શ્રીનગર / કાશ્મીર ઘાટીમાં હિમસ્ખલનથી 6 જવાનો સહિત 12નાં મોત, 36 લોકોને રેસ્ક્યુ કરાયા

• બચાવદળ ઘટના સ્થળે પહોંચી જતાં 11 સુરક્ષા કર્મચારીઓ સહિત 36 લોકોને બચાવી લેવાયા
• હિમસ્ખલનમાં ત્રણ સૈન્ય ચોકીઓ અને પાંચ મકાન પણ ક્ષતિગ્રસ્ત થયાં
• તાત્કાલિક રાહતકાર્ય કરવાના કારણે 6 જવાનોને બરફની નીચેથી જીવતા બહાર કઢાયા

હિમસ્ખલનમાં ત્રણ સૈન્ય ચોકીઓ અને પાંચ મકાન પણ ક્ષતિગ્રસ્ત થયાં છે. જાણકારી અનુસાર સોમવારે મોડી સાંજે કુપવાડા જિલ્લાના નૌગામ સેકટરમાં એલઓસી પર તહેનાત બીએસએફની પેટ્રોલિંગ ટીમ જાબરા પોસ્ટ પાસે હિમસ્ખલનની ઝપટમાં આવી ગઇ હતી. સૂચના મળતાં જ નજીકની શિબિરમાંથી બચાવ કર્મચારીઓ તાત્કાલિક ઘટનાસ્થળે પહોંચી ગયા હતા અને રાહતકાર્ય શરૂ કરી દીધું હતું.

બચાવદળ સમયસર પહોંચતાં 11 સુરક્ષા કર્મચારી સહિત 36 લોકોને બચાવી લેવાયા

તાત્કાલિક રાહતકાર્ય કરવાના કારણે 6 જવાનોને બરફની નીચેથી જીવતા બહાર કઢાયા હતા. એક અન્ય જવાન અચેત અવસ્થામાં બહાર કાઢવામાં આવ્યો હતો. તેને તાત્કાલિક નજીકની સૈન્ય હોસ્પિટલમાં લઇ જવાયો, જ્યાં તેને શહીદ જાહેર કરાયો હતો. 

કુપવાડાના જ મચ્છલ સેકટરમાં LoC પર આવેલા રિંગબાલા મેદાન બહકમાં સોમવારે મોડી રાતે સેનાની ૪પ આરઆરની એક ચોકી હિમસ્ખલનની ઝપટમાં આવીને ક્ષતિગ્રસ્ત થઇ ગઇ હતી. ઘટનાસ્થળે પહોંચેલા બચાવ કર્મચારીઓએ રાહતકાર્ય શરૂ કરી દીધું હતું. એસપી કુપવાડા શ્રીરામ અંબરકરે જણાવ્યું કે પાંચ જવાનોને ખૂબ જ મહેનત બાદ બરફમાંથી બહાર કઢાયા હતા, પરંતુ તેમાંથી ચાર જવાનોએ જ ત્યાં જ અંતિમ શ્વાસ લીધા હતા.

દિલ્હીમાં આખો મહિનો વરસાદની શક્યતા 

જાન્યુઆરી મહિનો વરસાદનો રેકોર્ડ બનાવવા તરફ આગળ વધી રહ્યો છે. નિષ્ણાતોના જણાવ્યા અનુસાર આખા મહિના દરમિયાન વરસાદ અને વાદળની સતત અવરજવર જોવા મળશે. એક પછી એક વેસ્ટર્ન ડિસ્ટર્બન્સના કારણે જાન્યુઆરીના બાકી બચેલા ૧પ દિવસમાં પણ મોસમનો મિજાજ આવો જ રહેશે. આજે રાતથી ફરી એકવાર હળવો વરસાદ થશે અને ગુરુવારે પણ સારો એવો વરસાદ પડશે. દિવસના સમયે લોકોને ઠંડીનો પણ અનુભવ થશે. આખું અઠવાડિયું તાપમાન 18 ડિગ્રીથી નીચે રહેશે.