ચીન પછી હવે સમગ્ર વિશ્વ માટે કોરોના વાઈરસ એક કટોકટી બની ગયો છે. ગઈકાલે અમેરિકાના શેરબજારોમાં થયેલા મોટા ગાબડા પછી આજે ભારતીય શેરબજાર પર પણ વૈશ્વિક ઊથલપાથલની સ્પષ્ટ અસર જોવા મળી છે અને બેન્ચમાર્ક ઈન્ડેક્સ સેન્સેક્સમાં આશરે 1448.37 પોઇન્ટ એટલે કે 3.64 ટકાનું ગાબડું પડ્યું છે. નોંધનીય છે કે આ સેન્સેક્સના ઇતિહાસનું બીજું સૌથી મોટું ગાબડું છે. આ પહેલા 2015માં સેન્સેક્સ 1624 પોઇન્ટ પટકાયો હતો.
મહત્વના સેક્ટર્સ શેરોના ભાવો ગગડ્યા
અમેરિકાનો ડાઉ જોન્સ 1190 પોઇન્ટ સાથે વિક્રમજનક ઘટ્યો
ક્રૂડ ઓઇલના ભાવોમાં કડાકો: 50 ડોલરની અંદર ભાવ
સેન્સેક્સના રકાસ બાદ નિફ્ટીમાં પણ 414.10 પોઇન્ટ એટલે કે આશરે 3.56 ટકા ઘટાડો નોંધાયો છે. આ સાથે સેન્સેક્સે આજે 38,500ની મહત્વની સપાટી ગુમાવી દીધી છે. જ્યારે નિફ્ટીએ 11,300ની મનોવૈજ્ઞાનિક રીતે અગત્યની સપાટી ગુમાવી છે.
કયા ક્ષેત્રમાં કેટલા ગાબડા?
સેન્સેક્સ પેકમાં આઈટીસી સિવાયની 29 કંપનીના ભાવોમાં ઘટાડો જોવા મળ્યો છે. આ સ્ક્રીપમાં મેટલ ઈન્ડેક્સ સૌથી વધારે 550 પોઇન્ટ એટલે કે 6.21 ટકા, ઓટો ઈન્ડેક્સ 611.07 પોઇન્ટ એટલે કે 3.78 ટકા, આઈટી ઈન્ડેક્સ 890.92 પોઇન્ટ અથવા 5.61 ટકા, ઓઈલ-ગેસ ઈન્ડેક્સ 393.86 પોઇન્ટ અથવા 3.03 ટકા ઘટ્યા છે.
ભારતીય શેરબજારમાં આજે રોકાણકારોની કુલ સંપત્તિમાં શરૂઆતની 15 મિનિટમાં આશરે રૂપિયા પાંચ લાખ કરોડનું ધોવાણ થયું હતુ. BSE ખાતે કુલ 2620 સ્ક્રીપમાં કામકાજ થઈ રહ્યું છે જે પૈકી 2011 સ્ક્રીપના ભાવોમાં મંદી જોવા મળે છે, 456 સ્ક્રીપમાં સામાન્ય સુધારો જ્યારે 153 સ્ક્રીપના ભાવ યથાવત છે.
મિડકેપ અને સ્મોલકેપ ઈન્ડેક્સમાં અનુક્રમે 472.17 પોઇન્ટ અથવા 3.13 ટકા અને 500.47 પોઇન્ટ એટલે કે 3.52 ટકાનો ઘટાડો થયો છે. ફોરેન પોર્ટફોર્લિયો ઈન્વેસ્ટર્સ (FPI) અને સ્થાનિક સંસ્થાગત રોકાણકારો દ્વારા બધી બાજુથી તમામ ક્ષેત્રોમાં મોટા પાયે વેચવાલી થઇ રહી છે.
યુએસ શેરબજાર 2008 પછી સૌથી નીચલા સ્તરે પહોંચ્યું છે. ડાઉ જોન્સમાં 1,191 પોઇન્ટની સૌથી મોટો એક દિવસનો ઘટાડો નોંધાયો છે જેમાં ચાર ટકાનો ઘટાડો થયો છે.
દક્ષિણ કોરિયા, ઇટાલી અને ઈરાનમાં પણ વાયરસની અસરો જોવા મળી છે. FTSI 3.49 ટકા, જાપાનના નિક્કી 4.02 ટકા, નાસ્ડેક 4.61 ટકા, શાંઘાઈ કમ્પોઝિટ 3.37 ટકા અને હેંગશેંગ 2.50 ટકા ઘટ્યા છે.
સતત છ દિવસથી બજારમાં મંદીનો માહોલ
ચીનની બહાર કોરોનાવાયરસના ફેલાવાને કારણે વૈશ્વિક બજારમાં સતત ઘટાડો જોવા મળી રહ્યો છે જેને કારણે રોકાણકારો માર્કેટમાંથી પૈસા ઉપાડી રહ્યા છે. માર્કેટમાં સતત છ દિવસનો ઘટાડો નોંધાઈ રહ્યો છે અને રોકાણકારોને આ છ દિવસમાં લગભગ 10 લાખ કરોડ રૂપિયાનું નુકસાન થયું છે.
ગત 24મી ફેબ્રુઆરી એટલે કે સોમવારથી અત્યાર સુધીમાં શેરબજારમાં 2872 પોઇન્ટનું ધોવાણ થઇ ગયું છે.
ક્રૂડ તેલના ભાવો પર પણ વરવી અસર
કોરોના વાઈરસની શેરબજાર ઉપરાંત ક્રુડ તેલના ભાવો પર પણ અસર જોવા મળી રહી છે. ગઈ રાત્રે WTI ક્રુડ ઓઈલનો બેરલ દીઠ ભાવ 1.64 ડોલર એટલે કે 3.48 ટકા ગગડી 47.09 ડોલર અને બ્રેન્ટ ક્રુડ ઓઈલના ભાવ 1.25 ડોલર અથવા 2.40 ટકા ઘટી 52.18 થઇ ગયો છે.કોરોના વાઈરસના ફેલાવાને લીધે વૈશ્વિક અર્થતંત્રની વૃદ્ધિ ધીમી પડવાની સંભવાના વચ્ચે ક્રુડની ડિમાન્ડ પણ ઘટવાની સંભાવના વચ્ચે ક્રુડના ભાવોમાં આ ઘટાડો નોંધાયો છે.