IPL ટૂર્નામેન્ટમાં ગઈકાલે બેંગ્લોર અને પંજાબની મેચ થઇ તેમાં કોમેન્ટ્રી બોક્સમાં બેઠેલા સુનિલ ગાવસ્કરની એક ટિપ્પણી બાદ હવે ભારે વિવાદ શરુ થયો છે.
ગઇકાલની મેચમાં પંજાબ સામે વિરાટસેનાનો ધબડકો
સુનિલ ગાવસ્કરે કરી એવી ટિપ્પણી કરી કે ભારે વિવાદ શરુ
સોશ્યલ મીડિયા પર ભડકી ઉઠેલા લોકોએ ગાવસ્કરને હટાવી દેવા માંગ કરી
અનુષ્કા પર આપત્તિજનક ટિપ્પણીના કારણે વિવાદ
વિરાટ કોહલી અને અનુષ્કા શર્માને લઈને ફરીવાર વિવાદ શરુ થયો છે અને આ વખતે ભારતીય ક્રિકેટ મહાન ખેલાડી સુનીલ ગાવસ્કરે આ વિવાદને જન્મ આપ્યો છે. ગાવસ્કરે ચાલુ મેચમાં વિરાટના પ્રદર્શનને લઈને એવી કોમેન્ટ કરી કે હવે લોકો ભડકી ઉઠ્યા છે. સોશ્યલ મીડિયા પર લોકો કહી રહ્યા છેકે એક મહાન ક્રિકેટર દ્વારા આ ખરાબ હરકત કરવામાં આવી છે.
લોકોના નિશાને આવ્યા ગાવસ્કર
મહાન બેટ્સમેન સુનીલ ગાવસ્કર ખૂબ મોટા વિવાદમાં ફસાઈ ગયા છે, રોયલ ચેલેન્જર્સ બેંગ્લોર અને કિંગ્સ ઈલેવન પંજાબની મેચ દરમિયાન તેમણે વિરાટ કોહલી અને તેમની પત્ની અનુષ્કા શર્મા વિશે આપત્તિજનક ટિપ્પણી કરી નાખી, નોંધનીય છે આ મેચમાં બેંગ્લોરનું પ્રદર્શન સારું રહ્યું નહીં અને તેમાં કોહલીએ રાહુલના જ બે બે કેચ છોડી અને તે બાદ બેટિંગમાં પણ વિરાટ સેનાનો ધબડકો પડ્યો. કેપ્ટન વિરાટ કોહલી પણ કંઈ ખાસ પ્રદર્શન કરી શક્યા નહીં અને એક રન બનાવીને આઉટ થઇ ગયા.
લોકોએ કહ્યું મહાન ક્રિકેટર થઇને આવી હરકત !
કોમેન્ટ્રી બોક્સમાં બેસેલા સુનીલ ગાવસ્કરે આ મુદ્દાને અનુષ્કા સાથે જોડીને ટિપ્પણી કરી નાખી અને તે બાદથી વિવાદ શરુ થઇ ગયો છે. સ્પોર્ટ્સ જગતનાં દિગ્ગજ ખેલાડી પર લોકો બળાપો કાઢી રહ્યા છે. ખાસ કરીને વિરાટના ચાહકો અત્યારે ખૂબ લાલઘૂમ થયા છે અને ગાવસ્કરને કોમેન્ટરી બોક્સમાંથી હટાવવાની માંગણી કરવામાં આવી રહી છે. આટલું જ નહીં સોશ્યલ મીડિયામાં સુનીલ ગાવસ્કરને બોયકોટ કરવાના હેશટેગને ટ્રેન્ડ કરાવવામાં આવી રહ્યો છે.
બેંગ્લોરની ટીમ માટે મેચ ખૂબ ખરાબ રહી
નોંધનીય છે કે આ પહેલીવાર નથી કે અભિનેત્રી અનુષ્કાને વિરાટ કોહલીના પ્રદર્શન સાથે જોડવામાં આવી હોય, આ પહેલા પણ ઘણીવાર વિરાટ કોહલી જ્યારે નિરાશાજનક પ્રદર્શન કરતા ત્યારે ઘણા બધા લોકો તેને અનુષ્કા સાથે જોડી દેતા હતા એવામાં કોહલી માટે દુબઈના મેદાન પર આ દિવસ સારો ન રહ્યો. મેચ બાદ તેમણે પોતે પણ કહ્યું કે આજનો દિવસ સારો ન રહ્યો. કોહલીએ બે બે વખત રાહુલના કેચ છોડ્યા.