સંઘપ્રદેશ દાદરા નગર આવેલી એક સરકારી સ્કૂલમાં શાળાના વિદ્યાર્થીઓ શાળા પરિસરમાં દારૂની મહેફિલ માણતા હોવાના દ્રશ્યો કેમેરામાં કેદ થયા છે. ટોકરખડા સ્કૂલના પરિસરમાં જ વિદ્યાર્થીઓની દારૂની મહેફિલ ચર્ચાનું કેન્દ્ર બની છે. સોશિયલ મીડિયામાં થયેલ આ વાયરલ વીડિયોને ગંભીરતાથી લેતા આ ન્યુઝ વીટીવી દ્વારા પ્રસારિત થતા દાદરા નગર હવેલીનું પ્રશાસન દોડતું થઇ ગયું હતું. વીટીવીની ટીમે આ સ્કુલની સ્થળ તપાસ કરતા અનેક ચોંકવનારા ખુલાસા પણ થયા છે.
નશાનું શિક્ષણ?
સ્કુલ ગણવેશમાં દારૂની મહેફિલ માણતા આ વિદ્યાર્થીઓને જોઈને કોઇપણ વાલીને જરૂરથી ચિંતા થશે. આપને જણાવી દઈએ કે આ વીડિયો સંઘપ્રદેશ દાદરા નગર હવેલીની એક સરકારી શાળાનો છે. પાટનગર સેલવાસના ટોકર ખાડામાં આવેલ સરકારી શાળાના બાળકો સ્કૂલમાં જ દારૂની મહેફિલ માણતા કેમેરામાં કેદ થયા છે. નાની ઉંમરના વિદ્યાર્થીઓ શાળાના જ ટોયલેટની પાછળ બિન્દાસ્ત દારૂની મહેફિલ માણતા આ વિદ્યાર્થીઓને નથી શિક્ષકોનો ડર કે નથી કોઈ ડર માતા પિતાનો.
આ અહેવાલ વીટીવી દ્વારા પ્રસારિત થતા તાત્કાલિક પ્રદેશના શિક્ષણ વિભાગના ઉચ્ચ અધિકારીઓ સ્કૂલની મુલાકાત લીધી હતી. સ્થળનું નિરીક્ષણ કર્યું હતું. સેલવાસના ટોકરખાડાની સરકારી સ્કૂલનો આ વીડિયો હોવાનું બહાર આવ્યું છે. અધિકારીઓએ વીડિયોમાં દેખાઈ રહેલા વિદ્યાર્થીઓની ઓળખ સહિતની કાર્યવાહી હાથ ધરી હતી.
પોલીસે જગ્યા પરથી દારૂની ખાલી બોટલો પણ કબજે કરી
ટોકારખાડાની આ સરકારી શાળામાં કેટલાક વિદ્યાર્થીઓ નશાના રવાડે ચડી ગયેલ હોવાના ચોંકાવનાર સમાચારને પગલે પ્રશાસનમાં હડકંપ મચી જવા પામ્યો હતો. સ્થળ પર પ્રદેશના શિક્ષણ વિભાગના ઉચ્ચ અધિકારીઓ અને પોલીસે શાળાના આચાર્યને સાથે રાખી જે જગ્યા પર દારૂની મહેફિલ જામી હતી તે જગ્યાનું નિરીક્ષણ કર્યું હતું. પોલીસે જગ્યા પરથી દારૂની ખાલી બોટલો પણ કબજે કરી છે. આમ હવે આ મામલાને પ્રશાસને આ વિષય ગંભીરતાથી લઈ અને તપાસનો ધમધમાટ શરૂ કર્યો છે. ત્યારે આ વીડિઓ સેલવાસના એક સમાજસેવક રાજેશ હળપતિ દ્વારા શૂટ કરવામાં આવ્યો હતો. ત્યારે રાજેશભાઈ દ્વારા માંગ કરવામાં આવી છે કે શાળાની બાજુમાં વેંચતા નશીલા પદાર્થો પર રોક લગાવી જોઈએ.
પોલીસ તંત્ર નશાના આ કારોબાર પર રોક લગાવે તે જરૂરી...
દાદરા નગર હવેલીમાં માઇનોર યુવક દ્વારા નાશાનું સેવનના વીડિયો વાયરલ થવાની આ પહેલી ઘટના નથી. અગાઉ પણ અનેક વાર યુવક યુવતીઓના નશાનું સેવન કરતા વીડિયો વાયરલ થયા છે. ત્યારે આ મામલે પ્રદેશનું પોલીસ તંત્ર નશાના આ કારોબાર પર રોક લગાવે તે જરૂરી બન્યું છે.