ચીનના હુબેઇ પ્રાંતના વુહાન શહેરમાં ફરી એકવાર કોરોના વાયરસ આવી પહોંચ્યો છે. આ વખતે કોરોના વાયરસ વુહાનમાંથી પેદા થયો નહીં પરંતુ આ કોરોના વિદેશથી અહીં આવી પહોંચ્યો છે. તેને લઇને આવ્યો છે એક વિદ્યાર્થી જે ઇગ્લેન્ડમાં અભ્યાસ કરતો હતો. તપાસમાં ખબર પડી તેને કોરોના નથી માટે તેને ચીન જવાની મંજૂરી મળી હતી પરંતુ વુહાન પહોંચ્યા બાદ જાણવા મળ્યું તે કોરોના પોઝિટિવ છે.
કોરોના મુક્ત વુહાનમાં ફરી એક કોરોનાનો કેસ
ઇંગ્લેન્ડથી આવેલો યુવક કોરોના પોઝિટિવ
સરકાર થઇ સાવધ
16 વર્ષના આ વિદ્યાર્થીનું નામ ઝોઉ હોવાનું જાણવા મળ્યું છે, તે કોરોના સંક્રમણથી લગભગ મુક્ત થઇ ચૂકેલા વુહાનમાં ફરી કોરોના લઇને આવ્યો હતો. વુહાનમાં છેલ્લા 10 દિવસમાં કોરોના વાયરસના એક પણ કેસ સામે આવ્યો નથી. પરંતુ આ વિદ્યાર્થીને કારણે ચીનની સરકારની ફરી ઉંઘ હરામ થઇ ગઇ છે.
ઇમ્પોર્ટ થયેલો પ્રથમ કોરોના કેસ
વુહાનના સ્થાનિક તબીબી અધિકારીઓએ જણાવ્યું હતું કે ઝોઉ વુહાનનો આ પહેલો ઇમ્પોર્ટ થયેલ કેસ છે. એટલે કે, વિદેશથી ચેપ લાગ્યા બાદ વુહાનનો પહેલો કિસ્સો સામે આવ્યો છે. જો કે તેની અંદર કોઈ ચિહ્નો નહોતા.
ઇંગ્લેન્ડથી પહોંચ્યો વુહાન
હુબેઇ પ્રાંતમાં લોકડાઉન હટાવાયો હોવાના અહેવાલ મેળવ્યા બાદ ઝોઉ ઇંગ્લેન્ડના ન્યૂકૈસલ શહેરથી દુબઇ થઇને બેઇજીંગ પહોંચ્યો હતો અને ત્યારબાદ ત્યાંથી વુહાન પહોંચ્યો હતો.
ચીની સરકાર થઇ સાવધ
ડેઇલી મેઇલના અહેવાલ અનુસાર, આ વિદ્યાર્થી કોરોના પોઝિટિવ હોવાનું માલુમ પડ્યા બાદ ચીની સરકાર ફરીવાર સાવધ બની છે. કારણ કે અત્યાર સુધી ચીનમાં ઇમ્પોર્ટ કોરોના કેસની કુલ સંખ્યા 691 હતી. જ્યારે, ચીનથી હજારો સંક્રમિત લોકો વિશ્વના દેશોમાં ગયા હતા.
કોરોનાથી યુરોપીય દેશો વધુ પરેશાન
આપને જણાવી દઇએ કે, દુનિયામાં જો સૌથી વધુ કોઇ કોરોના વાયરસથી પરેશાન હોય તો તે છે યુરોપીય દેશો. યૂકેમાં કોવિડ-19 કોરોના વાયરસના કારણે 1800 લોકોના મોત થયાં છે જ્યારે 25 હજારથી વધુ લોકો સંક્રમિત છે.
કોરોના પીડિતોને સારવાર હેઠળ રાખવામાં આવ્યા
ચીનના હુબેઇ પ્રાંતમાં સરકારે આવા 982 લોકોની ઓળખ કરી છે જેમને કોરોના વાયરસનો ચેપ છે પરંતુ તેઓ કોઈ લક્ષણો બતાવતા નથી. આ તમામ લોકોને હોસ્પિટલોમાં ડોકટરોની દેખરેખ હેઠળ રાખવામાં આવ્યા છે.
21 માર્ચે ઝોઉ ઇંગ્લેન્ડથી નીકળ્યો
ઉલ્લેખનીય છે કે, ઝોઉ 21 માર્ચે ન્યૂકૈસલ ઇન્ટરનેશનલ એરપોર્ટ પહોંચ્યો ત્યાં તેની તપાસ થઇ જેમાં કોરોનાના લક્ષણો જણાઇ આવ્યા નહીં માટે તેને આગળ જવાની મંજૂરી આપવામાં આવી ત્યારબાદ તે બેઇજીંગ પહોંચ્યા ત્યાં પણ કોરોનાના લક્ષણો નહીં દેખાતા તે વુહાન તરફ આગળ વધ્યો.
28 માર્ચે ખબર પડી કે તે કોરોના સંક્રમિત છે
23 માર્ચે તે બેઇજિંગથી હાઈસ્પીડ ટ્રેન દ્વારા વુહાન આવવા રવાના થઈ. વુહાન પહોંચતાની સાથે જ તેને આઇસોલેશનમાં રાખવામાં આવ્યો હતો. 28 માર્ચે તેને ન્યુક્લિક એસિડ ટેસ્ટ કરવામાં આવ્યો. તે પછી તેને કોરોના વાયરસ સંક્રમિત હોવાનું સામે આવ્યું હતું.