બનાસકાંઠાના વરઘોડામાં બે અલગ-અલગ જ્ઞાતિના બે જૂથ વચ્ચે અથડામણ, હુમલામાં સુરક્ષા માટે હાજર PSI સહિત પોલીસ કર્મચારીઓ ઇજાગ્રસ્ત
ડીસાના કુંપટ ગામમાં વરઘોડામાં થઇ મારામારી
બંદોબસ્તમાં ગયેલી પોલીસ પર પણ હુમલો
જિલ્લા પોલીસવડા સહિત પોલીસ કાફલો ઘટના સ્થળે
બનાસકાંઠામાં ગામે આજે કૂંપટ ગામે પોલીસ પર હુમલો થયો હોવાની ઘટના સામે આવી છે. વરઘોડો કાઢવા બાબતે થયેલી બબાલમાં બંદોબસ્ત માટે પહોંચેલી પોલીસ પર ટોળાએ પથ્થરમારો કરતાં એક પીએસઆઈ સહિત ત્રણ પોલીસકર્મી ને ગંભીર ઇજા પહોંચતા સારવાર માટે ડીસાની સરકારી અને ખાનગી હોસ્પિટલમાં ખસેડાયા હતા.
શું સમગ્ર મામલો?
ડીસા તાલુકાના કૂંપટ ગામે આજે ડીસા તાલુકા પોલીસ પર હુમલો થયો હોવાની ઘટના બની છે. કૂંપટ ગામે આજે ઠાકોર સમાજના યુવકના લગ્ન હતા. લગ્નમાં દરબાર સમાજના લોકોએ વરઘોડો કાઢવાની ના પાડી હતી તેમ છતાં યુવકે વરઘોડો કરતા બે જૂથ વચ્ચે બબાલ થઈ હતી. બનાવને પગલે ડીસા તાલુકા પોલીસ ઘટનાસ્થળે પહોંચી બંને જૂથ ને સમજાવવાના પ્રયાસો હાથ ધર્યા હતા. જોકે તે સમયે દરબાર સમાજના ટોળાએ અચાનક પથ્થરમારો કરી હુમલો કર્યો હતો. આ હુમલામાં બંદોબસ્ત માટે આવેલ દાંતીવાડા પી.એસ.આઇ સ્નેહિત કુમાર દેસાઈ ,પોલીસ કોન્સ્ટેબલ વિક્રમદાન ગઢવી દાન ગઢવી તેમજ ભરતભાઇ પુનડિયાને ગંભીર ઈજા પહોંચી હતી.
હુમલાખોરોની અટકાયત કરવા તજવીજ
ઇજાગ્રસ્ત પોલીસ કર્મચારીઓને તાત્કાલિક ડીસાની સરકારી હોસ્પિટલ ખાતે સારવાર માટે ખસેડાયા હતા જો કે ઇજાગ્રસ્તોની તબિયત વધુ ગંભીર હોવાના કારણે ઇજાગ્રસ્ત પોલીસ કર્મચારીને વધુ સારવાર માટે ખાનગી હોસ્પિટલમાં ખસેડાયા હતા. હુમલાની જાણ થતાં જ જિલ્લા પોલીસ વડા સહિત પોલીસનો કાફલો ઘટનાસ્થળે પહોંચ્યો હતો અને વધુ પરિસ્થિતિ ન વણસે તે માટે ચાંપતો બંદોબસ્ત ગોઠવ્યો હતો. અત્યારે ગામમાં કરફ્યુ જેવો માહોલ સર્જાયો છે, જ્યારે પોલીસે હુમલો કરનારા લોકોની શોધખોળ હાથ ધરી અટકાયત કરવાની પ્રક્રિયા હાથ ધરી હતી
પંચમહાલના બાસ્કા ગામે પણ થયો હતો પથ્થરમારો
25 મેના રોજ પંચમહાલના બાસ્કા ગામે પથ્થરમારાની ઘટના બની હતી. લગ્નના વરઘોડામાં DJ પર ગીત વગાડવાને કારણે પથ્થરમારો થયો હતો. લગ્નનો વરઘોડો લઘુમતી વિસ્તાર નજીકથી નિકળ્યો, ત્યારે DJ પર ગીત વાગતું હતું. જેને લઇ પથ્થરમારો થયો હતો. ઘટના બન્યા બાદ પોલીસનો કાફલો ઘટના સ્થળે પહોંચ્યો હતો અને મામલો થાળો ન પડે ત્યાં સુધી ડેરો નાખ્યો હતો.હાલમાં બાસ્કામાં અજંપાભરી શાંતિ જોવા મળી રહી છે. શાંતિને બનાવી રાખવા પોલીસના 30થી વધુ જવાનને ગામમાં તૈનાત કરાયા હતા.