વડોદરા /  સાહેબ, પેપરલીક પછી આપઘાતના વિચારો આવે છે, આમાં જ ઉંમર નીકળી જશે: ગુજરાતનાં યુવાનોનું દર્દ સાંભળી ભાવુક થઈ જશો 

• જૂનિયર ક્લાર્કનું પેપરલીક થવાથી યુવકોમાં રોષ
• વડોદરાના યુવકોએ રોષ ઠાલવ્યો, પેપર ફૂટવાથી હતાશા વ્યાપી
• આત્મહત્યા કરવા ના વિચારો આવે છે-ઉમેદવાર 
• પેપરલીક ન થાય તેવી વ્યવસ્થા કરવા કરી માગ

ગુજરાતમાં જૂનિયર ક્લાર્કનું પેપરલીક થયા બાદ સ્પર્ધાત્મક તૈયારી કરનારા યુવકોમાં ભારે રોષ જોવા મળી રહ્યો છે. વડોદરામાં સ્પર્ધાત્મક પરીક્ષાની તૈયારી કરતા યુવકોએ રોષ ઠાલવ્યો હતો. ઉમેદવારોએ કહ્યું હતું કે, ગુજરાતમાં 10થી વધુ પેપરલીક થયા છે, પેપર ફૂટવાથી ઉમેદવારોમાં હતાશાની સાથે હવે ઉમેદવારોમાં આત્મહત્યા કરવાના વિચારો આવે છે. 

રાજ્યમાં ગઇકાલે જુનિયર ક્લાર્કની પરીક્ષા પહેલા પેપર લીક થઈ જતાં પરીક્ષા રદ્દ કરાઇ હતી. જોકે આ તરફ હવે પરીક્ષા રદ્દ થયા બાદ ઉમેદવારોમાં ભારે રોષની લાગણી પ્રવર્તી રહી છે. ઉમેદવારોનું કહેવું છે કે, ગુજરાતમાં 10થી વધુ પેપરલીક થયા છે, સરકાર પાસે હવે શું અપેક્ષા રાખવાની? મહત્વનું છે કે, જૂનિયર ક્લાર્કની પરીક્ષા માટે અનેક ઉમેદવારો ઘણા સમયથી મહેનત કરતા હતા. જોકે હવે ઉમેદવારો કહી રહ્યા છે કે,  છેલ્લી ઘડીએ પેપર ફૂટતા અમારી મહેનત પાણીમાં ગઈ છે. 

પેપરલીક ન થાય તેવી વ્યવસ્થા કરવા કરી માગ
વડોદરામાં સરકાર સામે રોષ ઠાલવતાં ઉમેદવારોએ કહ્યું કે, સરકારે એવી વ્યવસ્થા કરવી જોઈએ કે હવે પછી પેપરલીક ન થાય. આ સાથે કહ્યું કે, પેપરલીક થતા ઉમેદવારોની ઉંમર નીકળી જાય છે. આ સાથે ઉંમર નીકળી જતી હોવાથી યુવકોને સરકારી નોકરી નથી મળતી તેવું પણ ઉમેદવારોએ કહ્યું હતું. 

ગઇકાલે પણ ઉમેદવારોએ મીડિયા સમક્ષ ઠાલવી હતી વ્યથા 
રવિવારે  9 લાખ વિદ્યાર્થીઓ પરીક્ષા આપવાનાં હતાં. તમામ બેરોજગાર છે અને એક વિદ્યાર્થીનાં 500 રૂપિયા થાય છે. મહિલા ઉમેદવાર કહે છે કે 'લુણાવાડા આવીને ખબર પડી કે પરીક્ષા રદ છે.. અમારા પૈસા કોણ આપશે? ' એક વિદ્યાર્થી કહે છે કે '2018માં પંચાયત સેવાનું ફોર્મ ભરાયું છે, અમારો કિંમતી સમય અમે આ પરીક્ષાઓની તૈયારીઓમાં બગાડીએ છીએ પરંતુ અમને પરીણામ મળતું નથી. અમે 4-4 વર્ષોથી તૈયારીઓ કરી રહ્યાં છીએ. પહેલાં બીનસચિવાલયની પરીક્ષા રદ થઈ અને હવે આજે આ પરીક્ષા પણ રદ થઈ છે. સરકારને વિનંતી છે કે સારા અધિકારીઓની નિમણૂક કરવી જોઈએ.'

'તબિયત સારી નથી તેમ છતાં હું પરીક્ષા આપવા આવ્યો છું. '
ભાવનગરની એક મહિલા કહે છે કે 'રાતનાં 2 વાગ્યાથી વિદ્યાર્થીઓ અહીં આવી ગયાં છે. 6 વાગ્યે અચાનક કહે છે કે પરીક્ષા રદ થાય છે. ગરીબ વસ્તી છે, ખર્ચા કરી ભાડાં ખર્ચીને અહીં આવે છે.' અમદાવાદ ગીતામંદિરની બહાર વિદ્યાર્થીઓ જે-તે અધિકારીઓને સસ્પેન્ડ કરવાની માંગ ઊઠાવી રહ્યાં છે. તો બીજી તરફ ભાવનગરનાં એક ઉમેદવાર કહે છે કે, ' અમે 2 વાગ્યે જાગીને અહીં આવ્યાં છીએ, ત્યારે જેમણે પેપર ફાળવવાનાં છે તેઓ સૂતાં છે. ભાવનગરથી અમદાવાદ તબિયત સારી નથી તેમ છતાં હું પરીક્ષા આપવા આવ્યો છું. '

મહત્વનું છે કે, રવિવારે વધુ એક વખત પેપર લીક થતા રાજ્યના લાખો બેરોજગાર યુવાઓને રાતે પાણીએ રોવાનો વારો આવ્યો છે. ગૌણ સેવા પસંદગી મંડળ દ્વારા યોજાનારા જૂનિયર ક્લાર્કની પરીક્ષાનુ પેપર લીક થતા પરીક્ષા મોકુફ રાખવામાં આવી છે. આથી ઉમેદવારોમાં આક્રોશનો જ્વાળા ભભૂકી રહ્યો છે. આવી સ્થિતિ વચ્ચે ગુજરાત પંચાયત સેવા પસંદગી મંડળ દ્વારા કચેરી ખાતે પોલીસ બંદોબસ્ત ફાળવવા માંગ કરાઈ છે. આ મામલે ગાંધીનગર જિલ્લા પોલીસ અધિક્ષકને લેખિત રજુઆત કરવામાં આવી છે. ઉમેદવારોના રોષને ધ્યાને લઇ કાયદો અને વ્યવસ્થાની સ્થિતિ જળવાઇ રહે તેમજ કોઈ અનિચ્છનીય બનાવ ન બને તે માટે કચેરી ખાતે પુરતો પોલીસ સ્ટાફ તૈનાત રાખવા રજુઆતના અંતમાં જણાવ્યું છે.

આરોપીઓના નામ

• પ્રદીપ કુમાર નાયક,ઓડીસા
• મુરારી કુમાર પાસવાન વેસ્ટ બંગાલ,
• કમલેશ કુમાર ચૌધરી,બિહાર
• મોહમદ ફિરોજ, બિહાર
• સવેશકુમાર સિંગ,બિહાર
• મિન્ટુ રાય, બિહાર
• મુકેશકુમાર,બિહાર
• પ્રભાતકુમાર ,બિહાર
• અનિકેત ભટ્ટ,બરોડા
• ભાસ્કર ચૌધરી,બરોડા
• કેતન બારોટ,અમદાવાદ
• રાજ બારોટ, બરોડા
• પ્રણય શર્મા,અમદાવાદ
• હાર્દિક શર્મા,સાબરકાંઠા
• નરેશ મોહંતી,સુરત