અમદાવાદ / ભણવા બાબતે બાળકોને ઠપકો આપતાં વિદ્યાર્થીએ કર્યું આવુ, વાલીઓ માટે આ કિસ્સો આંખ ઉઘાડનારો

• વિદ્યાર્થીને માતા પિતાએ ઠપકો આપતા ઘર છોડ્યું
• વિદ્યાર્થી ધોરણ 10માં હતો
• પોલીસે વિદ્યાર્થીની શોધખોળ શરુ કરી છે
   

શહેરમાં વિદ્યાર્થીઓ ગુમ થવાના કિસ્સા દિવસે ને દિવસે વધી રહ્યા છે. માતા-પિતા બાળકોને ભણવા કે સ્કૂલે ન જવા બાબતે ઠપકો આપતાં હોવાથી તે ઘર છોડીને જતાં રહે છે ત્યારે આવા જ એક કિસ્સામાં સોલા વિસ્તારમાં રહેતા ધોરણ-૧૦ના વિદ્યાર્થીને પિતાએ ભણવા બાબતે ઠપકો આપ્યા બાદ વિદ્યાર્થી રહસ્યમય રીતે ગુમ થઇ જવાની ઘટના બનતાં ચકચાર મચી જવા પામી છે. 
પોલીસે વિદ્યાર્થીની  શોધખોળ શરૂ કરી છે. સોલામાં આવેલ સાયોના સિટીમાં રહેતા પ્રદ્યુમન ચુડાવતે સોલા પોલીસ સ્ટેશનમાં ફરિયાદ કરી છે. તેમનો દીકરો બ્રિજરાજસિંહ ધોરણ-૧૦માં અક્ષર વિદ્યાલયમાં અભ્યાસ કરતો હતો અને તે બોર્ડમાં નાપાસ થતાં ઘરે બેસીને પરીક્ષાની તૈયારી કરે છે.

ગઈ કાલે સવારે પ્રદ્યુમનસિંહનાં પત્ની ઊઠ્યાં ત્યારે તેમનો દીકરો ઘરમાં હાજર ન હતો. ત્યારબાદ પ્રદ્યુમનસિંહે સોલા વિસ્તાર તેમજ આજુબાજુ, રેલવે સ્ટેશન, બસ સ્ટેન્ડ તથા અન્ય સ્થળ પર તેની શોધખોળ કરી હતી. ત્યારબાદ અન્ય લોકોએ બ્રિજરાજસિંહની શોધખોળ કરી, પરંતુ તેનો કોઈ પત્તો મળી આવ્યો ન હતો, ગઈ કાલે સાંજે પિતાએ પુત્રને અભ્યાસ બાબતે ઠપકો આપ્યો હતો, જેથી તેને મનમાં લાગી આવતાં તે ઘરેથી જતો રહ્યો હતો. ત્યારબાદ સોલા પોલીસ સ્ટેશનમાં વિદ્યાર્થી કોઈક કારણસર ક્યાંક ચાલી ગયો છે અથવા કોઈક અજાણ્યો ઈસમ તેનું અપહરણ કરી ગયાની શંકા વ્યક્ત કરી પોલીસને જાણ કરી હતી. આ અંગે પોલીસે ફરિયાદ દાખલ કરી ગુમ થયેલ વિદ્યાર્થીની  શોધખોળ શરૂ કરી છે