ગાંધીનગર / ઢોર નિયંત્રણ બિલ વિધાનસભા ગૃહમાં રજૂ થતા જ પૂર્વ DyCM નીતિન પટેલે આપત્તિ દર્શાવી, જાણો શું કહ્યું...

• ઢોર નિયંત્રણ વિધેયક 2022 ગૃહમાં રજૂ કરાયું
• 3 કરોડ વસ્તી શહેરોમાં વસે છે: વીનુ મોરડીયા
• મારી સરકારને વિનંતી છે કે દંડની રકમ ઓછી કરવામાં આવેઃ નીતિન પટેલ

છેલ્લા ઘણા સમયથી રાજ્યમાં રખડતા ઢોરોનો ત્રાસ વધી ગયો છે. મહાનગરોમાં રખડતા ઢોરોને કારણે લોકો ત્રાહિમામ પોકારી ઉઠ્યા છે. ઘણી જગ્યાએ તો રખડતા ઢોરોનો આતંક એવો વધી ગયો છે કે જીવ ગુમાવવાના પણ બનાવો બન્યા છે. અવારનવાર પાલિકામાં રજૂઆતો કરવામાં આવી પરંતુ અત્યાર સુધી કોઇ નક્કર પગલા લેવાતા ન હતા. પરંતુ હવે રાજ્ય સરકાર આ મામલે સજાગ થઇ ગઇ છે. શહેરી વિસ્તારોને રખડતા પશુઓથી મુક્ત કરવાનું બિલ આજે ગુજરાત વિધાનસભામાં રજૂ કરાયું છે. 

પશુઓને લીધે અનેક લોકોએ જીવ ગુમાવ્યા છેઃ મંત્રી વીનુ મોરડીયા
રાજ્ય કક્ષાના શહેરી વિકાસ વિભાગના મંત્રી વીનુ મોરડીયાએ બિલ રજૂ કરતા કહ્યું કે, શહેરી વિસ્તારમાં વધતા જતા પશુઓના ત્રાસ અટકાવવા રજૂ કરું છું. વૃદ્ધ લોકો પર પશુઓએ હુમલા કર્યા છે. મહિલા અને બાળકો પર પશુઓએ હુમલા કર્યા છે. પશુઓને લીધે અનેક લોકોએ જીવ ગુમાવ્યા છે. 3 કરોડ વસ્તી શહેરોમાં વસે છે. શહેરમાં આખલા રઝળતા મુકવામાં આવે છે.

ઝૂંપડપટ્ટીમાં રહેતા પાસેથી આટલી મોટી રકમ ન લેવી જોઈએઃ નીતિન પટેલ
રખડતા ઢોર અંગેના રજૂ થયેલા બિલની કેટલીક જોગવાઈ પર પૂર્વ નાયબ મુખ્યમંત્રી નીતિન પટેલે આપત્તિ દર્શાવી છે. બિલનું વાંચન પૂર્ણ થતા જ નીતિન પટેલે નિવેદન આપ્યું હતું. તેમણે કહ્યું કે, રખડતા ઢોર અંગે સૂચવેલ દંડની રકમ વધારે છે. મારી સરકારને વિનંતી છે કે દંડની રકમ ઓછી કરવામાં આવે. અભણ અને ગરીબ લોકોના ઢોર રાખતા હોય છે. ઝૂંપડપટ્ટીમાં રહેતા પાસેથી આટલી મોટી રકમ ન લેવી જોઈએ. 

ઢોર નિયંત્રણ બિલમાં શું છે?

• શહેરી વિસ્તારોમાં ઢોર રાખવા માટે પશુપાલકે લાઈસન્સ લેવું પડશે
• મંજૂરીથી રાખેલા તમામ ઢોરને ટેગ લગાવવી પડશે
• આ કાયદાના ભંગ બદલ 1 વર્ષ સુધીની કેદની સજા
• ઓછામાં ઓછા 5 હજારથી વધુમાં વધુ 20 હજાર સુધીના દંડની જોગવાઇ
• પશુપાલકે કાયદો અમલમાં આવ્યાના 90 દિવસમાં લાયસન્સ લેવું પડશે
• લાયસન્સ મળ્યાના 15 દિવસમાં ઢોરને ટેગ લગાવવાની રહેશે
• પ્રતિબંધિત વિસ્તારમાં ઘાસનું વેચાણ કરવા પર પ્રતિબંધ
• પ્રતિબંધિત વિસ્તારમાં ઘાસનું વેચાણ થાય તો 10 થી 50 હજાર સુધીનો દંડ
• બીજીવારના ગુનામાં એક મહિનાની કેદ અથવા 50 હજારથી 1 લાખ સુધીનો દંડ
• ઢોર પકડવા ગયેલી પાર્ટીના હુમલો કરવાના કેસમાં થશે કાર્યવાહી
• ઢોરને ભગાડી જવા અથવા તેનો પ્રયાસ કરવાના કિસ્સામાં થશે કાર્યવાહી
• એક વર્ષની કેદ અને 50 હજારથી 1 લાખ સુધીના દંડની જોગવાઇ