શહેરના ચાંદખેડા વિસ્તારમાં આવેલ યામાહાના શો-રૂમમાંથી યુવક ટેસ્ટ ડ્રાઈવના બહાને રૂ. 1.41 લાખની નવી બાઇક લઇ ફરાર થઇ જતાં દોડધામ મચી જવા પામી છે. યુવક નવી બાઇક તો લઇ ગયો પણ સાથે તેની પાસે રહેલ ચોરીની બાઇક મૂકી ગયો હતો.
ચાંદખેડામાં બની અનોખી ઘટના
યુવક પોતાનું બાઈક મૂકી લાખોનું બાઈક લઈ છુ
યુવક પોતાનું જે બાઈક મૂકી ગયો તે ચોરીનું
ચાંદખેડા વિસ્તારમાં આવેલ દિવાલી હોમ પાસે રહેતા અને સત્યમેવ હોસ્પિટલની બાજુમાં પ્લાનેટ યામાહા બાઇકના શો-રૂમમાં બ્રાન્ચ મેનેજર તરીકે ફરજ બજાવતા ઇશ્વરભાઈ પરમારે બાઈક ચોરીની ફરિયાદ કરી છે. ફરિયાદમાં જણાવ્યા મુજબ તા. ર૦ નવેમ્બરના રોજ એક યુવક આવ્યો હતો અને યામાહા બાઇકના આ ર૧પ વી૩ મોડલની ટેસ્ટ ડ્રાઈવની માગણી કરી હતી, જેથી બ્રાન્ચ મેનેજરે બીજા દિવસે ટેસ્ટ ડ્રાઈવ માટે આવવા માટે કહ્યું હતું. ર૧ નવેમ્બરના રોજ યુવકનો ફોન બ્રાન્ચ મેનેજર પર આવ્યો અને ટેસ્ટ ડ્રાઈવ અંગે પૂછપરછ કરી હતી.
ટેસ્ટ ડ્રાઈવ આપી અને યુવક પરત જ ન આવ્યો
ત્યારબાદ બ્રાન્ચ મેનેજરે યુવકને બોલાવીને ટેસ્ટ ડ્રાઈવ આપી હતી, જોકે ટેસ્ટ ડ્રાઇવ બાદ યુવક પરત આવ્યો ન હતો, જેથી બ્રાન્ચ મેનેજરે યુવકના ફોન નંબર પર તેનો સંપર્ક કરવા પ્રયત્ન કરતાં તે સ્વિફ ઓફ આવતો હતો. આ મામલે તેમણે ચાંદખેડા પોલીસ સ્ટેશનમાં ફરિયાદ દાખલ કરી છે. પોલીસે છેતરપિંડીની ફરિયાદ નોંધીને ૧,૪૧,૮૮૦ કિંમતની બાઈક અંગે તપાસ શરૂ કરી છે.
યુવક પોતાનું જે બાઈક મૂકી ગયો તે ચોરીનું
મહત્ત્વની વાત તો એ છે કે યુવક ટેસ્ટ ડ્રાઇવ માટે જે બાઇક લઈને આવ્યો હતો તેની તપાસ કરતાં જાણવા મળ્યું હતું કે બાઇકનો નંબર ખોટો છે અને તે બાઇક ચોરીનું છે અને આ બાઇક હૈદરાબાદના યુવકનું ર૦ દિવસ પહેલાં જુહાપુરામાંથી ચોરાયું હોવાનું જાણવા મળ્યું હતું. હાલ પોલીસે ફરાર યુવક અંગે વધુ શોધખોળ શરૂ કરી છે.