કેમ ભણશે ગુજરાત? / દેશનાં ભાવિને માથે મોત ઝળુંબે છે! બનાસકાંઠાના આ ગામમાં છેલ્લાં 3 વર્ષથી બાળકો ક્લાસરૂમ વિહોણાં

રાજ્ય સરકાર શિક્ષણના નામે અનેક કાર્યક્રમો ચલાવે છે. પ્રજ્ઞા આધારિત વર્ગખંડો અને સ્માર્ટ ક્લાસરૂમની વાતો કરાઈ રહી છે. પરંતુ આ બધી વાત જાણે કોઈ જુદી જ દુનિયા માટે હોય તેવું તમને ચોક્કસ લાગશે કે તમે જ્યારે બનાસકાંઠા જિલ્લાની કેટલીક શાળાઓની હાલત નજરે જોશો. કેમ કે નવી શિક્ષણનીતિ ઘડવાની વાતો વચ્ચે કાંકરેજ તાલુકાની કેટલીક શાળાઓ (school) ના બાળકો ક્લાસરૂમ વિહોણાં ખૂલ્લામાં ભણવા મજબૂર બન્યા છે. ત્યારે જોઈએ આ અહેવાલ.

ઓરડાના અભાવે બાળકો ખુલ્લામાં ભણતા વાલીઓ મુંઝવણમાં:

ગુજરાત (gujarat) માં અહીં વિદ્યાર્થીઓ ઝાડ નીચે બેસીને અભ્યાસ કરતા જોવા મળે છે. ગુજરાત કે જેનું વિકાસ મોડલ સમગ્ર દેશમાં વખણાય છે. આ એ જ ગુજરાતની વરવી વાસ્તવિકતા જોવાં મળી રહી છે. જ્યાં એક તરફ સ્માર્ટ ક્લાસરૂમની વાતો થાય છે અને બીજી તરફ આ જર્જરિત ક્લાસરૂમનો કાટમાળ ઉતારી લેવાની તંત્રને ફુરસદ નથી. આપણે અહીં વાત કરી રહ્યાં છીએ બનાસકાંઠા (banaskantha) જિલ્લામાં આવેલ કાંકરેજ તાલુકાના બુકોલી (bukoli) ગામની શાળાની કે જ્યાં વિદ્યાર્થી અભ્યાસ કરવા તો આવે છે પરંતુ શાળામાં ઓરડાના અભાવે વિદ્યાર્થીઓને ઝાડ નીચે બેસીને જ અભ્યાસ કરવો પડે છે.

અહીં કોઈ પણ ઋતુ હોય, પણ છેલ્લાં ત્રણ વર્ષથી આ રીતે બાળકો ખુલ્લામાં જ અભ્યાસ કરી રહ્યાં છે. અહીં વાલીઓ પોતાના બાળકોને શાળાએ તો નિયમિત મોકલે છે પરંતુ ચોમાસાની ઋતુમાં પોતાના બાળકની કેવી હાલત હશે એ વિચારથી વાલીઓ ચિંતામાં મુકાઈ જાય છે અને ઘણી વાર વરસાદ શરૂ થતાં જ વાલીઓ બાળકોને ઘરે પરત લઈ જાય છે.

આ બુકોલી ગામની પે સેન્ટર શાળામાં 290 જેટલા વિદ્યાર્થીઓ અભ્યાસ કરી રહ્યાં છે. આ શાળા ધોરણ એકથી આઠ સુધીની છે.પરંતુ આ શાળાના નવ વર્ગખંડો ડેમેજ થઈ ગયા છે. છત પરના પતરા પણ તૂટી ગયા છે તો દીવાલોમાં તિરાડો પડી ગઈ છે. છેલ્લાં 3 વર્ષથી આ ઓરડાઓ ડેમેજ છે અને ઓરડાઓને ભયજનક કેટેગરીમાં મૂકવામાં આવ્યાં છે. ડેમેજ વર્ગખંડોનો કાટમાળ ઉતારવાની મંજૂરી પણ આપી દેવાઈ છે. પરંતુ હજુ સુધી નથી તો ઓરડા પરથી કાટમાળ ઉતારાયો કે નથી નવા ક્લાસરૂમ માટે બાંધકામ શરૂ કરાયું.

તંત્રનાં આંખ આડા કાનઃ

તંત્રને નવા ઓરડાઓ બનાવી આપવાની જાણે ફુરસદ જ મળી નથી. જેના કારણે આ શાળાના બાળકો દરેક ઋતુમાં ખુલ્લામાં અભ્યાસ કરવા મજબૂર છે. વાલીઓએ અનેક વાર લેખિત અને મૌખિક રજૂઆત કરી છે. શાળાના આચાર્યએ પણ જ જિલ્લા પંચાયતના એન્જિનિયરને રજૂઆત કરી છે. પરંતુ હજુ સુધી કોઈ કાર્યવાહી થઈ નથી.

સરકારને દરિયામાં પૂલ બનાવવા સહેલાં લાગે છે. સરકારને મેટ્રો રેલના પાટા પાથરવા સહેલા લાગે છે. સરકારને રાજમાર્ગોના વિસ્તૃતિકરણના ભગીરથ પ્રોજેક્ટો પૂરા કરવા સરળ લાગે છે. પરંતુ દર વખતે શાળાના વર્ગખંડો રિપેરિંગની વાત હોય કે નવા વર્ગખંડોનું નિર્માણ કરાવવાની વાત હોય ત્યારે કેમ વર્ષો સુધી ફાઈલો ટલ્લે ચડતી રહે છે તે સમજાતું નથી. માળખાગત સુવિધાઓ વિકસાવવી સારી વાત છે પરંતુ દેશના પાયાની વાત હોય તો તેને પ્રાથમિકતા આપવી જરૂરી છે.