નિવેદન / હું નહીં, વિલિયમ્સન છે ન્યૂઝીલેન્ડર ઓફ ધ યરનો દાવેદારઃ સ્ટોક્સે દિલ જીતી લીધાં

જોકે બેન સ્ટોક્સે આ એવોર્ડ લેવાનો ઇન્કાર કરી દીધો છે.  બેન સ્ટોક્સનું કહેવું છે કે, આ એવોર્ડનો અસલી હકદાર ન્યૂઝીલેન્ડનો કેપ્ટન કેન વિલિયમ્સન છે જેણે પોતાની ટીમને ફાઈનલ સુધી પહોંચાડી.

28 વર્ષીય બેન સ્ટૉક્સ ભલે ઇંગ્લેન્ડની ટીમનો મહત્ત્વપૂર્ણ ખેલાડી હોય, પરંતુ તેનો જન્મ ન્યૂઝીલેન્ડના ક્રાઇસ્ટચર્ચમાં થયો હતો. ઇંગ્લેન્ડ અને ન્યૂઝીલેન્ડ વચ્ચેની ફાઇનલ મેચ અને સુપર ઑવર ટાઈ રહી હતી અને મેચનું પરિણામ વધારે બાઉન્ડ્રી મારનાર ઇંગ્લેન્ડના પક્ષમાં ગયું હતુ.

સ્ટૉક્સે સોશિયલ મીડિયા પર લખ્યું હતું, ''મારી ન્યૂઝીલેન્ડર ઓફ યર તરીકે પસંદગી થતાં હું ખુશ છું, પરંતુ મારા માનવા પ્રમાણે આ પ્રતિષ્ઠિત એવૉર્ડ માટે મારું નોમિનેશન યોગ્ય નહીં હોય. ઘણા લોકો છે, જેમણે ન્યૂઝીલેન્ડ ક્રિકેટ માટે ઘણું કર્યું છે મારા કરતાં તેઓ વધારે આ એવોર્ડ માટે હકદાર છે. કેન વિલિયમ્સન ટૂર્નામેન્ટનો સૌથી શાનદાર ખેલાડી રહ્યો. તે પ્રેરણાદાયી કેપ્ટન છે. તેણે દરેક પ્રકારની પરિસ્થિતિઓમાં પોતાની વિનમ્રતા બતાવી છે. તે ન્યૂઝીલેન્ડવાસીઓ માટે સાચી ઓળખ છે. વિલિયમ્સન જ આ સન્માન માટે સાચો હકદાર છે. ન્યૂઝીલેન્ડવાસીઓ, તેનું સંપૂર્ણ સમર્થન કરો.”