કોરોનાકાળમાં જ્યાં અનેક બિઝનેસ પડી ભાંગ્યા છે ત્યારે ટાયરની આ કંપનીમાં રોકાણકારોને પાંચ જ મહિનામાં 105 ટકા રીટર્ન મળ્યું છે.
બે વર્ષથી દબાણમાં ઓટો ઇન્ડસ્ટ્રીઝ પણ આ કંપનીને બખાં
છેલ્લા પાંચ મહિનામાં જ રોકાણકારોને શાનદાર 105 ટકા રિટર્ન મળ્યું
માર્ચમાં 700 રૂપિયાનાં શેર આજે 1400ના થઇ ગયા
ભારતમાં ઓટો ઇન્ડસ્ટ્રીઝ છેલ્લા બે વર્ષથી દબાણમાં છે. એવામાં આ વર્ષે કોરોના વાયરસ સંકટના કારણે ગાડીઓના વેચાણ પર પણ જોરદાર અસર થઇ છે પરંતુ પાચ મહિનામાં જ એટલે કે માર્ચથી થોડા સુધારા પણ જોવા મળ્યા છે. શેર બજારમાં ઓટો ઇન્ડસ્ટ્રીઝના શેરમાં સારી એવી તેજી જોવા મળી રહી છે.
છેલ્લા પાંચ મહિનામાં ઓટોમોબાઇલ બિઝનેસથી જોડાયેલા શેરમાં સારું રીટર્ન મળી રહ્યું છે. ઓટો શેરમાં ખરીદીનો સૌથી મોટો ફાયદો બાલકૃષ્ણ ઇન્ડસ્ટ્રીઝને થયો છે. છેલ્લા પાંચ મહિનામાં જ રોકાણકારોને શાનદાર 105 ટકા રિટર્ન મળ્યું છે.
આ શેરમાં 100 ટકાથી વધારે રિટર્ન મળ્યું છે ત્યારે બીજી તરફ ઓટોમોબાઇલ મંદ પડ્યું છે. જાણકારો અનુસાર આ સેક્ટરમાં બે વર્ષ પહેલા જેવી તેજી આવી જશે તો રોકાણકારોને આનાથી પણ સારું રિટર્ન મળી જશે.
બાલકૃષ્ણ ઇન્ડસ્ટ્રીઝના શેર માર્ચ મહિનામાં 700 રૂપિયાની આસપાસ હતા અને તે બાદ સતત તેમાં ઉછાળો જોવા મળી રહ્યો છે. 26 ઓગસ્ટના રોજ NSE પર આ જ શેરનો ભાવ 1400 રૂપિયા પર આવી ગયો છે અને કારોબાર દરમિયાન ભાવ વધીને 1410 સુધી પહોંચી ગયો હતો.
નોંધનીય છે કે અન્ય કંપનીઓની સરખામણીએ બાલકૃષ્ણ ઇન્ડસ્ટ્રીઝને એક્સપોર્ટનાં કારણે ખૂબ ફાયદો થયો છે. કંપનીની કુલ આવકની 80 ટકા આવક એક્સપોર્ટમાંથી જ થાય છે અને આ કંપની પોતાના પ્રોડક્ટને અમેરિકા, જર્મની, ફ્રાંસ, યુકે અને ઇટાલીમાં એક્સપોર્ટ કરે છે.
બાલકૃષ્ણ ઇન્ડસ્ટ્રીઝ ટાયરનો બિઝનેસ કરે છે અને આ કંપની ઔરંગાબાદ, ભીવાડી, ચોપાંકી, ડોંબીવલી અને ભુજમાં ફેક્ટરીઓ ધરાવે છે.