અમૂલ બાદ સુમુલે પણ જૂની કિંમતોની પ્રિન્ટ કરેલી થેલીઓ પુરી થઇ જતા દૂધના ભાવમાં કર્યો વધારો
સુમુલે દૂધના ભાવ વધાર્યા
પ્રતિ લિટરે રુ.2નો કર્યો ભાવ વધારો
તાજા અને સુમુલ ગાયના દૂધમાં 2 રૂપિયાનો વધારો
રાજ્યમાં મોંઘવારીથી જનતા પરેશાન થઇ ગઇછે. પ્રાથમિક જીવન જરુરી વસ્તુઓના ભાવમાં તોતિંગ વધારો નોંધાઇ રહ્યો છે. શાકભાજી, કઠોળ, દૂધ , ખાદ્યતેલના ભાવ આસમાને પહોંચ્યા છે. તેમાં પણ બાકી હતુ તેમ અમૂલે દૂધના ભાવમાં 2 રૂપિયાનો વધારો કર્યો. જેને કારણે ગૃહિણીઓનું બજેટ ખોરવાયુ છે.એક તરફ તેલના ભાવ આસમાને તો બીજી તરફ દૂધ. વધતા ભાવે તો ગૃહિણીઓની કમર ભાંગી નાંખી છે. એક બાદ એક તમામ વસ્તુઓના ભાવમાં વધારો થતા સામાન્ય નાગરિકે તો ઘર કેવી રીતે ચલાવવું તે પ્રશ્ન સતાવી રહ્યો છે. ત્યારે અમૂલની જેમ અન્ય દૂધ ઉત્પાદક કંપનીઓએ પણ દૂધના ભાવમાં વધારો કર્યો છે.
સુમુલે દૂધમાં લિટરે રુ.2 વધાર્યા
દક્ષિણ ગુજરાતની પ્રખ્યાત સુમુલ ડેરીએ પણ દૂધના ભાવમાં વધારો કર્યો છે. સુમુલે દૂધના ભાવમાં લિટરે 2 રૂપિયાનો ભાવ વધારો કર્યો છે. સુમુલ તાજા અને સુમુલ ગાયના દૂધમાં પણ 2 રૂપિયાનો વધારો કર્યો છે. એટલે હવે ગાયના દૂધના ભાવ રુ.48થી વધીને રુ.50 રુપિયે પ્રતિ લિટર પહોંચ્યા છે. તો આ તરફ તાજા દૂધનો ભાવ રૂ.46થી વધીને રૂ.48 ભાવ થવા પામ્યો છે.સુમુલ ચેરમેન માનસિંહ પટેલે જણાવ્યું હતું કે ટ્રાન્સપોર્ટેશન સહિત અનેક વસ્તુના ભાવમાં વધારો થયો છે. બીજી તરફ અમુલ ડેરી દ્વારા પણ 1 માર્ચના રોજ દુધમાં ભાવ વધારો કરવામાં આવ્યો છે. દુધની કોથળી પર ભાવ છપાયેલી જૂની પ્રિન્ટ પડી હતી તે પૂરી થયા બાદ ભાવ વધારો કરવામાં આવ્યો છે.’
બરોડા ડેરીએ દૂધના ભાવમાં કર્યો વધારો
અમૂલ બાદ બરોડા ડેરીએ પણ લિટરે દૂધના ભાવમાં રુ.2નો વધારો કર્યો હતો. બરોડા ડેરીના ચેરમેન દિનેશ પટેલની અધ્યક્ષ સ્થાને બરોડા ડેરીના નિયામક મંડળની બેઠક મળી હતી. જેમાં 500ml અમૂલ તાઝા, 500ml અમૂલ સ્લિમ એન્ડ ટ્રીમ અને 500ml અમૂલ ગાયના દૂધમાં પ્રતિલિટર 2 રૂપિયાનો વધારો કરવામાં આવ્યો હતો.. તે સાથે દૂધ ઉત્પાદકોના ખરીદ ભાવમાં પણ રૂપિયા 25નો ભાવ વધારો કરવામાં આવ્યો હતો જોકે 500 ml. શક્તિ અને 500ml ગોલ્ડમાં તેમજ 200ml ગાયના પાઉચમાં કોઈ વધારો કરવામાં આવ્યો નથી. તદુપરાંત છાશમાં પણ કોઈ પ્રકારનો વધારો કરવામાં આવ્યો નથી.
અમૂલે કર્યો ભાવ વધારો
અમૂલ ગોલ્ડ, અમૂલ શક્તિ, અમૂલ તાજા સ્પેશિયલના ભાવમાં પ્રતિ લીટર બે રૂપિયાનો વધારો કરવામાં આવ્યો હતો.અમૂલ દૂધના પ્રતિ લિટર પાઉચમાં રૂપિયા 2નો વધારો જ્યારે 500 MLના પાઉચમાં રૂપિયા 1નો વધારો કરવામાં આવ્યો હતો.અમૂલ જીરા છાશના પાઉચમાં 1 રૂપિયાનો વધારો કરાયો છે. તો અમૂલ મસ્તી દહીંના પાઉચમાં 2 રૂપિયાનો વધારો કરાયો છે. અમૂલના દૂધ, દહીં અને છાશની કિંમતોમાં વધારો ઝીંકી દેવાયો છે. ત્યારે હવે ટૂંક સમયમાં આઈસ્ક્રીમના ભાવોમાં વધારો કરવામાં આવી શકે છે.