સફળતા / સાત ચોપડી ભણેલા ગુજરાતના ખેડૂતે YouTube પર વીડિયો જોઇને બનાવ્યું મીની ટ્રેક્ટર

• ગુજરાતના ખેડૂતની અનોખી સિદ્ધિ
• youtube પર વિડીયો જોઇ બનાવ્યું ટ્રેક્ટર

ટ્રેક્ટરના મિકેનિઝમ સાથે કામ પાર પાડી રહેલા આ વ્યક્તિને જોઈને પ્રથમ નજરે તમને એવું લાગશે કે આ વ્યક્તિ કોઈ મિકેનિક હશે. હાથમાં પાનાં પક્કડ સાથે ટ્રેક્ટરની ઝીણાંમાં ઝીણી વિગત ચકાસી રહેલા આ વ્યક્તિને જોઈને તમને કદાચ એવું લાગશે કે, આ વ્યક્તિ કોઈ ગેરેજ ચલાવતો હશે પરંતુ હકીકત જાણશો તો તમને આશ્ચર્ય થશે. 

દાડમની ખેતી માટે બનાવ્યું ટ્રેક્ટર

ટ્રેક્ટર સાથે એક ચિત્ત થઈને કામ કરી રહેલા આ વ્યક્તિનું નામ છે નાગજીભાઈ પટેલ. વ્યવસાયે નાગજીભાઈ એક ખેડૂત છે. પરંતુ કહેવાય છે ને કે જરૂરિયાત એ સંશોધનની જનેતા છે.  
બનાસકાંઠાના થરાદ તાલુકાના દાંતીયા ગામના ખેડૂત નાગજીભાઈએ હાલ દાડમની ખેતી કરી છે. પરંતુ તેમાં નીંદણ કામ અને ખેડકામ માટે મોટું ટ્રેક્ટર કામ આવતું નથી. આથી ખેડૂત નાગજીભાઈએ આ મુંઝવણનો ઉકેલ શોધવા પોતાને અનુકૂળ એવું ટ્રેક્ટર બનાવવાનો વિચાર સ્ફૂર્યો અને બનાવી નાંખ્યું ટ્રેક્ટર. 

બાળપણથી નવું શીખવાનો ધરાવે છે શોખ

આમ પણ ખેડૂત નાગજીભાઈને બાળપણથી જ નવુ નવું શીખવામા રસ ધરાવે છે. આથી નાગજીભાઈએ ખેતીકામમાંથી રોજ બબ્બે કલાક સમય કાઢીને મીની ટ્રેક્ટર બનાવવા અભિયાન આદરી દીધું. આખરે છ મહિનાના કઠિન પ્રયાસ બાદ માત્ર રૂપિયા 1 લાખ ચાલીસ હજારના ખર્ચે ટ્રેક્ટર તૈયાર કરી દીધું છે.  

સામાન્ય રીતે બજારમાં પણ આવા મીની ટ્રેક્ટર મળે છે પરંતુ તેની  કિંમત હોર્સ પ્રમાણે અઢીલાખથી પાંચ લાખ સુધીની હોય છે. જો કે નાના ખેડૂતોને આટલા મોંઘા ટ્રેક્ટર પોષાતા નથી. નાગજીભાઇને પણ તે જ સમસ્યા હતી. તેમણે બજારમાં મળતા ટ્રેક્ટર જેવું જ ટ્રેક્ટર માત્ર એક લાખ ચાલીસ હજાર રૂપિયાની પડતર કિંમતમાં તૈયાર કરી દીધું છે. 

 યુ ટયૂબ પર વીડિયો જોઇને બનાવ્યું ટ્રેક્ટર

નાગજીભાઈ હવે  આ જ ટ્રેક્ટર વડે પોતાના દાડમન ખેતરમાં ખેતી કરી રહ્યા છે. નવાઈની વાત એ છે કે નાગજી ભાઈ માત્ર સાત ધોરણ સુધી ભણ્યા છે પરંતુ  યુ ટયૂબ પર વીડિયો જોઈને અને કેટલાક મિકેનિક મિત્રોની સલાહ લઈને તેમણે પોતાની જરૂરિયાત મુજબનું 10 હોર્સ પાવરનું ટ્રેક્ટર બનાવી  લીધું છે. તેમની આ શોધને જોવા માટે આજુબાજુના ગામના ખેડૂતો નાગજી ભાઈને મળવા આવી રહ્યા છે અને તેમની સિદ્ધિને નાના ખેડૂતો માટે લાભદાયી ગણાવી રહ્યા છે.  

આસપાસના ખેડૂતો માટે બન્યા પ્રેરણારૂપ

બજારમાં મળતાં અન્ય કંપનીઓના ટ્રેકટર સમકક્ષ આ ટ્રેક્ટર પણ ઘણી એવરેજ પણ આપે છે અને તાકાતમાં પણ ખૂબ જ સારું સાબિત થયું છે. આસપાસના ખેડૂતો પણ નાગજીભાઈ પાસેથી પ્રેરણા લઈ રહ્યા છે.  નાગજીભાઈનું કહેવું છે કે, આ સફળતા બાદ  હવે આવા બીજા ટ્રેક્ટરો બનાવશે તે અને પોતના જેવા નાના ખેડૂતો વેચીને તેમની મદદ કરશે.