આવતીકાલે યોજાનાર જુનિયર ક્લાર્ક ની પરીક્ષાને લઈને બહારથી આવતા વિદ્યાર્થીઓ માટે કોઈ અગવડતા ન પડે તે માટે પોલીસ દ્વારા પણ તમામ તૈયારીઓ કરી દેવામાં આવી
જુનિયર ક્લાર્કની પરીક્ષાને લઈ બનાસકાંઠા વહીવટી તંત્ર દ્વારા તૈયારીઓ પૂર્ણ
બનાસકાંઠા જિલ્લામાં 176 કેન્દ્રો પર વિદ્યાર્થીઓ આપશે પરીક્ષા
બનાસકાંઠા પોલીસ દ્વારા બનાવાયેલ PDFથી વિદ્યાર્થીઓને મળશે મદદ
Google Map પર એક ક્લિક કરવાથી જે તે સ્થળ ઉપર વિદ્યાર્થી પહોંચી શકશે
ગુજરાતમાં આવતીકાલે જુનિયર ક્લાર્કની પરીક્ષા યોજાનાર છે. જેને લઈ બનાસકાંઠા વહીવટી તંત્ર દ્વારા તૈયારીઓ પૂર્ણ કરવામાં આવી છે. વિગતો મુજબ બનાસકાંઠા જિલ્લામાં 176 કેન્દ્રો પર વિદ્યાર્થીઓ પરીક્ષા આપશે. જુનિયર ક્લાર્ક ની પરીક્ષાને લઈને બહારથી આવતા વિદ્યાર્થીઓ માટે કોઈ અગવડતા ન પડે તે માટે પોલીસ દ્વારા પણ તમામ તૈયારીઓ કરી દેવામાં આવી છે.
બનાસકાઠાં જિલ્લામાં આવતીકાલે યોજાનાર જુનિયર ક્લાર્કની પરીક્ષાને લઈ તૈયારીઓ પૂર્ણ કરી દેવાઈ છે. આ તરફ બનાસકાંઠા પોલીસ દ્વારા એક PDFબનાવી છે. જેમાં Google Map પર એક ક્લિક કરવાથી જે તે સ્થળ ઉપર વિદ્યાર્થી પહોંચી શકે. વાત જાણે એમ છે કે, આ PDFમાં પરીક્ષા સંબંધિત શાળાઓના નામ અને એની સામે Google Map ની લિંક મૂકવામાં આવી છે. જેનાથી વિદ્યાર્થી સરળતાથી પરીક્ષા સ્થળે પહોંચી શકે. મહત્વનું છે કે, આ અગાઉ સ્કૂલ સંચાલકો તેમજ કલાસ સંચાલકો સાથે બેઠક કરવામાં આવી હતી.
પરીક્ષાને લઈ પોલીસ ખડેપગે
બનાસકાઠાં જિલ્લામાં જુનિયર ક્લાર્કની પરીક્ષાને લઈ બનાસકાંઠા જિલ્લા પોલીસ અધિક્ષક અક્ષયરાજના માર્ગદર્શન હેઠળ પરીક્ષાની સુરક્ષાનું આયોજન કરવામાં આવ્યું છે. જેમાં 5 Dy.SP, 10 PI, 43 PSI, 600 ASI, 300 મહિલા પોલીસ સહિત SRP જવાનો સુરક્ષા સંભાળશે. આ સાથે પરીક્ષા કેન્દ્રોમાં પહોંચવા માટે ટ્રાફિક ન નડે તે માટે ટ્રાફિક પોલીસ પણ તૈયાર રહેશે.
મહત્વનું છે કે, ગુજરાત સરકાર દ્વારા નવો કાયદો બનાવવામાં આવ્યો છે. જો કોઈ ગેરરીતિ કરશે તો તેની સામે પણ કડક કાર્યવાહી કરવામાં આવશે. આ તરફ હવે આવતીકાલે યોજાનારી પરીક્ષામાં વિદ્યાર્થીઓને કોઈ અગવડતા ના પડે તે માટે તમામ વ્યવસ્થા કરવામાં આવી છે.
પંચાયત સેવા પસંદગી મંડળના ઈન્ચાર્જ અધ્યક્ષ હસમુખ પટેલે જણાવ્યું કે, આવતીકાલે યોજાનારી પરીક્ષાનું પરિણામ જૂનમાં જાહેર થશે. દરેક પરીક્ષાખંડમાં CCTV કેમેરા લગાવાયા છે. ST વિભાગે વધારાની બસો પણ મુકી છે. વિદ્યાર્થીઓ માટે બસમાં ઓનલાઈન બુકિંગની વ્યવસ્થા કરવામાં આવી છે. જુનિયર ક્લાર્કની પરીક્ષાને લઈ પોલીસને ખાસ સૂચનો કરાયા છે. પરીક્ષા માટે તંત્ર અને પોલીસ તૈયાર છે. પરીક્ષા માટે અધિકારીઓને પણ ટ્રેનિંગ આપવામાં આવી છે.
લોકરક્ષકની જેમ આ પરીક્ષા પણ યોગ્ય રીતે લેવાશેઃ હસમુખ પટેલ
પંચાયત સેવા પસંદગી મંડળના ઈન્ચાર્જ અધ્યક્ષ હસમુખ પટેલે જણાવ્યું કે, ઉમેદવારોને તકલીફ ન પડે તે માટેના પ્રયાસ કરવામાં આવ્યા છે. ડમી ઉમેદવારોને હવે આસાનીથી પકડી શકાશે. પરીક્ષા આદર્શ રીતે લેવાય તે માટેની વ્યવસ્થા કરાઈ છે. પરીક્ષા દરમિયાન વીડિયોગ્રાફી પણ કરાશે. લોકરક્ષકની જેમ આ પરીક્ષા પણ યોગ્ય રીતે લેવાશે. પરીક્ષા આદર્શ રીતે લેવાશે તેની મને ખાતરી છે.
આરોપીઓએ પરીક્ષા આપી શકશેઃ પટેલ
પેપર લીક કાંડ સાથે સંકળાયેલા આરોપીઓને લઈને હસમુખ પટેલે જણાવ્યું છે કે, ATSએ ઝડપેલા આરોપીઓએ પરીક્ષા આપવી હશે તો આપી શકશે. ઝડપાયેલા આરોપી ઉમેદવારોને આગળ ગેરલાયક ઠેરવી શકાશે. લોકરક્ષકની જેમ આ પરીક્ષા પણ યોગ્ય રીતે લેવાશે. ATSએ ઝડપેલા આરોપીઓ સામે નવો કાયદો લાગુ નહીં થાય. આરોપીઓએ કાયદો લાગુ થયા અગાઉ ગુનો કર્યો છે.
મોબાઈલ લઈ જવા પર પ્રતિબંધ
તેમણે જણાવ્યું કે, જુનિયર ક્લાર્કની પરીક્ષાને લઈને 32 જિલ્લામાં 500થી વધુ સ્ક્વૉડ રાખવામાં આવશે. 11:45 કલાક સુધીમાં પરીક્ષાર્થીઓએ પરીક્ષાખંડમાં પહોંચવું પડશે. વર્ગખંડમાં મોબાઈલ લઈ જવા પર પ્રતિબંધ રહેશે. મોડા પહોંચનારા ઉમેદવારોને પ્રવેશ મળશે નહીં. પરીક્ષા દરમિયાન પરીક્ષક પણ મોબાઈલનો ઉપયોગ નહીં કરી શકે. પરીક્ષાર્થી પેન, ઓળખકાર્ડ અને કોલલેટર જ લઈ જઈ શકશે. 3 હજારથી વધુ કેન્દ્રો, 32 હજાર ઓરડાનો ઉપયોગ થશે. બોડીવોર્ન કેમેરાથી સતત રેકોર્ડિંગ થશે. ઉમેદવારો પાસેથી રિક્ષાચાલકો વધુ ભાડું ન વસૂલે તે માટે બેઠકો કરવામાં આવી છે. સાથે જ એસ.ટી તંત્ર અને પોલીસ તંત્રને જરૂરી સૂચનાઓ આપવામાં આવી છે. GPSSB ચેરમેન હસમુખ પટેલે પેપરલીક કરનારાઓને ચીમકી આપી છે કે, આ વખતે જો કોઇ પેપરલીક કરશે તો તેને બક્ષવામાં નહીં આવે.
9.58 લાખ ઉમેદવારો આપશે પરીક્ષા
અત્રે ઉલ્લેખનીય છે કે, જુનિયર ક્લાર્કની પરીક્ષાને લઇને તંત્ર દ્વારા તમામ તૈયારીઓ પૂર્ણ કરી દેવામાં આવી છે. જુનિયર ક્લાર્કની પરીક્ષામાં રાજ્યના 9 લાખ 58 હજાર ઉમેદવારો પરીક્ષા આપશે. રાજ્યના 3 હજાર કેન્દ્રો પર પરીક્ષાનું આયોજન કરવામાં આવ્યું છે. પરીક્ષામાં કોઇ પણ પ્રકારની ગેરરીતિ ન થાય તે માટે પરીક્ષા કેન્દ્રો જાણી જોઇને દૂર રાખવામાં આવ્યા છે. વિદ્યાર્થીઓને પરીક્ષા કેન્દ્રો સુધી પહોંચવામાં કોઇ મુશ્કેલી ન પડે તે માટે હેલ્પલાઇન નંબર પણ જાહેર કરવામાં આવ્યા છે.