ઉતીર્ણ / કોડીનારઃ ચા'ની લારીવાળાના પુત્રએ ધોરણ-10માં બાજી મારી, 99.98% મેળવી પરિવારનું નામ રોશન કર્યું

ગીર સોમનાથના કોડીનારના વડનગર ગામના પ્રિંસે બાજી મારી છે. 99.98% જેટલી ટકાવારીથી પરિવાર અને ગામનું નામ રોશન કર્યું છે. સફળતા માત્ર મહેનત કરનારને જ મળે છે. આ વાત વધુ એકવાર ગીર સોમનાથ જીલ્લાના વડનગરના એક ખેડૂત પુત્રએ સાબિત કરી બતાવી છે.

અથાગ મહેનતના પરિણામે ક્રિસ્ટલ સ્કૂલમાં અભ્યાસ કરતા પ્રિન્સ ભરતભાઇ બારડ નામના આ વિદ્યાર્થીએ ગુજરાત બોર્ડ દ્વારા લેવામાં આવેલી ધોરણ-10ની પરીક્ષામાં 99.98 ટકાવારી મેળવી માતા-પિતા અને શાળાનું નામ રોશન કર્યુ છે. 

કોડીનાર તાલુકાના વડનગર ગામે રહેતા ભરતભાઇ બારડ ખેતીની સાથે સાથે અંબુજા કંપનીના ગેટ પાસે ચાની લારી ચલાવી પરિવારનું ગુજરાન ચલાવે છે. ભરતભાઈ માટે આજે સૌથી મોટો ખુશીનો દિવસ છે. પ્રિન્સ 99.98 પર્સનટેજથી પાસ થતા બારડ પરિવારમા ખુશી છવાય છે. પ્રિન્સને હવે 12 સાયન્સમાં અભ્યાસ કરવો છે.

વિસનગર નૂતન કેળવણી મંડળનો વિદ્યાર્થી સમગ્ર મહેસાણા જિલ્લામાં પ્રથમ
ધોરણ-10નું પરિણામ જાહેર થયું છે ત્યારે વિસનગરની નૂતન કેળવણી મંડળના વિદ્યાર્થીઓ સમગ્ર મહેસાણા જિલ્લામાં પ્રથમ આવ્યો છે. આ શાળામાં અભ્યાસ કરતા પટેલ કશીશ કુમાર સુધીરભાઈએ 600માંથી 575 માર્ક મેળવીને જિલ્લામાં પ્રથમ ક્રમાંક પ્રાપ્ત કર્યો છે.

કશીશના પિતા સુધીરભાઈ નૂતન હાઈસ્કૂલમાં ફિજીકસના શિક્ષક છે. જ્યારે સમગ્ર શાળાનું પરિણામ 79.90 ટકા આવ્યું છે. આ ટ્રસ્ટના ચેરમેન પ્રકાશભાઈ પટેલે વિદ્યાર્થીને બુકે આપી સન્માનિત કર્યો હતો. કશીશ દિવસમાં 5 કલાક મહેનત કરતો હતો.