આજથી ટ્રાફિકના નિયમો બદલાયા છે. હવે પકડાયા તો ખેર નથી. જો તમે હવે ટ્રાફિકના નિયમોને નહીં અનુસરો, તો દર મહિને 4થી 5 હજાર રૂપિયા દંડ ભરવાની તૈયારી રાખજો. કારણ કે આજથી દેશમાં ટ્રાફિકના નિયમો બદલાઇ ગયા છે.
આજથી દેશમાં RTOના નવા નિયમ લાગુ થઇ ગયા છે. લાગુ થયેલા ટ્રાફિકના નવા નિયમોમાં ટ્રાફિકના નિયમો તોડનારને આકરા દંડ થશે. નવા નિયમ મુજબ હવે લાઇસન્સ વિના પકડાવા પર રૂપિયા 5 હજારનો દંડ કરાશે અને ડ્રિંક એન્ડ ડ્રાઇવમાં 6 મહિનાની જેલ થશે.
આ ઉપરાંત જો ડ્રિંક એન્ડ ડ્રાઇવમાં બીજીવાર પકડાયા તો 2 વર્ષની જેલ અને 15 હજારનો દંડ થઇ જશે. રાજ્યમાં અને ખાસ અમદાવાદમાં ટ્રાફિકની સમસ્યા એ સૌથી મોટી છે. આ દરમિયાન ટ્રાફિકના નિયમો તોડનારની પણ નવાઇ નથી. ટ્રાફિકના નિયમોને અવગણીને થતા ડ્રાઈવીંગથી જ અકસ્માતો થાય છે. જેનો ભોગ નિયમો તોડનાર અને નિર્દોષ વ્યક્તિઓ ભોગ બને છે. જેના પગલે પોલીસ હવે કડક નિયમો અમલમાં લાવી રહી છે.