રશિયા અને યુક્રેનમાં વધતા તણાવને કારણે નબળા વૈશ્વિક સંકેતો સાથે ભારતીય શેરબજાર ભારે ઘટાડા સાથે ખુલ્યું હતું. સપ્તાહના બીજા કારોબારી દિવસે મંગળવારે શેરબજાર ખુલતાની સાથે જ હોબાળો મચી ગયો હતો. બજારના બંને સૂચકાંકોમાં જોરદાર ઘટાડો જોવા મળ્યો હતો. બોમ્બે સ્ટોક એક્સચેન્જ (બીએસઈ)નો 30 શેરનો ઈન્ડેક્સ સેન્સેક્સ 1024 પોઈન્ટના ઘટાડા સાથે 57 હજારની નીચે આવી ગયો અને 56,659 પર ખુલ્યો હતો. જ્યારે નેશનલ સ્ટોક એક્સચેન્જ (એનએસઈ)નો નિફ્ટી ઈન્ડેક્સ 299 પોઈન્ટ ઘટીને 17 હજારની નીચે આવ્યો. હાલમાં નિફ્ટી 16,907 ના સ્તર પર ટ્રેડ કરી રહ્યો છે.
ONGC ફાયદામાં
બજાર ખુલતાની સાથે જ લગભગ 254 શેરમાં તેજી આવી, 1932 શેર ઘટ્યા અને 48 શેર યથાવત રહ્યા. આ દરમિયાન સેન્સેક્સના તમામ 30 શેરો લાલ નિશાન પર ટ્રેડ થઈ રહ્યા છે. નિફ્ટીમાં ડો. રેડ્ડીઝ લેબ્સ, એલએન્ડટી, એશિયન પેઇન્ટ્સ, ટીસીએસ અને યુપીએલ ટોપ લુઝર્સમાં હતા, જ્યારે માત્ર ઓએનજીસી ફાયદામાં રહ્યો.અગાઉ સોમવારે જ્યાં સેન્સેક્સ 149 પોઈન્ટ ઘટીને 57,683 પર બંધ થયો હતો, ત્યારે નિફ્ટી પણ 70 પોઈન્ટ ઘટીને 17,206 પર બંધ થયો હતો.
રશિયા- યુક્રેન વચ્ચે તણાવ
રશિયા અને યુક્રેન વચ્ચે તણાવ ચરમ પર છે. આ તમામની વચ્ચે રાષ્ટ્રપતિ વ્લાદિમીર પુતિને રાષ્ટ્રને સંબોધિત કર્યું હતું. રાષ્ટ્રને સંબોધન કરતા રશિયાઈ રાષ્ટ્રપતિ પુતને જે એલાન કર્યું છે, તેનાથી બંને દેશો વચ્ચે તણાવ વધી શકે છે. પુતિને એલાન કર્યું છે કે, રશિયા, પૂર્વ યુક્રેનને બે અલગ અલગ ક્ષેત્રોની સ્વતંત્રતાને માન્યતા આપશે. રશિયા , સ્વઘોષિત ગણરાજ્ય ડોનેત્સ્ક અને લુગંસ્કને અલગ દેશ તરીકે માન્યતા આપશે.
રશિયાના રાષ્ટ્રપતિએ રાષ્ટ્રને સંબોધન કર્યું
રશિયાઈ રાષ્ટ્રપતિએ ડોનેત્સ્ક પીપુલ્સ રિપબ્લિક અને લુગંસ્ક પીપુલ્સ રિપબ્લિકની માન્યતા સંબંધિત કાર્યકારી આદેશ પર હસ્તાક્ષર પણ કર્યા છે. રશિયાઈ રાષ્ટ્રપતિએ ડીપીઆરના પ્રમુખ ડેનિસ પુશિલિન અને એલપીઆરના પ્રમુખ લિયોનિદ પાસચનિકની સાથે સંધિ પર પણ હસ્તાક્ષર કર્યા છે. રશિયા અને ડીપીઆર, એલપીઆર વચ્ચે આ સંધિ મૈત્રી, સહયોગ અને પારસ્પરિક સહાયતાને લઈને છે.