પાલનપુરમાં રહેતા વૃદ્ધાની મતદાન કરવાની જીદ; 101 વર્ષના થયા છે અને પગમાં 18 ટાંકા આવ્યા હોવા છતા તેઓ ચૂંટણીમાં મતદાન કરવાની હઠ કરીને બેઠા છે
101 વર્ષના વૃદ્ધાની મતદાન કરવા જીદ
પાલનપુરમાં રહે છે આ વૃદ્ધા
44 વખત મતદાન કરી ચૂક્યા છે
પ્રથમ તબક્કાની ચૂંટણીમાં મતદાન ઓછુ થયુ છે ત્યારે બીજા તબક્કામાં લોકો મતદાન કરે તે માટે પ્રયાસો કરવામાં આવ્યા હતાં. ઉત્તર અને મધ્ય ગુજરાતની 93 બેઠકો પર આવતીકાલે મતદાન થવાનો છે. બીજા તબક્કાના મતદાન પહેલા રાજકીય માહોલ સતત જામી રહ્યો છે. આ બધાની વચ્ચે પાલનપુરમાં 101 વર્ષના વૃદ્ધ મતદાન કરવા માટે જીદ લઈને બેઠા છે.
101 વર્ષના વૃદ્ધાની મતદાન કરવા જીદ
1 ડિસેમ્બરે પ્રથમ તબક્કાનું મતદાન યોજાયુ જેમાં 63.29 ટકા મતદાન થયુ છે. જ્યારે બીજા તબક્કાનું મતદાન 5 ડિસેમ્બર એટલે કે આવતી કાલે યોજાવાનું છે. લોકો વધુમાં વધુ મતદાન કરે તે માટે ચૂંટણી પંચ લોકોને અપીલ કરી રહ્યુ છે. ત્યારે તમને એક એવા વૃદ્ધા સાથે વાત કરીએ કે જેમની ઉંમર 101 વર્ષ છે. જેઓ મતદાન કરવા માટે જીદ લઈને બેઠા છે. તમને સ્ક્રીન પર દેખાતા વૃદ્ધા પાલનપુરની મીઠી વાવડીમાં વિસ્તારમાં રહે છે અને તેમનું નામ મહેરૂનીશા કાદરી ઉર્ફે મેરુમા છે. થોડા દિવસ પહેલા પડી જવાના કારણે તેમને પગે 18 ટાંકા આવ્યા હતા. પગમાં ટાંકા આવવાથી તેઓ ચાલી પણ શક્તા નથી. તો પણ તેઓ તેમના દિકરાને કહી રહ્યા છે કે, પાંચ તારીખે મને મતદાન કરવા અવશ્ય લઈ જજે.
મતદાન કરવાની હઠ
મેરુમા એ દેશ અને ગુજરાતમાં ચૂંટણીની શરૂઆત થઈ ત્યારથી લઈને અત્યાર સુધીની તમામ ચૂંટણીમાં મતદાન કર્યુ છે. ગ્રામપંચાયત, નગરપાલિકા, વિધાનસભા તથા લોકસભાની તમામ ચૂંટણીમાં તેમણે મતદાન કર્યુ છે. આ વખતની ચૂંટણીમાં તેઓ 101 વર્ષના થયા છે અને 18 ટાંકા આવ્યા હોવા છતા તેઓ ચૂંટણીમાં મતદાન કરવાની હઠ કરીને બેઠા છે. સરકાર અને ચૂંટણીપંચ દ્વારા વધુમાં વધુ મતદાન થાય તે માટે અનેક જાગૃત્તા ચલાવવામાં આવે છે. ત્યારે મેરુમા નો ચૂંટણીમાં મતદાન અંગેનો જુસ્સો લોકશાહીને વધુ મજબૂત કરે છે.