અત્યાર સુધી પોતાની પડતર માંગણીઓને લઈને અથવા શિક્ષકોના ત્રાસના કારણે વિદ્યાર્થીઓ આંદોલન પર ઉતર્યા હોવાના ઘણા સમાચાર વાંચ્યા અને જોયા હશે, પરંતુ આજે સુરતમાં વિદ્યાર્થીઓ શિક્ષકના સમર્થનમાં રસ્તા પર ઉતર્યા છે. મળતી માહિતી અનુસાર, સુરત મહાનગરપાલિકા સંચાલિત એક શાળાના શિક્ષકને છૂટા કરવામાં આવતા વિદ્યાર્થીઓ રોષ ભભૂકી ઉઠ્યો છે.
વિદ્યાર્થીઓ બેસી ગયા ધરણાં પર
શહેરના પાડેસરા વિસ્તારના નાગરસેન નગરની સૂમન હાઈસ્કૂલના એક શિક્ષકને ફરજ મુક્ત કરવામાં આવતા વિદ્યાર્થીઓ ધરણા પર બેસી ગયા છે. વિદ્યાર્થીઓ દ્વારા શિક્ષકને પરત ફરજ પર લેવાની માંગ કરવામાં આવી રહી છે. શિક્ષકને જ્યાં સુધી પરત બોલાવવામાં નહીં આવે ત્યાં સુધી તેઓ પોતાનું આંદોલન ચાલું રાખશે તેવી ચીમકી પણ વિદ્યાર્થીઓ દ્વારા ઉચ્ચારવામાં આવી છે.
તેમની કોઈ ભૂલ વગર પ્લાનિંગ સાથે કરાયા ફરજ મુક્તઃ વિદ્યાર્થીઓ
આ અંગે જણાવતા વિદ્યાર્થીઓએ કહ્યું કે, 'અમારી શાળાના શિક્ષકને તેમની કોઈ ભૂલ વગર પ્લાનિંગ સાથે ફરજ મુક્ત કરવામાં આવ્યા છે. વિભૂતિ સરને ન્યૂમોનિયા થઈ ગયો હોવાથી તેઓ 10 દિવસથી રજા પર છે. ત્યારે તેમના સ્થાને અન્ય શિક્ષકોને બોલાવવામાં આવ્યા છે. જોકે, નવા આવેલા શિક્ષક જે ભણાવે છે તે અમને સમજમાં આવી રહ્યું નથી.'
અમે પણ સ્કૂલમાંથી LC લઈને નીકળી જઈશુંઃ વિદ્યાર્થીઓ
વિદ્યાર્થીઓએ વધુમાં જણાવ્યું કે, 'વિભૂતિ સર અમને ઘણા વર્ષોથી ભણાવે છે. જો તેઓ સ્કૂલમાંથી નીકળી જશે તો અમે પણ સ્કૂલમાંથી એલસી લઈને નીકળી જઈશું. જ્યાં સુધી વિભૂતી સર નહીં આવે ત્યાં સુધી અમે અહીંથી હટીશું નહીં.'