વડોદરા MS યુનિવર્સિટીમાં બહાર આવેલ છેડતી અને મારામારી કેસમાં પાંચ વિદ્યાર્થીઓ સામે કડક કાર્યવાહી કરી સસ્પેન્ડ કરાયા છે તો સુમનદીપ વિદ્યાપીઠમાં રેગિંગ મામલે વિદ્યાર્થીઓના નિવેદન લેવામાં આવ્યા છે.
વડોદરાની MS યુનિવર્સિટીમાં મારામારી અને છેડતી મામલે 5 વિદ્યાર્થીઓ સસ્પેન્ડ
તપાસ માટે બનાવેલી હાઈપાવર કમિટીનો મોટો નિર્ણય
સુમનદીપ વિદ્યાપીઠમાં રેગિંગ મામલે કાર્યવાહી
વડોદરાની એમ.એસ.યુનિવર્સિટીમાં છેડતી અને મારામારીની ઘટનાને લઈ શહેરભરમાં ચર્ચા જાગી હતી. ત્યારબાદ સત્તાધીશોએ સાત સિન્ડિકેટ સભ્યોની કમિટી બનાવી હતી. ત્યારબાદ કમિટીની બેઠક બોલાવવામાં આવી હતી.આ બેઠકમાં કમિટિએ આકરા પાણીએ થઈ મારામારી અને છેડતી મામલે સંડોવાયેલા પાંચ વિદ્યાર્થીઓને સસ્પેન્ડ કરી દીધા છે.
મારામારીના કેસમાં કરણ ચૌહાણ અને વાસુદેવ સસ્પેન્ડ
વિદ્યાર્થિનીએ સયાજીગંજ પોલીસ મથકે છેડતીની ફરિયાદ નોંધાવી હતી. આ પ્રકરણમાં સંડોવાયેલ કોમર્સ ફેકલ્ટીના અબુ તાલીબ પઠાણ , રિયાન કય્યુમ પઠાણ, અને શાહીદ મુસ્તકીન શેખને સસ્પેન્ડ કર્યા છે. બીજી બાજુ યુનિવર્સિટીમાં મારામારીની પણ ઘટના બની હતી.આ મામલામાં બીજા બે વિદ્યાર્થીઓ કરણ ચૌહાણ અને વાસુદેવ સુથારને સસ્પેન્ડ કરાયા છે.
3 સિનિયર વિદ્યાર્થીઓના નિવેદન લેવાયા
આ ઉપરાંત વડોદરાની સુમનદીપ વિદ્યાપીઠમાં રેગિંગની ઘટના બહાર આવી હતી. ઓર્થોપેડિક વિભાગના 3 સિનિયર ડૉક્ટર્સ સામે રેગિંગનો આક્ષેપ કરાયો છે. જેમાં ડૉ.ક્ષેમાંકર શાહ, ડૉ.ગૌરવ વડોદરિયા અને ડૉ.હાર્દિક નાયક સહિત રેગિંગ કમિટીએ 3 સિનિયર વિદ્યાર્થીઓના નિવેદન લીધા છે.આ મામલે વિદ્યાર્થીઓને વાલીઓ સાથે સોમવારે હાજર થવા રેગિંગ કમિટી દ્વારા ફરમાન કરાયુ છે.
ગોત્રી મેડિકલ કૉલેજ સતર્ક
મહત્વનું છે કે, સુમનદીપ વિદ્યાપીઠમાં રેગિંગની ઘટના બનતા ગોત્રી મેડિકલ કૉલેજ સતર્ક બની છે અને ગોત્રી મેડિકલ કૉલેજે હોસ્ટેલમાં રહેતા વિદ્યાર્થીઓ માટે ફરમાન બહાર પાડ્યું છે અને રેગિંગનું દૂષણ ડામવા કેટલાક પ્રતિબંધ લગાવ્યા છે.જેમાં હોસ્ટેલમાં વિદ્યાર્થીઓને રાત્રે 12 પહેલાં આવવા જણાવાયું છે ઉપરાંત હોસ્ટેલમાં ફૂડ ડિલિવરી પર પ્રતિબંધ લાગવાયો છે.