અહો આશ્ચર્યમ..! ગુજરાતની આ શાળાના 3 વિદ્યાર્થીઓ સ્કૂલમાં આવીને અચાનક લાગે છે ધુણવા

ડાંગમાં આવેલા વઘઈ તાલુકાના આંબાપાડા ગામની પ્રાથમિક શાળામાં 3 વિદ્યાર્થીઓ અજીબ વર્તન કરી રહ્યા છે. ધોરણ 6 અને 8માં અભ્યાસ કરતા 3 બાળકોના શાળામાં આવ્યા બાદ 11 વાગ્યા પછી એકાએક જ હાવભાવ બદલાઈ જાય છે. સ્કૂલના 3 બાળકો જમીન ઉપર સાપની જેમ વર્તન કરવા લાગે છે અથવા તો ધ્રુજવા કે ધુણવા લાગે છે.

ઉલ્લેખનીય છે કે સ્કૂલમાં એકાએક 3 વિદ્યાર્થીઓ આ પ્રકારની સ્થિતિમાં આવતા અન્ય વિદ્યાર્થીઓમાં ભયનો માહોલ જોવા મળે છે. આ ત્રણેય વિદ્યાર્થીઓમાં નાગ દેવતા આવતા હોવાનો ગ્રામજનો દ્વારા દાવો કરવામાં આવી રહ્યો છે.

આ મામલે શાળાના આચાર્ય ટંડેલે ટીપીઓને ઉચ્ચસ્તરે રજૂઆત પણ કરી હતી. પરંતુ અત્યાર સુધીમાં સરકારી અધિકારીઓ દ્વારા કોઈ પણ કાર્યવાહી કરવામાં આવી નથી. જેના કારણે બાળકો અને શિક્ષકો પરેશાની ભોગવી રહ્યા છે.

આપને જણાવી દઇએ કે આ ત્રણેય વિદ્યાર્થીઓ સતત 3 કલાક સુધી જમીન ઉપર સાપની માફક સરકવા લાગે છે અથવા તો અચાનક ધુણવા લાગે છે. તો ઘણીવાર એવા પ્રસંગો પણ બને છે કે ધુણતા-ધુણતા તેઓ શાળાની દિવાલ સાથે પોતાનું માથું અથડાવે છે. આ સમગ્ર ઘટનાથી સ્કૂલનો સ્ટાફ પણ ચિંતિત છે. ગત 15 દિવસથી 150 વિદ્યાર્થીઓનું શિક્ષણ પણ અધ્ધરતાલ થયું છે.

11 વાગ્યા બાદ બને છે આ ઘટના 
ડાંગ જિલ્લાના વઘઇ તાલુકાના આંબાપાડા ગામની પ્રાથમિક શાળાના 3 વિદ્યાર્થીઓ રોજ સવારના 11 વાગ્યા બાદ સતત 3 કલાક સુધી આ પ્રકારની હરકત કરે છે. સંસ્થાના આચાર્ય અને શિક્ષકો પણ વિદ્યાર્થીઓની આ પ્રકારની હરકતથી અચંબિત થઇ ઉઠે છે.