બેદરકારી / તંત્રના વાંકે ગામના વિદ્યાર્થીઓને કડકડતી ઠંડીમાં પણ પાણી વચ્ચેથી થવું પડે છે પસાર

• કડકડતી ઠંડીમાં વેઠાતી હાલાકી
• રોજ થવું પડે છે આ રીતે પસાર
• રજૂઆત છતાં ન બન્યો કોઝવે

પાણી ભરેલા વિશાળ રસ્તાની પેલે પાર ઉભા રહીને બાળકો છેલ્લા દોઢ માસથી પાણી કયારે સુકાય તેની રાહ જોઈ રહ્યા છે. અમરેલી જિલ્લાના સાવરકુંડલા તાલુકાના સમીરણ ગામના અનેક બાળકોને નિશાળે જતા પહેલા આ પાણીમાંથી પસાર થવું પડે છે.

ઢીંચણ સુધી ભરેલા પાણીમાંથી વિદ્યાર્થીઓ થાય છે પસાર

ઢીંચણ સુધી ભરેલા પાણીમાં બાળકોએ દરરોજ માથા પર દફતર, લંચ બોકસ અને પાણીની બોટલ લઈને પસાર થવું પડે છે. રસ્તા  પર પાણી ભરેલું હોવાથી નાના બાળકોના વાલીઓએ તેમની સાથે આવવું પડે છે.  વારંવાર રજૂઆત છતાં હાલાકીમાં કોઈ ફેર પડયો નથી. 

3 કિલોમીટર સુધી ભરાયેલું છે પાણી

આ હાલાકીનું કારણ નર્માદના પાણીની લીકેજ થયેલી પાઈપ છે. સીમરણ ગામના પાટીયાથી સીમરણ ગામ સુધીના 3 કિલોમીટર સુધી આ પાણી ભરાયેલું છે. નર્મદા પાણીના હેડવર્ક સંપથી માથી તેમજ પાઈપ માંથી લિકેજ થતું પાણી અને સંપનું ઓવરફ્લોનું પાણી છેલા એક દોઢ માસથી વહી જઈ રહ્યું છે. 

જેના કારણે આ જગ્યાએ કાયમ નદી વહેતી હોય તેવી સ્થિતિ ઊભી થઈ છે. પાણીથી  ભરેલા આ વહેણમાંથી રોજ સીમરણના નાના ભૂલકાઓ પસાર થવા મજબૂર થયા છે. છેલ્લાં દોઢ મહિનાથી આ સ્થિતિ છે. પરંતુ તંત્ર કહે છે અમને મીડિયાના માધ્યમથી આજે જાણ થઈ છે. પગલાં ભરીશું.