ક્રિકેટ / અહો આશ્ચર્યમ! સ્ટીવ સ્મિથની બોલિંગમાં આ બેટ્સમેન થયો આવી વિચિત્ર રીતે આઉટ ; જુઓ વીડિઓ 

બહુ ઓછા લોકો જાણતા હશે પણ ઓટ્રેલિયાના હોનહાર ખેલાડી સ્ટીવ સ્મિથે તેની કારકિર્દીની શરૂઆત એક લેગ સ્પિન બોલર તરીકે કરી હતી. તેણે હાલ ઓસ્ટ્રેલિયામાં ચાલી રહેલી આપણી રણજી ટ્રોફી જેવી ડોમેસ્ટિક ક્રિકેટ ટુર્નામેન્ટ જેને ત્યાં શેફિલ્ડ શિલ્ડ કહે છે તેની એક મેચમાં 'વેસ્ટર્ન ઓસ્ટ્રેલિયા'ની ટીમ સામે એક વિચિત્ર વિકેટ ઝડપી હતી. 

સ્ટીવ સ્મિથને બોલિંગની કમાન તેની 'ન્યુ સાઉથ વેલ્સ' ટીમના કપ્તાન પીટર નેવિલે સોંપી હતી. સ્મિથે એક ફૂલ લેન્થ ડિલિવરી નાખી હતી જેમાં લોઅર ઓર્ડર બેટ્સમેન જોશ ઈંગ્લીસ થાપ ખાઈ ગયો હતો. ઇંગ્લીસે આ બોલને ડ્રાઈવ શોટ વડે મારવાનો પ્રયત્ન કર્યો જેમાં બોલ સિલી પોઇન્ટ ઉપર ઉભેલા ફિલ્ડરના પગને અથડાઈને ઉછળ્યો હતો જે આખરે નિક લાર્કિને શોર્ટ લેગ પાસે ઝીલી લીધો હતો. આ કેચ થતા જ સ્ટીવની ટીમમાં ખુશીની લહેર છવાઈ ગઈ હતી. 

Steve Smith has a wicket... in bizarre (and lucky) circumstances!

Watch #NSWvWA: https://t.co/bT2LWJka8G pic.twitter.com/d0PKdLMsHo

— cricket.com.au (@cricketcomau) November 14, 2019

આ વીડિઓ 'ક્રિકેટ ઓસ્ટ્રેલિયા'ના ટ્વીટર ઉપર શેર કરવામાં આવ્યો હતો. નોંધનીય છે કે મેચમાં આ સ્મિથની એકમાત્ર વિકેટ હતી. તેણે આ મેચમાં 6 ઓવર નાખી હતી જેમાં 2 ઓવેર મેઇડન હતી. 6 ઓવરમાં તેણે 10 રન આપી ને 1 વિકેટ ઝડપી હતી. આમ તેનો ઈકોનોમી રેટ ખુબ સારો એવો 1.66 જેટલો બન્યો હતો. 

અહીં એ પણ ઉમેરવું રહ્યું કે બેટિંગમાં તો સ્મિથે ઉત્કૃષ્ટ પ્રદર્શન કર્યું જ હતું. તેણે પહેલી ઇનિંગ્સમાં 103 રન નોંધાવ્યા હતા અને તેની ટીમ 223 રનના જંગી તફાવતથી મેચ જીતી ગઈ હતી. 

સ્મિથ શેફિલ્ડ શિલ્ડમાં ભાગ લઇને પોતે 21 નવેમ્બરથી બ્રિસ્બેનમાં શરુ થનારી પાકિસ્તાન વિરુદ્ધની ટેસ્ટ શ્રેણીમાં સારું પ્રદર્શન કરવા માંગે છે. 

હાલમાં સ્મિથ ટેસ્ટમાં વિશ્વનો ટોચનો બેટ્સમેન છે. તેણે 64.56ની પ્રભાવશાળી સરેરાશથી ટેસ્ટમાં કુલ 6973 રન નોંધાવ્યા છે. રસપ્રદ વાત એ છે કે સ્મિથે ટેસ્ટ ક્રિકેટમાં 17 વિકેટો મેળવી છે. 

ઓસ્ટ્રેલિયા પાકિસ્તાનની યજમાની કરશે જેમાં તે બીજી ટેસ્ટ એડિલેડમાં રમશે.