુદાસપુરની ટિકિટ આપી દેવામાં આવી. પોતાના અભિનય થકી અનેક લોકોને ઘેલુ લગાડનારા સની દેઓલને ગુરુદાસપુરથી લડાવી ભાજપે એક માસ્ટર સ્ટોક માર્યો તેમ કહીએ તો ખોટું નથી. કારણ કે ગુરુદાસપુર પાકિસ્તાન નજીક આવેલું છે. તો સની દેઓલની દેશભક્તિની ફિલ્મો ઘણી લોકપ્રિય હોય છે. જેમાં ગદર એક પ્રેમકથા તેને કેમ ભૂલી શકાય. આ ફિલ્મ થકી સનીને એક નવી ઓળખ મળી હતી. સની દેઓલની દેશભક્તિની ફિલ્મો એવી હોય છે કે તેને પાકિસ્તાનમાં બેન કરી દેવાય છે. ફિલ્મો થકી મોટી નામના મેળવનારા સની દેઓલ ભાજપ માટે કેટલા બળિયા સાબિત થાય છે તે જોવું રહ્યું.