ભારતીય વાયુસેના પછી હવે નૌસેનામાં પણ મહિલા પાઈલોટ એરક્રાફ્ટ ઉડાડવા માટે તૈયાર છે. સબ લેફ્ટિનેંટ શિવાંગી નેવીની પ્રથમ મહિલા પાઈલોટ બની ગઈ છે. જે હવે નેવી માટે સર્વિલાંસ એરક્રાફ્ટ ઉડાડશે.
બિહારનું ગૌરવ બની શિવાંગી
ભારતીય નેવીમાં બની પ્રથમ મહિલા પાયલોટ
બાળપણ આકાશમાં ઉડવાનું હતું સ્વપ્ન
આજે દેશની દીકરીઓ ક્યાંય પાછળ નથી. એવું એક પણ ફિલ્ડ નથી જ્યાં પુરૂષોની સરખામણીએ મહિલાઓ પાછળ હોય. દરેક ક્ષેત્રમાં આજે મહિલાઓનો એક્કો છે. હવે સેનામાં પણ મહિલાઓની બોલબાલા થવા લાગી છે. કારણ કે નૌસેનાને તેની સૌ પ્રથમ મહિલા પાઈલોટ મળી છે.
નૌસેનાની પ્રથમ મહિલા પાયલોટ
સબ લેફ્ટિનેંટ શિવાંગી ભારતીય નૌસેનાની પ્રથમ મહિલા પાયલોટ બની છે. સોમવારે તેણે કોચ્ચિ નેવલ બેસ પરથી ઓપરેશનલ ડ્યૂટી જોઈન કરી લીધી. શિવાંગી હવે ડ્રોનિયર સર્વિલાંસ એરક્રાફ્ટ ઉડાડશે. તો આપને જણાવી દઈએ કે એરફોર્સમાં આ જ વર્ષે ફ્લાઈટ લેફ્ટિનેંટ ભાવના કાંત ફાઈટર પ્લેન ઉડાડનારી મહિલા પાઈલોટ બની હતી.
નૌસેનામાં મહિલા પાયલોટ બનીને ઈતિહાસ રચ્યો
શિવાંગીએ નૌસેનામાં પાયલોટ બનીને ઈતિહાસ રચ્યો છે. દેશ માટે તો આ વાત ગૌરવ કરનારી છે જ પરંતુ બિહાર માટે તો આ સમાચાર ડબલ ખુશી આપનારા છે. કારણ કે શિવાંગી બિહારની છે. બિહારની આ બેટી હવે દુશ્મનોના છક્કા છોડાવશે. 73 વર્ષમાં એ પહેલીવાર થયું છે કે દેશની સમુદ્રી સીમાની સુરક્ષામાં દેશની એક દીકરી સામેલ થઈ છે.
બાળપણથી જ હતી આકાશમાં ઉડવાની આશા
બિહારના મુઝફ્ફપુરની શિવાંગીની મા એક હાઉસ વાઈફ છે અને પિતા સ્કૂલ ટીચર છે. મુઝફ્ફપુરમાં જ શિવાંગીનો જન્મ થયો અને પ્રાથમિક શિક્ષણ પણ અહીં જ લીધું. ત્યારબાદ શિવાંગીએ સિક્કીમ મનિપાલ ઈન્સ્ટીટ્યુટ ઓફ ટેક્નોલોજીમાંથી બી.ટેક કર્યું. પરંતુ કોલેજના દિવસોમાં બાળપણથી જ આકાશમાં ઉડવાની ખ્વાઈસ ફરી એકવાર જાગી અને તેણે સર્વિસ સિલેક્શન બોર્ડ ભોપાલની એક્ઝામ ક્લીયર કરી અને બસ અહીંથી શરૂ થઈ શિવાંગીની એ ઉડાન જે આજે ઐતિહાસિક બની ગઈ. શિવાંગીએ કહ્યું કે, આ માટે તે લાંબા સમયથી રાહ જોઈ રહી હતી અને આજે એ દિવસ આવી જ ગયો આ ખુબ જ શાનદાર અનુભવ છે. હવે હું ત્રીજા સ્ટેજની ટ્રેનિંગ પુરી કરવા માટે કામ કરીશું.
શિવાંગીને ભારતીય નૌસેના એકેડમી 26 NOC કોર્ષ અંતર્ગત SCC પાઈલોટ તરીકે સામેલ કરવામાં આવી હતી. ગત વર્ષે જૂનમાં વાઈસ એડમિનરલ એ.કે.ચાવલાએ ઔપચારિક રીતે નૌસેનામાં શિવાંગીનું કમિશન કર્યું હતું અને દેશની દક્ષિણીની કમાનમાં તેની અત્યાર સુધી ટ્રેનિંગ ચાલી રહી હતી.
શિવાંગીનું કોચ્ચીમાં થશે પોસ્ટીંગ
શિવાંગીએ હવે ટ્રેનિંગ પુરી કરી લીધી છે અને હવે તે કોચ્ચીમાં તૈનાત થશે. કમાન્ડ સંભાળ્યા બાદ શિવાંગી ડ્રોનિયર સર્વિલાંસ પ્લેન ઉડાડશે. ડ્રોનિયર 228 પ્લેનને હિન્દુસ્તાન એરોનોટિક્સ લિમિટેડે તૈયાર કર્યા છે. આ વિમાનને ઓછા અંતરના સમુદ્રી મિશન પર મોકલવામાં આવે છે. આમાં એડવાન્સ સર્વિલાંસ રડાર, ઈલેકટ્રોનિક્સ સેન્સર અને નેટવર્કિંગ જેવા અનેક શાનદાર ફિચર છે. આ ફિચરના દમ પર આ પ્લેન ભારતીય સમુદ્રી ક્ષેત્ર પર વોચ રાખશે..આનો મતબલ એ થયો કે બિહારની આ દીકરી હવે દુશ્મનોના દાંત ખાટા કરશે. બિહારનું નામ રોશન કરનારી સબ લેફ્ટિનેંટ શિવાંગીને વીટીવીના સલામ..