મેઘાડંબર / અમદાવાદમાં 4 કલાકમાં 4.5 ઈંચ વરસાદ ખાબક્યો, UGVLC વિસ્તારોમાં લાઇટ ગુલ, વાસણા બેરેજના 8 દરવાજા ખોલાયા

• અમદાવાદ શહેરમાં ગાજવીજ સાથે શરૂ થયો વરસાદ
• ભારે વરસાદથી અમદાવાદના અનેક વિસ્તારોમાં પાણી પાણી
• UGVCLના વીજ કનેક્શનવાળા વિસ્તારોમાં વીજળી ગુલ

અમદાવાદમાં સાંજના 7 વાગ્યાથી વરસાદે અનરાધાર બેટિંગ શરૂ કરી છે. પવનના સુસવાટા અને વીજળીના કડાકા ભડાકા સાથે વરસાદ શહેરને ધમરોળી રહ્યો છે. રાત્રિના 8 વાગ્યા સુધીમાં 1. 5 ઈંચ વરસાદ પડી ગયો હતો એકી સાથે વરસાદે માઝા મૂકતાં નિચાણવાળા વિસ્તારમાં પાણી ભરાયા હતા તો કેટલીક જગ્યાએ ટ્રાફિક જામના દ્રશ્યો સર્જાયા હતા. ભારે ઉકળાટ બાદ વરસાદ વરસતા શહેરના વાતાવરણમાં ઠંડક પ્રસરી છે. સિઝનનો સૌથી વધુ આજે અમદાવાદમાં વરસાદ વરસ્યો છે. અમદાવાદના તમામ વિસ્તારમાં પાણી પાણી થયા છે.

ક્યાં ક્યાં મેઘ મહેર થઈ?
અમદાવાદમાં સેટેલાઈટ, પ્રહલાદનગર, પકવાન, થલતેજ, ગોતા, સોલા, વૈષ્ણોદેવી, પાલડી, બાપુનગર, ઠક્કરનગર, નરોડા, નરોલ સહિત લગભગ શહેરમાં સાર્વત્રિક વરસાદ થયો છે.કેટલીક જગ્યાએ વાહનો બંધ થવાની ઘટનાઓ તો કેટલીક જગ્યાએ વૃક્ષો ધરાશાયી થવાના બનાવો બન્યા છે. છેલ્લા 3 4 દિવસમાં અમદાવાદમાં સારો વરસાદ પડતાં સિઝનનો 25 % વરસાદ શહેરમાં થઈ ગયો છે.

અમદાવાદ શહેરમાં 4 કલાકમાં 4.5 ઈંચ વરસાદ ખાબક્યો ( રાત્રે 10 વાગ્યા સુધીનો વરસાદ)

• શહેરમાં ચાલુ સિઝનનો 4.5 ઈંચ જેટલો વરસાદ થયો 
• અમદાવાદ પશ્ચિમમાં 6.10 ઈંચ, અમદાવાદ પૂર્વમાં 3 ઈંચ વરસાદ
• અમદાવાદના દક્ષીણ ઝોનમાં સરેરાશ 3.50 ઈંચ વરસાદ
• ઉત્તર ઝોનમાં 5.50 ઈંચ વરસાદ, મધ્યઝોનમાં 4.10 ઈંચ વરસાદ
• દક્ષિણ પશ્ચિમ ઝોનમાં 7 ઈંચ, ઉત્તર પશ્ચિમ ઝોનમાં 5.5 ઈંચ
• ટાગોર હોલ વિસ્તારમાં સૌથી વધુ 10 ઈંચ જેટલો વરસાદ 
• ઉસ્માનપુરામાં 8 ઈંચ, રાણીમાં 5 ઈંચ, બોડકદેવમાં 8 ઈંચ 
• સાયન્સ સીટીમાં 5 ઈંચ, ગોતામાં 6 ઈંચ વરસાદ નોંધાયો
• ચાંદલોડીયામાં 4 ઈંચ, સરખેજમાં 6 ઈંચ, જોધપુરમાં 7 ઈંચ 
• બોપલમાં 6 ઈંચ, સરખેજમાં 6 ઈંચ, મકતમપુરામાં 7 ઈંચ 
• ખમાસામાં 6 ઈંચ, વટવામાં 5 ઈંચ, મણીનગરમાં 4 ઈંચ

શહેરના અનેક વિસ્તારોમાં પાણી ભરાયા

અમદાવાદના પૂર્વ વિસ્તારોમાં સતત વરસાદ વરસી રહ્યો છે. જેના પગલે હાટકેશ્વર સર્કલ 3 દિવસમાં ફરી બેટમાં ફેરવાયું છે. ખોખરા ગુજરાત હાઉસીંગ બોર્ડના મકાનોમાં પાણી ભરાયા છે. તો સર્વોદયનગરના મકાનોમાં પણ વરસાદી પાણી ઘુસ્યા છે. ખોખરા સર્કલથી હાટકેશ્વર અને CTMના માર્ગો પાણીમાં ગરકાવ થયા છે. 132 ફુટ રિંગરોડ, અમરાઈવાડીથી ગોરના કુવાના રોડ ડૂબ્યા છે. અમદાવાદ શહેરના નિચાણવાળા વિસ્તારોમાં પાણી ભરાયા છે. ત્યારે વાસણા ટેલિફોન એક્સચેન્જ નજીક ઘુંટણસમા પાણી ભરાયા છે. અનેક સોસાયટીઓમાં વરસાદી પાણી ઘરોમાં ઘુસ્યા છે. દાણીલીમડા વિસ્તારમાં જળબંબાકારની સ્થિતિ બની છે. રોડ પર પાણી ભરાતા વાહન ચાલકોને હાલાકી પડી રહી છે. પાણી ભરાવાને કારણે અનેક વાહનો બંધ પડ્યા છે. વાહનોને ધક્કા લગાવતા વાહનચાલકો પડ્યા નજરે છે. 

UGVCLના વીજ કનેક્શનવાળા વિસ્તારોમાં વીજળી ગુલ

અમદાવાદમાં ભારે વરસાદને કારણે જનજીવન પ્રભાવિત થયું છે. ભારે વરસાદને કારણે UGVCLના વીજ કનેક્શનવાળા બોપલ સહિત કેટલાક વિસ્તારોમાં વીજળી ગુલ થઇ છે. શહેરના અનેક વિસ્તારમાં વીજળી ગુલ થતા અંધારપટ છવાયો છે.

ખારીકટ કેનાલમા વરસાદી પાણી ઠાલવવાની કામગીરી શરૂ, વાસણા બેરેજના 8 દરવાજા ખોલાયા

ખારીકટ કેનાલમા વરસાદી પાણી ઠાલવવા કામગીરી શરૂ છે. ગુરુજી રેલવે ઓવરબ્રિજની નીચે સમ્પના 4 પંપો શરૂ કરાયા છે. પંપની મદદથી વરસાદી પાણી ઉલેચવાની કામગીરી શરૂ કરાઈ છે. વાસણા બેરેજના 8 દરવાજા 4 ફૂટ ખોલાયા છે. 5 અંડરપાસ વાહન વ્યવહાર માટે બંધ કરવામાં આવ્યા છે.

CM ભૂપેન્દ્ર પટેલે સ્ટેટ ઇમરજન્સી સેન્ટરની મુલાકાત લીધી
રાજ્યમાં સતત પડી રહેલા વરસાદને પગલે મુખ્યમંત્રી ભુપેન્દ્ર પટેલ રાજ્યના મુખ્ય સચિવ પંકજકુમાર સહિતના ઉચ્ચ અધિકારીઓ સ્ટેટ ઈમરજન્સી ઓપરેશન સેન્ટર ખાતે પહોંચ્યા હતા. આ સ્ટેટ ઈમરજન્સી ઓપરેશન સેન્ટર ખાતે મુખ્યમંત્રી ભુપેન્દ્ર પટેલે સમીક્ષા બેઠક કરી, રાજ્યમાં વરસાદથી કયા કેવી સ્થિતિ છે તેનો તાગ મેળવ્યો છે. રાજ્યભરમાં હજુ હવામાન વિભાગ દ્વારા આગામી પાંચ દિવસ સુધી વરસાદની આગાહી છે.

હવામાન વિભાગની આગાહી શું?

• 11 જુલાઈ વલસાડ, ડાંગ, નવસારીમાં વરસાદની આગાહી
• 11 જુલાઈ જુનાગઢ, પોરબંદર, અમરેલીમાં વરસાદની આગાહી
• 11 જુલાઈ રાજકોટ,બોટાદ, ભાવનગરમાં વરસાદની આગાહી
• 11 જુલાઈ ખેડા, અમદાવાદ, આણંદમાં વરસાદની આગાહી
• 12 જુલાઈ નવસારી, વલસાડ, અમરેલીમાં વરસાદની આગાહી
• 12 જુલાઈ જૂનાગઢ, ગીર સોમનાથ, દ્વારકામાં વરસાદની આગાહી
• 12 જુલાઈ ભરૂચ, તાપી, ડાંગમાં વરસાદની આગાહી
• 12 જુલાઈ સુરત, ભાવનગર, રાજકોટમાં વરસાદની આગાહી
• 13 જુલાઈ વલસાડ, અમરેલી, ગીર સોમનાથમાં વરસાદની આગાહી
• 13 જુલાઈ પોરબંદર, જૂનાગઢ, નવસારીમાં વરસાદની આગાહી
• 13 જુલાઈ બોટાદ, ભાવનગર, રાજકોટમાં વરસાદની આગાહી
• 13 જુલાઈ દ્વારકા, જામનગર, કચ્છમાં વરસાદની આગાહી

વરસાદની રાહ કોણ ના જુએ, પણ સીકકાની બીજી બાજુની જેમ મુશ્કેલ બાબત એ છે વરસાદ આવે એટલે તેની સાથે સમસ્યાઓ પણ આવે છે, પહેલા કે બીજા વરસાદમાં જ રોડ રસ્તાઓની હાલત ખસ્તા થઇ જતી હોય છે. રોડ રસ્તા તુટવા હવે તો જાણે નવાઇની વાત રહી જ નથી. મોટા મોટા શહેરોની પણ હાલત ખુબ ખસ્તા જોવા મળી રહી છે તો નાના શહેરો અને ગામડાઓની તો શું પરીસ્થીતી હશે તેની આપણે કલ્પના કરી શકીએ છીએ. પ્રાથમિક સુવિધાઓ આપવી તંત્રની જવાબદારી છે અને તેમાં પણ જનતા પોતાની સુખાકારી માટે ટેક્સ પણ એટલે જ તો ચુકવે છે કે તેમને સુવિધાઓ મળે તો આખરે ચૂક ક્યાં રહી જાય છે.