મોંઘવારી / અમૂલ બાદ હવે સુમુલે પણ દૂધના ભાવમાં કર્યો 2 રૂપિયાનો વધારો, આગામી સપ્તાહથી નવો ભાવ અમલી

• સુમુલ ડેરી દ્વારા દૂધમાં લિટરે 2 રૂપિયાનો કર્યો વધારો
• આગામી સપ્તાહથી દૂધના ભાવમાં વધારો અમલી બનશે
• અમૂલે દૂધના ભાવમાં 2 રૂપિયાનો વધારો કર્યો છે

મોંઘવારી દિવસેને દિવસે વધી રહી છે ત્યારે અમૂલે 6 મહિનામાં બીજીવાર દૂધના ભાવમાં લિટરદીઠ રૂ.2નો વધારો કર્યો હતો. ત્યારે હવે સુરતની સુમુલ ડેરી દ્વારા પણ દૂધના ભાવમાં વધારો કરવામાં આવ્યો છે. અમૂલ બાદ સુમુલે પણ દૂઘના ભાવમાં 2 રૂપિયાનો વધારો કર્યો છે. આ નવો ભાવ આગામી અઠવાડિયાથી લાગુ થઇ જશે. જોકે અમુલ દ્વારા નવો ભાવ લાગૂ કરી દેવામાં આવ્યો છે.

અમૂલ દૂધના ભાવમાં પ્રતિ લીટર 2 રૂપિયાનો વધારો

• અમૂલ ગોલ્ડ 500 મિલી અગાઉ 30 હતું જે 31 રૂપિયા નવો ભાવ
• અમૂલ તાજા 500 મિલીના  24 હતા જે હવે 25 રૂપિયા નવો ભાવ
• અમૂલ શક્તિ 500 મિલી 27 હતા જે હવે 28 રૂપિયા નવો  ભાવ
• ઉત્પાદન ખર્ચમાં વધારો થતાં લેવાયો ભાવ વધારાનો નિર્ણય

દૂધના ભાવમાં વધારો લોકો પર પડ્યા પર પાટુ સમાન છે. એક તરફ જ્યારે CNG, પેટ્રોલ અને ડીઝલના પણ ભાવ આસમાને છે. શાકભાજી અનાજ-કરીયાણું, દૂધ, દહીં, તેલમાં પણ અસહ્ય ભાવ વધારો થઈ રહ્યો છે તેવા સમયે દૂધમાં થયેલા ભાવધારાએ લોકોમાં રોષની લાગણી જન્માવી છે. 

શાકભાજીના ભાવ પણ આસમાને
આપને જણાવી દઈએ કે, દરેક વસ્તુમાં સતત ભાવ વધારાના પગલે ગૃહિણીઓનું બજેટ ખોરવાયું છે. છેલ્લા એક સપ્તાહથી શાકભાજીના ભાવોમાં ઉછાળો આવતા લોકો મુશ્કેલીમાં મૂકાયા છે. તમામ શાકભાજીના ભાવમાં વધારો જોવા મળી રહ્યો હતો. જેને કારણે ગ્રાહકો પરેશાન થઈ ગયા છે. ખાસ કરીને દૂધી, ભીંડા, કાકડી, કોબીજ સહિત તમામ શાકભાજીના ભાવ એક સપ્તાહની સરખામણીમાં રૂ.20 થી રૂ.30 કિલો વધી ગયા છે. આ ભાવવધારો ગરીબ અને મધ્યમ વર્ગ પરિવાર માટે કમરતોડ સાબિત થયો છે. આમ, હવે મોંઘવારીનો માર માત્ર સામાન્ય લોકોને જ નહીં, રાજ્યના તમામ વર્ગના લોકોમાં હાહાકાર મચાવી રહ્યો છે ત્યારે સરકાર વહેલી જાગીને લોકોના હિતમાં મોંઘવારી પર લગામ કસે તો સરકાર અને જનતા બન્નેના હિતમાં રહેશે.

અમૂલ ડેરીના પશુપાલકો માટે સારા સમાચાર
અમૂલ ડેરી સાથે સંકળાયેલા પશુપાલકો માટે ખુશીના સમાચાર છે. કારણ કે અમૂલે દૂધના ખરીદ ભાવમાં 1 કિલો ફેટમાં 20 રૂપિયાનો વધારો કર્યો છે. 1 કિલો ફેટના 740થી વધારી નવો 760 રૂપિયા કરાયો છે. અમૂલ ડેરીએ ગાયના દૂધના પ્રતિ લિટરે 50 પૈસાનો વધારો કર્યો છે. આ નવો ભાવ 21 ઓગસ્ટથી અમલમાં આવશે. આણંદ, ખેડા અને મહીસાગર જિલ્લાના પશુપાલકોને ફાયદો થશે.

સુમુલ ડેરીના પશુપાલકોને માટે પણ સારા સમાચાર
સુરત સુમુલ ડેરીએ આગામી 21મી ઓગષ્ટથી સુરત અને તાપી જિલ્લાના 2.50 લાખ પશુપાલકોને દુધના ભાવમાં કિલોફેટે 10 રૂપિયાનો વધારો આપ્યો છે. જેને લઇને હવે ભેંસનું દૂધ ભરનારા પશુપાલકોને કિલોફેટે 740ને બદલે 750 રૂપિયા મળશે. જ્યારે ગાયનું દૂધ ભરનારા પશુપાલકોને ૭૨૫ને બદલે 735 રૂપિયા મળશે. સુમુલ ડેરીએ ત્રણ મહિનામાં બીજી વખત પશુપાલકોને દૂધના ભાવમાં કીલોફેટે 10 રૂપિયાનો વધારો આપ્યો છે. અગાઉ 25ની મેના રોજ 10 રૂપિયાનો ભાવ વધારી આપવામાં આવ્યો હતો. અત્રે ઉલ્લેખનીય છે કે, સુરત સુમુલ ડેરી દરરોજ 17 લાખ લીટર દૂધ પશુપાલકો પાસેથી એકત્ર કરે છે. જ્યારે સુરત અને તાપી જિલ્લાના રોજિંદા 15થી 16 લાખ લીટર દૂધનું વેચાણ કરે છે.