સાહસ / 28 વર્ષના આ ગુજરાતી યુવકે એક તકલીફ પડી અને લાખો કમાતી કંપની ઊભી કરી નાંખી, જાણો શું છે બિઝનેસ

- StartUp Kitli (With eChai)

શું છે Gridle?

ગ્રીડલ એક પ્રોજેક્ટ મેનેજમેન્ટ સોફ્ટવેર છે, જેના દ્વારા કોર્પોરેટ કંપનીઓ પોતાના ગ્રાહકો સાથે સરળ રીતે કમ્યુનિકેશન કરી શકે તેમ જ તેમના અકાઉન્ટ્સને સરળ રીતે મેઈન્ટેઈન કરી શકે. મિત્રો સાથે એક પ્રોજેક્ટ દરમ્યાન ફાઈલ્સ શૅરિંગ કરવામાં તકલીફ પડી અને બસ ત્યાંથી જ આ સોફ્ટવેર બનાવવાના વિચારે જન્મ લીધો હતો.

તકલીફને બદલી તકમાં 

ઉલ્લેખનીય છે કે, યશ શાહ ભણવામાં નબળા હતા પરંતુ તેમના સ્વપ્ન અવ્વલ દરજ્જો ધરાવતા હતા. કોલેજનો અભ્યાસ પૂર્ણ કર્યા બાદ નોકરીમાં જોતરાયા. જો કે, પ્રોજેક્ટ શેરીંગ દરમિયાન પડતી વિવિધ પ્રકારની મુશ્કેલીઓ યશભાઇના મનમાં ખટકી. તેમણે આ તકલીફોને તક સ્વરૂપે બદલવા પ્રયાસ કર્યો. પોતાના સહ અભ્યાસી અભિષેક દોશી અનુપમા પંચાલની સાથે મળીને શરૂ કર્યું સ્ટાર્ટ અપ. 

કેવી રીતે શરૂ કર્યો બિઝનેસ ? 

આ સવાલનો જવાબ આપતા યશ શાહ કહે છે કે, પ્રોજેક્ટ શેરીંગ વખતે પડતી સમસ્યાના સોલ્યુશન માટે અમે ત્રણેય મિત્રો 200 લોકોને મળ્યા અને અમારી પ્રોડક્ટ વિશે માહિતગાર કર્યા. અંતે એન્જીનીયરીંગ સંસ્થામાંથી ઇન્ટર્ન્સ અને વિદ્યાર્થીઓની ટીમ બનાવીને બનાવ્યું ગ્રીડલનું પ્રથમ વર્ઝન. 

ગ્રીડલના પ્રથમ વર્ઝનને ગ્રાહકોની સામે મુક્યું અને તેમની પાસેથી ફીડબેક મેળવ્યા. ગ્રાહકોને અમારી પ્રોડક્ટ ગમી અને સારા અભિપ્રાય અને સુધારા વધારા અંગેના પણ અભિપ્રાય મેળવ્યા. શરૂઆતમાં 100 મોટા ગ્રાહકોમાં ટાટા કમ્યુનિકેશન પણ જોડાતા અમારો જુસ્સો બહોળો થયો. 

ફંડ કેવી રીતે મેળવ્યું  ?

કોઇપણ સ્ટાર્ટ અપને ફંડીગનો પ્રશ્ન સતત સતાવતો હોય છે. તેવી રીતે યશ શાહના સ્ટાર્ટ અપ માટે પણ આ સવાલ ઉભો થતો. જોબ મુક્યા બાદ ત્રણેય મિત્રોએ કોઇ કેફેમાં બેસીને કે અરસ પરસ રીતે ઘરે જઇને પણ પોતાના સ્ટાર્ટઅપને મંઝીલ સુધી પહોંચાડવાના પ્રયાસો હાથ ધર્યા. આ સમયે IIM ના CII પ્રોગ્રામમાં અમારો પ્રોજેક્ટ સિલેક્ટ થયો અને 10 લાખ પ્રાપ્ત થયાં. જેણે અમારી સ્ટાર્ટઅપને વધુ વેગવંતુ બનાવ્યું. દોઢ વર્ષના સમયગાળા બાદ વધુ રોકાણકારો કંપની સાથે જોડાયા અને કામ આગળ વધતું ગયું. 

શું છે CIIE ?

જો કોઇ ઉદ્યોગ સાહસિક પોતાના વ્યવસાયને વધુ વેગવંતુ બનાવવા માગતો હોય તો તેને IIM નું CIIE મદદ પુરી પાડે છે. CIIE દરેક ઉદ્યોગ સાહસિકોને ફંડ પુરુ પાડે છે. કોઇપણ ઉદ્યોગ સાહસિકે ફંડ માટે આમ-તેમ ભટકાવાની જરૂર રહેતી નથી. CIIE સામેથી ઉદ્યોગ સાહસિકોને શોધતું હોય છે. 

 પ્રોત્સાહક પળ ?

યશ શાહ હસીને આ પળને યાદ કરતા કહે છે કે, કોઇપણ વ્યક્તિને સ્ટાર્ટ અપના શરૂઆતના તબક્કામાં તકલીફ પડતી હોય છે. પરંતુ યશ શાહના પિતાએ જાત મહેનતે કંપનીની શરૂઆત કરી હોવાથી તેમનું માર્ગદર્શન મળતું રહ્યુ. યશભાઇ કહે છે કે, મારા પરિવારજનોને સાથ-સહકાર મને ખુબ મળ્યો. મારા મમ્મીને મારા પર ભરોસો હતો અને મને પણ ભરોષો હતો કે કાંઇપણ થશે મારો પરિવાર મારી સાથે છે. 

ટીમ બિલ્ડીંગની કેવી રીતે શક્ય બન્યું ? 

ગ્રીડલ સોફ્ટર કંપનીના માલીક યશ શાહ કહે છે કે, અમે લોકો કોલેજમાં જતા અને વિદ્યાર્થીઓને પહેલા ઇન્ટર્ન તરીકે 3 થી 6 મહિના માટે ટ્રેનિગ માટે બોલાવતા અને પછી જેનું કામકાજ સારુ હોય તેને કંપની સાથે જોડતા ગયા અને આકાર પામી એક ટીમ. 

મારી કંપનીએ આપ્યો મને લાઇફ પાર્ટનર 

યશ શાહ કંપનીની શરૂઆતથી લઇને વર્તમાન તબક્કાને વાગોળતા કહે છે કે, મારી કંપનીએ મને લાઇફ પાર્ટનર આપ્યો છે. કંપનીના કો ફાઉન્ડર અને CTO અનુપમા સાથે તેમણે લગ્ન કર્યા છે. 

ઉદ્યોગ સાહસિકો માટે સલાહ ?

યશ શાહ જણાવે છે કે, તમે જે પણ ટીમ બનાવો તે તમારા કરતા સ્માર્ટ હોવી જોઇએ અને જો તમારામાં કામ કરવાનો જુસ્સો હશે તો ચોક્કસ સફળ થશો જ.